ႁူင်းယႃလူင် ၸႄႈတွၼ်ႈလၢင်းၶိူဝ်း ဢမ်ႇမီးမေႃယႃလူင် တႃႇႁၵ်ႉသႃၵူၼ်းမိူင်းလႄႈ ႁူပ်ႉထူပ်းတၢင်းယၢပ်ႇၽိုတ်ႇ ယူႇ ဝႃႈၼႆ။
ယိင်းႁၵ်ႉ ၵူၼ်းမိူင်းလၢင်းၶိူဝ်း လၢတ်ႈဝႃႈ “ မေႃယႃလူင် တီႈႁူင်းယႃၸႄႈတွၼ်ႈလၢင်းၶိူဝ်းႁဝ်းၶႃႈၼႆႉ လႆႈၶၢႆႉၵႂႃႇ ၸိၼ်ႉၵၢႆႇ ၼႂ်းလိူၼ်ဢွၵ်ႊထူဝ်ႊၿိူဝ်ႊ မိူဝ်ႈပီပူၼ်ႉမႃး။ တေႃႈလဵဝ် မီးဝႆႉၵႅမ်မေႃယႃလူင်ၵေႃႉၼိုင်ႈၵူၺ်း ဢၼ်ႁၵ်ႉသႃ ယူတ်းယႃပၼ်ၵူၼ်းမိူင်းယူႇၼႆႉ။ ယွၼ်ႉဝႃႈတေႃႈလဵဝ်သမ်ႉ ပဵၼ်ၶၢဝ်းၾူၼ်ၼႆလႄႈ ၵူၼ်းပဵၼ်တၢင်း ပဵၼ်ၼၢဝ်ၼူၵ်ႉ/ ၶႆႈလိူတ်ႈဢွၵ်ႇၼမ်။ လိူဝ်ၼၼ်ႉ ၵူၼ်းပဵၼ်ၵေႃႈသမ်ႉၼမ် ယွၼ်ႉၼၼ် ႁဝ်းၶႃႈလူဝ်ႇမေႃယႃလူင်တႄႉၶႃႈ။ ၵဵဝ်ႇၵပ်း လွင်ႈၼႆႉ ႁဝ်းၶႃႈ တုၵ်းယွၼ်းထိုင်ၽွင်းလူင်ၶဝ် ႁႂ်ႈၸဵဝ်းၸွႆႈၵမ်ႉထႅမ်ပၼ်ႁႂ်ႈသူင်ႇမႃးပၼ်ဝႆးဝႆးသေၵမ်း” ဝႃႈၼႆ။
ၼႂ်းၸႄႈတွၼ်ႈလၢင်းၶိူဝ်းၼႆႉ တင်းမူတ်း မီး 4 ၸႄႈဝဵင်း မိူၼ်ၼင်ႇ ၸႄႈဝဵင်းလၢင်းၶိူဝ်း၊ ၸႄႈဝဵင်းမိူင်းၼၢႆး၊ ၸႄႈဝဵင်း မိူင်းပၼ်ႇလႄႈ ၸႄႈဝဵင်းမွၵ်ႇမႆႇ ၸိူဝ်းၼႆႉ။ ၵူၼ်းပဵၼ် တၢင်းပဵၼ်ၸၼ်ႉႁၢဝ်ႈႁႅင်း လႆႈမႃးယူတ်းယႃတူဝ် တီႈႁူင်း ယႃလူင် ၸႄႈတွၼ်ႈ လၢင်းၶိူဝ်း ဝႃႈၼႆ။
လုင်းၸၢႆးပႃႉတဵင်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢင်းၶိူဝ်း လၢတ်ႈဝႃႈ “ ဝၢႆးသေ မေႃယႃလူင် ၶၢႆႉၵႂႃႇယဝ်ႉ တေႃႇထိုင်ယၢမ်းလဵဝ် မေႃယႃလူင်ၵေႃႉမႂ်ႇပႆႇမႃးတႅၼ်း ၵဵဝ်ႇၵပ်းလွင်ႈၼႆႉ ၶႃႈႁဝ်းတုၵ်းယွၼ်းၼႂ်းသၽႃးဝႆႉယဝ်ႉ။ ယူႇတီႈၽွင်းလူင်ၾၢႆႇပၢႆးယူႇလီ တွပ်ႇဝႃႈ တေႁၢင်ႈႁႅၼ်းသူင်ႇပၼ်မႃးဝႆးဝႆးဝႃႈၼႆ။ ၵူၺ်းၵႃႈ ထိုင်ယၢမ်းလဵဝ် မေႃ ယႃလူင် ပႆႇႁွတ်ႈထိုင် ၶဝ်ႈမႃး ၼႂ်း 6-7 လိူၼ်ၼႆႉယဝ်ႉ။ ပူၼ်ႉမႃး 2-3 ဝၼ်းၼႆႉ ၶႃႈႁဝ်းလႆႈၵပ်းၾူၼ်းႁႃ ၽွင်းလူင် ၾၢႆႇ ပၢႆးယူႇလီထႅင်ႈယူႇ။ ယူႇတီႈၽွင်းလူင် တွပ်ႇလၢတ်ႈဝႃႈ ၼႂ်းလိူၼ် သွင်လိူၼ်ၼႆႉ တေႁၢင်ႈႁႅၼ်းသူင်ႇလူင်း မႃးပၼ်မေႃယႃလူင်ဝႆးဝႆးယူႇ” ဝႃႈၼႆ။
ပီၵၢႆ 2017 ၼႂ်းလိူၼ်ဢွၵ်ႊထူဝ်ႊၿိူဝ်ႊၼၼ်ႉ မေႃယႃလူင် ဢၼ်ႁပ်ႉပုၼ်ႈၽွၼ်းဝႆႉတီႈႁူင်းယႃလူင် လၢင်းၶိူဝ်းၼၼ်ႉ လႆႈၶၢႆႉၵႂႃႇမိူင်းမၢၼ်ႈယဝ်ႉ။ ဝႃႈတေသူင်ႇၸုမ်းမေႃယႃၶဝ်လူင်းမႃးတႅၼ်ႈယူႇၼႆသေတႃႉ တေႃႇထိုင်ယၢမ်းလဵဝ်ပႆႇလူင်း မႃးတႅၼ်း ဝႃႈၼႆ။
ၸွမ်းၼင်ႇပိူင်ၶွတ်ႇၽွတ်ႈႁူင်းယႃၵူၼ်းမိူင်းၸႄႈတွၼ်ႈလၢင်းၶိူဝ်းၼႆႉ ၼိုင်ႈၸႄႈဝဵင်းလႂ် တေလႆႈမီး မေႃယႃလူင် ၼိုင်ႈၵေႃႉလႄႈ ၵႅမ်မေႃယႃလူင် 6 ၵေႃႉ ႁူမ်ႈၵၼ် တင်းမူတ်း တေလႆႈမီး 7 ၵေႃႉ။ ၵူၺ်းၵႃႈယၢမ်းလဵဝ် ၼိုင်ႈၸႄႈဝဵင်း လႂ်သမ်ႉ မီးမေႃယႃလူင် ၼိုင်ႈၵေႃႉလႄႈ ၵႅမ်မေႃယႃလူင်ၼိုင်ႈၵေႃႉၵူၺ်း တင်းမူတ်း မီး 2 ၵေႃႉ။ တီႈႁူင်းယႃၸႄႈ ဝဵင်းလၢင်းၶိူဝ်းသမ်ႉ မီးၵႅမ်မေႃယႃလူင်ၼိုင်ႈၵေႃႉၵူၺ်း ဢၼ်ႁၵ်ႉသႃလုမ်းလႃးၵူၼ်းပဵၼ်ဝႆႉ ဝႃႈၼႆ။
