မိူင်းၶႄႇ ႁၢမ်ႈဢဝ်ၶူဝ်းၵုၼ်ႇတၢင်းမိူင်းၶႄႇ ၶၢမ်ႈလႅၼ်လိၼ်ၶဝ်ႈမိူင်းတႆး – မိူင်းမၢၼ်ႈ တီႈၵဵတ်ႉ/ လၢၼ်ႇ သိုၵ်းဝႃႉ ၵုမ်းၵမ်။

တႄႇဢဝ် ဝၼ်းတီႈ 24/10/2024 မႃး မိူင်းၶႄႇ ဢမ်ႇပၼ်ဢဝ်ၼမ်ႉမၼ်းၵိၼ်၊ ၼမ်ႉမၼ်းၸၢၵ်ႈ၊ မျေႇဢေႃးၸႃႇ၊ လိၼ်ပုၺ်ထၢတ်ႈ၊ ယႃႈၶႃႈမူင်ႈမႅင်း ၸိူဝ်းၼႆႉ ၶၢမ်ႈၽၵ်းတူလႅၼ်လိၼ် ဝဵင်းပၢင်သၢင်းလႄႈ ၵဵတ်ႉလၢၼ်ႇသဝ်ၽႃ ၸိူဝ်းၼႆႉသေ ၶဝ်ႈမိူင်းတႆး ၼႂ်းၼႃႈလိၼ်ဝႃႉ ၵုမ်းၵမ်ဝႆႉၸိူဝ်းၼၼ်ႉယဝ်ႉၼႆ – ဢူးၺီႇယၢၼ်း ၽူႈၶၢၼ်ပၢၵ်ႇလႄႈ ၽူႈမီးပုၼ်ႈၽွၼ်းတီႈ လုမ်းၵပ်းသၢၼ်ဝႃႉၼၼ်ႉ လၢတ်ႈၼင်ႇၼႆ။

မၼ်းၸၢႆး လၢတ်ႈၽူႈတွႆႇႁွၵ်ႈဝႃႈ -“ယၢမ်းလဵဝ် ၶဝ်သင်ႇပိၵ်ႉဢိုတ်းဝႆႉ ၵဵတ်ႉလၢၼ်ႇဢၼ်ၼိုင်ႈယဝ်ႉ။ ပဵၼ်ၵဵတ်ႉလၢၼ်ႇမၢၼ်ႈၶႃး ဢၼ်မီးႁိမ်းဝဵင်းၼမ်ႉတိုၵ်းၼၼ်ႉ – ၶဝ်ပိၵ်ႉမႃးလႆႈလိူၼ်ပၢႆယဝ်ႉ။ ၵဵတ်ႉလၢၼ်ႇတၢင်ႇဢၼ်တႄႉ ၶဝ်ဢမ်ႇသင်ႇပိၵ်ႉ။ ၵူၺ်းၵႃႈ ၶဝ်သင်ႇႁၢမ်ႈၶူဝ်းၵုၼ်ႇ ၸိူဝ်းလမ်ႇလွင်ႈၸိူဝ်းၼၼ်ႉဝႆႉ”- ဝႃႈၼႆ။

ဢၼ်မိူင်းၶႄႇ တႄႇႁၢမ်ႈၶူဝ်းၶွင်လမ်ႇလွင်ႈ ၶဝ်ႈၶၢႆၼႂ်းၼႃႈလိၼ်ဝႃႉ ၵုမ်းၵမ် မိူဝ်ႈဝၼ်း 24/10/2024 ၼၼ်ႉတႄႉ ပဵၼ် ၵဵတ်ႉလၢၼ်ႇ မိူင်းမႂ်ႇ – ပၢင်ဝၢႆ၊ ၵဵတ်ႉလၢၼ်ႇသဝ်ၽႃ၊ ၵဵတ်ႉလၢၼ်ႇယႂ်ႇပၢင်သၢင်း ၸိူဝ်းမီးၼႂ်းၼႃႈလိၼ်ဝႃႉ ၵုမ်းၵမ် ၵူၺ်းဢမ်ႇၵႃး ႁၢမ်ႈပႃးတီႈၵဵတ်ႉလၢၼ်ႇ မိူင်းလႃး – တႃႈလေႃႉ တီႈဢၼ်သိုၵ်း မိူင်းလႃး NDAA ၵုမ်းၵမ်ဝႆႉၼၼ်ႉလူးၵွၼ်ႇ – ၵူၼ်းပိုၼ်ႉတီႈလၢတ်ႈၼင်ႇၼႆ။

ၼွၵ်ႈလိူဝ် ၶူဝ်းၶွင်တႃႇၽုၵ်ႇသွမ်ႈယဝ်ႉ ၶူဝ်းၶွင်ၶိူင်ႈၸႂ်ႉၾႆးၾႃႉ၊ ၶူဝ်းၶွင် ပပ်ႉလိၵ်ႈလၢႆးလႄႈ ၽႅၼ်ႇတီႈပၢႆႉ၊ ယႃႈမဝ်းၵမ်လႄႈ ၶိူင်ႈထၢတ်ႈၶႅမ်ႊမီႊၶိူဝ်ႊလ်၊ ၶိူင်ႈၸႂ်ႉၶူဝ်းသိုၵ်း၊ ယႃႈယႃၵိၼ်၊ ယႃႈၶႃႈမူင်ႈမႅင်း၊ ၼမ်ႉၵူတ်း(ဢႅတ်ႉသိတ်ႉ)၊ ၶိူင်ႈ ၸႂ်ႉသွႆ ၼႂ်းႁူင်းၸၢၵ်ႈ ၸိူဝ်းၼႆႉၵေႃႈ ႁၢမ်ႈသူင်ႇၶၢႆမိူင်းတႆး – ႁွင်ႈၵၢၼ်ၾၢႆႇၵၢၼ်ၵႃႉၶၢႆ ၸႄႈမိူင်းယုၼ်ႊၼၢၼ်ႊ မိူင်း ၶႄႇ ဢွၵ်ႇၶေႃႈပိုၼ်ၽၢဝ်ႇဝႆႉ မိူဝ်ႈဝၼ်းတီႈ 25/10/2024 ၼၼ်ႉၼင်ႇ ၼႆ။

ဝၢႆးသေ မိူင်းၶႄႇ ပိုၼ်ၽၢဝ်ႇႁၢမ်ႈၶူဝ်းၵုၼ်ႇယဝ်ႉ ဢမ်ႇပေႃးႁိုင် – ၾၢႆႇတၢင်းသိုၵ်းဝႃႉ UWSA ၵေႃႈ ဢွၵ်ႇလိၵ်ႈပိုၼ်ၽၢဝ်ႇဝႃႈ – ဝဵင်းယႂ်ႇဝဵင်းလူင် ၼႂ်းၼႃႈလိၼ်ဝႃႉၵုမ်းၵမ်ၼႆႉ ၵူၼ်းၵႃႉၵူၼ်းၶၢႆၶူဝ်း တင်းမူတ်း တၵ်းတေဢမ်ႇလႆႈတၢင်ႇၵႃႈ ၶၼ် ၶူဝ်းၵုၼ်ႇၶၢႆတေႃႇၵၼ်၊ တေဢမ်ႇလႆႈၽၢမ်းလၢတ်ႈ လဵၼ်ႈၶၼ်ၵုၼ်ႇ၊ သင်ဝႃႈ ၵူတ်ႇထတ်း ၺႃးမႅၼ်ႈၸိုင် တေပၼ်တူတ်ႈတၢမ်ႇ ၵႂႃႇႁၢဝ်ႈႁႅင်း ဝႃႈၼႆ။

ဢူးၺီႇယၢၼ်း သိုပ်ႇလၢတ်ႈတီႈၽူႈတွႆႇႁွၵ်ႈထႅင်ႈဝႃႈ -“ႁဝ်းၶႃႈ လႆႈဢွၵ်ႇၶေႃႈပိုၼ်ၽၢဝ်ႇဝႆႉၽိုၼ်ၼိုင်ႈ ပႃး ဝႆႉ 7 ၶေႃႈ၊ တႃႇထိင်းၶၼ်ၵုၼ်ႇၼႂ်းပိုၼ်ႉတီႈ ႁႂ်ႈၼိမ်။ သင်ဝႃႈ ၽႂ်ၽိတ်းပၵ်းပိူင်မၢႆမီႈၸိုင်ႈ ႁဝ်းၶႃႈၵေႃႈ တေပၼ်တူတ်ႈတၢမ်ႇၵႂႃႇ ႁၢဝ်ႈႁႅင်း ပဵၼ်တၢင်းၵၢၼ်”- ဝႃႈၼႆ။

ႁၢင်လိူၼ်ဢေႃႊၵတ်ႊသ် ပူၼ်ႉမႃးၼႆႉၵေႃႈ – မိူင်းၶႄႇ ယၢမ်ႈပိုၼ်ၽၢဝ်ႇ ပိၵ်ႉၶူဝ်းၵုၼ်ႇသူင်ႇၶဝ်ႈမိူင်းမၢၼ်ႈ ယဝ်ႉၵမ်း ၼိုင်ႈ။ ၽွင်းၼၼ်ႉ ပႃးၸဵမ်တၢင်းၵိၼ် တၢင်းယႅမ်ႉၵေႃႈ ဢမ်ႇၸၢင်ႈသူင်ႇၶဝ်ႈၶၢႆၼႂ်းမိူင်းတႆးလႄႈ ၵူၼ်းမိူင်း ပဵၼ် ဢၼ်ယၢပ်ႇၽိုတ်ႇၵိၼ်းၸႂ်။ ထိုင်တီႈၶူဝ်းၵုၼ်ႇတႃႇ တေႃႉသူင်ႇၶၢႆၸူး ၵၼ်ၼႂ်းပိုၼ်ႉ တီႈပေႃးဢမ်ႇမီး။

ဝၢႆးလင် မိတ်ႉသတိူဝ်ႊ တဵင်ႉသျီႊၵျွၼ်ႊ ၽူႈတၢင်တူဝ်ၶိုၵ်ႉတွၼ်းမိူင်းၶႄႇ ႁူပ်ႉထူပ်းၵၼ်တင်း ၽူႈၼမ်းဝႃႉ ႁၢင်လိူၼ် ဢေႃႊၵတ်ႊသ်ၼၼ်ႉယဝ်ႉ မီးၶၢဝ်ႇဢွၵ်ႇမႃးဝႃႈ – ၶႄႇယင်းၸီႉသင်ႇႁႂ်ႈႁဵတ်းတႅပ်း 5 တႅပ်း ၼႂ်းပိုၼ်ႉတီႈၼႃႈလိၼ် ဢၼ် MNDAA ၵုမ်းၵမ် တိုၵ်းပေႉဝႆႉ – မိူၼ်ၼင်ႇ တၢင်းဝဵင်းလၢဝ်ႇၵၢႆး၊ ၵုၼ်လူင်၊ သႅၼ်ဝီ၊ လႃႈသဵဝ်ႈ ၸိူဝ်းၼႆႉ။ ဝၢႆး ၼၼ်ႉ သိုၵ်းမၢၼ်ႈၵေႃႈ ဢဝ်ၶိူင်ႈမိၼ် မႃးယိုဝ်းၵူႈၶမ်ႈၶိုၼ်း။ ယၢမ်းလဵဝ်ၵေႃႈ ၶႄႇသင်ႇပိၵ်ႉ ၶူဝ်းၵုၼ်ႇၶဝ်ႈၼႂ်းပိုၼ်ႉတီႈ ၼႃႈလိၼ်သိုၵ်းဝႃႉ ၵုမ်းၵမ်ထႅင်ႈ။

ယၢမ်းလဵဝ် တီႈၵဵတ်ႉလၢၼ်ႇလႅၼ်လိၼ် မူႇၸေႊ – ရုၺ်ႉလီႊ၊ ၵဵတ်ႉလၢၼ်ႇ ၵၢၼ်ႇပၢႆႉတီႇ ၸိူဝ်းၼႆႉၵေႃႈ မိူင်းၶႄႇ သင်ႇႁၢမ်ႈဢဝ်တၢင်းၵိၼ်တၢင်းယႅမ်ႉလႄႈ ၼမ်ႉမၼ်းၸၢၵ်ႈၶဝ်ႈၶၢႆ ၼႂ်းၸႄႈဝဵင်းမူႇၸေႊ ၵႃႈၶၼ်ၵုၼ်ႇသုင်ဝႆႉ။

ယၢမ်းလဵဝ်တႄႉ ၸွမ်းလႅၼ်လိၼ်မၢၼ်ႈ-ၶႄႇ ၼႆႉ ၵဵတ်ႉ/လၢၼ်ႇ ဢၼ်တေႃႉသူင်ႇၵႃႉၶၢႆၶူဝ်းၵုၼ်ႇယႂ်ႇ ၶႄႇ သင်ႇပိၵ်ႉဝႆႉမီး 8 ၵဵတ်ႉ၊ ဢၼ်ပၼ်တေႃႉသူင်ႇၵႃႉၶၢႆဝႆႉ လွတ်ႈလႅဝ်း ပဵၼ်ၵဵတ်ႉလၢၼ်ႇဢၼ်သိုၵ်းမၢၼ်ႈလႄႈ ၸုမ်းယိင်းၵွင်ႈၵၢင်ႇ ၸၢဝ်းၶိူဝ်း ၵုမ်းဝႆႉ 7 ၵဵတ်ႉ၊ လိူဝ်သေၼၼ်ႉတႄႉ ၵူတ်ႇထတ်းၶဵင်ႈၶႅင်သေ ၸင်ႇပၼ်တေႃႉၶဝ်ႈ – ဢွၵ်ႇ ႁွင်ႈၵၢၼ်ၾၢႆႇတေႃႉသူင်ႇၵႃႉၶၢႆ ၸႄႈမိူင်းယုၼ်ႊၼၼ်ႊ ပိုၼ်ၽၢဝ်ႇဝႆႉၼင်ႇၼႆ။ 

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)