မိူင်းပႄႊၵျီႊယႅမ်ႊ (Belgium) ဢဝ်မၢၵ်ႇပၵ်ႉႁဵတ်းႁိူဝ်းသေ ႁဵတ်းပွႆးၽၢႆးႁိူဝ်းမၢၵ်ႇပၵ်ႉ ၶေႉၶဵင်ႇၵၼ် တီႈၼႂ်းၼွင်ၼမ်ႉလူင် ဝဵင်းၵႃႊသတိူဝ်ႊလီႊ မီးၵူၼ်းၶဝ်ႈႁူမ်ႈၶေႉၶဵင်ႇ 300 ပၢႆ – ဝႃႈၼႆ။

မၢၵ်ႇပၵ်ႉၼိုင်ႈလုၵ်ႈၼႆႉ ၼမ်ႉၼၵ်းမီး 400 ၵရမ်ႊပၢႆ။ မၢၵ်ႇပၵ်ႉလုၵ်ႈယႂ်ႇလူင်ၼႆႉ ၼွၵ်ႈလိူဝ် ဢဝ်တူမ်ႈႁုင်ႁဵတ်းၽၵ်း ၵိၼ်ယဝ်ႉ တေႁဵတ်းသင်လႆႈထႅင်ႈၼႆသေ ၼႂ်းပီ 2008 ၼၼ်ႉ ၸင်ႇလႆႈပၢႆးဝူၼ်ႉမႂ်ႇမႃး၊ ဝၢႆးၼၼ်ႉ တႄႇႁဵတ်းပဵၼ်မႃး ပၢင်ပွႆးၶေႉၶဵင်ႇၽၢႆးႁိူဝ်းမၢၵ်ႇပၵ်ႉ။ ၾၢႆႇၼိုင်ႈၵေႃႈ ပဵၼ်လွင်ႈတူင်ႉၼိုင် ၼႂ်းၶၢဝ်း Halloween ဢၼ်ၼိုင်ႈ  – ၼႆယဝ်ႉ။

ပၢင်ပွႆးၶေႉၶဵင်ႇၽၢႆးႁိူဝ်းမၢၵ်ႇပၵ်ႉၼႆႉ ၸုမ်းမၢၵ်ႇပၵ်ႉ ၵူၼ်းၼႂ်းပိုၼ်ႉတီႈလႄႈ ၸုမ်းၶလပ်ႉၽၢႆးႁိူဝ်း ၵႃႊသတိူဝ်ႊလီႊ ၶဝ် ႁူမ်ႈၵၼ်သေ ၸတ်းႁဵတ်း။ ၼႂ်းပၢင်ၶေႉၶဵင်ႇ ပီၼႆႉ မၢၵ်ႇပၵ်ႉၼႂ်းပိုၼ်ႉတီႈ ၼမ်ႉၼၵ်းမီး 1,160 ၵီႊလူဝ်ႊၵရမ်ႊ (2,500 ပွင်ႇပၢႆ) လႆႈႁပ်ႉသူးၶျႅၼ်ႊပီႊယႅၼ်ႊယူႊရူပ်ႇဝႆႉ ဝႃႈၼႆ။

တႃႇတေဢဝ်မၢၵ်ႇပၵ်ႉယႂ်ႇ မႃးၶႅၵ်းႁဵတ်း မိူၼ်ၼင်ႇႁိူဝ်း ႁႂ်ႈၶီႇၼႂ်းမၼ်းသေၽၢႆးလႆႈၼၼ်ႉ လႆႈၸႂ်ႉမၢၵ်ႇပၵ်ႉ ဢၼ်ၼမ်ႉၼၵ်းမီး ၼႂ်းၵႄႈ 300 – 500 ၵီႊလူဝ်ႊ။ ယွၼ်ႉမၢၵ်ႇပၵ်ႉ ပဵၼ်လုၵ်ႈသေ မူၼ်းဝႆႉလႄႈ ၽၢႆးယၢပ်ႇလိူဝ်သေၽၢႆးႁိူဝ်း ၼႆယဝ်ႉ။

ႁူၺ်ႇမၢၵ်ႇပၵ်ႉ ဢၼ်ၶႅၵ်းဢွၵ်ႇဝႆႉၼၼ်ႉ ၵဵပ်းသိမ်းဝႆႉတႃႇပီတေမႃးသေ မၢၵ်ႇပၵ်ႉဢၼ်ႁဵတ်းႁိူဝ်း ၶေႉၶဵင်ႇၵၼ်ယဝ်ႉ ၼၼ်ႉသမ်ႉ ဢဝ်ပႅတ်ႈဝႆႉၼႂ်းသူၼ်ႁဵတ်းၽုၼ်ႇလႆႈ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။