လုၵ်ႈႁဵၼ်းၵဝ်ႇ တိူၵ်ႈသွၼ်လိၵ်ႈထမ်ႇမေႃးတယ ၵဵင်းတုင် တေ ၸတ်းပၢင်ႁူပ်ႉထူပ်းယႂ်ႇ ၵမ်းႁႅၵ်ႈ

လုၵ်ႈႁဵၼ်း လုၵ်ႈသိတ်ႇၵဝ်ႇ ၸိူဝ်းယၢမ်ႈႁဵၼ်းလိၵ်ႈမႃးတီႈ တိူၵ်ႈသွၼ်လိၵ်ႈထမ်ႇမေႃးတယ (ၵျွင်းမိူင်းၼၢႆး) တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ဢဝ်တိုဝ်ႉတၢင်းမႅၼ်ႈဝၼ်းၵေႃႇတင်ႈ တိူၵ်ႈသွၼ်ႈလိၵ်ႈ ၶွပ်ႈတဵမ် 68 ပီသေ တေၸတ်းပၢင်ႁူပ်ႉထူပ်းၵၼ် ၶိုၵ်ႉယႂ်ႇပဵၼ်ပွၵ်ႈ ၵမ်းႁႅၵ်ႈ။

တေၸတ်းပႃး ပၢင်ပိုတ်ႇပုတ်ႉထၶေႃးလဵၵ်ႉ ဢၼ်တေၵိူတ်ႇဢွၵ်ႇ လႆႈၽူႈႁူႉႁၼ်ၶိုတ်း ၸၼ်ႉလိူဝ်ၵဝ်ႇၼၼ်ႉထႅင်ႈ ဝႃႈ ၼႆ။

ပေႃးထိုင်မႃး ဝၼ်းတီႈ 31/10/2024 ၼႆႉ သင်ၶၸဝ်ႈလႄႈ တၵႃႇသတ်ႉထႃး မိူင်းတႆးပွတ်းဢွၵ်ႇၶူင်း တေႁူမ်ႈၵၼ် ၸတ်းႁဵတ်းပၢင်ႁူပ်ႉထူပ်းလုၵ်ႈႁဵၼ်းၵဝ်ႇ ဢၼ်ယၢမ်ႈႁဵၼ်းမႃးတီႈတိူၵ်ႈသွၼ်လိၵ်ႈ ဝတ်ႉထမ်ႇမေႃးတယ (ဓမ္မောဒယ – ၵျွင်းမိူင်းၼၢႆး) တီႈဝဵင်းၵဵင်းတုင် – မၢႆတွင်း ဝၼ်းၵေႃႇတင်ႈတိူၵ်ႈသွၼ်လိၵ်ႈ ၶွပ်ႈတဵမ် 68 ပီ။ တေၸတ်းတႃႇၶၢဝ်းတၢင်း 3 ဝၼ်း ပေႃးထိုင်ဝၼ်းတီႈ 02/11/2024 ဝႃႈၼႆ။

တိူၵ်ႈသွၼ်လိၵ်ႈထမ်ႇမေႃးတယ ဝဵင်းၵဵင်းတုင်ၼႆႉ ၼိုင်ႈပီလႂ် မီးသင်ၶၸဝ်ႈ မႃးႁဵၼ်းလိၵ်ႈထမ်း ဢမ်ႇယွမ်း 200 တူၼ်။ ပဵၼ်ဢွင်ႈတီႈ ဢၼ်ၵိူတ်ႇဢွၵ်ႇ ၽူႈႁူႉႁၼ်ၵတ်ႉၶႅၼ်ႇလူင်ႉလႅၼ်ႇ တင်းၼမ်သေ ဢမ်ႇၵႃး ၸိူဝ်းလုၵ်ႉတီႈၼႆႈသေ ၵႂႃႇလဵပ်ႈႁဵၼ်းတေႃႇၼွၵ်ႈမိူင်းၵေႃႈ မီးၼမ်။ ယွၼ်ႉၼၼ် သင်ၶၸဝ်ႈလႄႈ တၵ်ႉၵႃႇသတ်ႉထႃး ၵမ်ႈၼမ် ဝႆႉၼမ်ႉၼၵ်းၼိူဝ် တိူၵ်ႈသွၼ်လိၵ်ႈၼႆႉတႄႉတႄႉဝႃႈဝႃႈ။

ၸဝ်ႈၶူး ဢိၼ်ႇတသီရိ (ၸဝ်ႈသႅင်) တိူၵ်ႈသွၼ်လိၵ်ႈ ထမ်ႇမေႃးတယ လၢတ်ႈၼႄဝႆႉၼင်ႇၼႆ –

“ၶေႃႈယိူင်းဢၢၼ်း ဢၼ်လႆႈၸတ်းပၢင်ၼႆႉတႄႉၵေႃႈ လုၵ်ႈသိတ်ႇလုၵ်ႈႁဵၼ်း ဢၼ်ယၢမ်ႈလႆႈႁဵၼ်းလိၵ်ႈ တီႈတိူၵ်ႈသွၼ်လိၵ်ႈၼႆႉ ၽၢတ်ႇၵၼ်ၵႂႃႇႁိုင်ယဝ်ႉသေ ဢၼ်ဢမ်ႇလႆႈႁူပ်ႉထူပ်းၵၼ်ၶိုၼ်းၸိူဝ်းၼၼ်ႉ ႁႂ်ႈလႆႈထူပ်းၵၼ်ၶိုၼ်း၊ သြႃႇသမႃးလႄႈ လုၵ်ႈႁဵၼ်းလုၵ်ႈသိတ်ႇႁႂ်ႈလႆႈထူပ်းၵၼ်ၶိုၼ်း။ ႁႂ်ႈမီးလွင်ႈၸမ်ၸႂ်ၵၼ်ၶိုၼ်း။ ႁႂ်ႈမီးလွင်ႈၵပ်းသိုပ်ႇ ၵၼ်ၶိုၼ်း။ မီးသင်မႃးၵေႃႈ ႁႂ်ႈပေႃးလႆႈဢုပ်ႇဢူဝ်းၵိူဝ်း ၵုမ်ၵၼ်။ ပိူင်လူင်ၵေႃႈ ႁဝ်းမႃးၸတ်းပၢင်ၵၼ်ႇတေႃး ၶူးဝႃး ဢႃးၸၢၼ် ဢၼ်လႆႈပွၼ်ႈသွၼ်ပၢႆးႁူႉပၢႆး မေႃပၼ် တီႈတိူၵ်ႈသွၼ်လိၵ်ႈၼႆႉမႃး ပၢၼ်သိုပ်ႇပၢၼ်ၼႆႉၼၼ်ႉယဝ်ႉ”- ဝႃႈၼႆ။

ပၢင်ၶွပ်ႈတဵမ် တိူၵ်ႈသွၼ်လိၵ်ႈတႄႉ သင်ၶၸဝ်ႈလႄႈ တၵ်ႉၵႃႇသတ်ႉထႃး တီႈၵဵင်းတုင် ႁူမ်ႈၵၼ် ၸတ်းႁဵတ်းမႃး ယူႇ ၵူႈပီပီသေတႃႉ ပၢင်ႁူပ်ႉထူပ်းလုၵ်ႈႁဵၼ်းၵဝ်ႇၼႆႉသမ်ႉ ပႆႇတွၼ်ႉယၢမ်ႈလႆႈၸတ်းမႃးၶိုၵ်ႉယႂ်ႇ ၸိူင်ႉၼႆသေပွၵ်ႈ လႆႈဝႃႈပွၵ်ႈၼႆႉ တေၸတ်း ပဵၼ်ပွၵ်ႈၵမ်းႁႅၵ်ႈ။

သင်ၶၸဝ်ႈ ဢၼ်ယၢမ်ႈႁဵၼ်းလိၵ်ႈလၢႆး ပၺ်ႇၺႃႇ တီႈတိူၵ်ႈသွၼ်လိၵ်ႈထမ်ႇမေႃးတယ ၵဵင်းတုင်ၼႆႉ မီးဝႆႉပတ်းပိုၼ်ႉ ၸိုင်ႈတႆး ၸဵမ်ဢဝ်ပွတ်းဢွၵ်ႇ၊ ပွတ်းႁွင်ႇ၊ ပွတ်းၸၢၼ်း။ မိူၼ်ၼင်ႇ ၵူၼ်းတၢင်းဝဵင်း သီႇပေႃႉ၊ ၵျွၵ်ႉမႄး၊ လႃႈသဵဝ်ႈ၊ မိူင်း ၵိုင်၊ ႁၢမ်းငၢႆးလႄႈ ဝဵင်းၸိူဝ်းဢၼ်ယူႇၸမ်ၵဵင်းတုင် မိူၼ်ၼင်ႇ မိူင်း ၽျၢၵ်ႈ၊ မိူင်းယၢင်း၊ သိုဝ်လိုဝ်း တႄႇၵႂႃႇပေႃးပဵၼ်ပွတ်းဢွၵ်ႇၶူင်းၼႆႉ လႆႈဝႃႈမီးၵူႈဝဵင်း။

ၶၢဝ်းၼႆႉသမ်ႉ ပဵၼ်ၶၢဝ်းၵိၼ်ၶၢဝ်းလူႇတၢၼ်းလႄႈ လုၵ်ႈႁဵၼ်းၵဝ်ႇ တေပဵၼ်မႃးထူပ်းလႆႈမူတ်းႁႃႉ ဢမ်ႇပဵၼ် ဢၼ်ဝႃႈၼၼ်ႉ ပႆႇၸၢင်ႈဝႃႈၼႆ ၸဝ်ႈၶူး ဢိၼ်ႇတသီရိ သိုပ်ႇလၢတ်ႈၼင်ႇၼႆ –

“လုၵ်ႈသိတ်ႇ တီႈတိူၵ်ႈသွၼ်လိၵ်ႈၼႆႉ တေမီးၸဵမ်ၵူၼ်းႁိူၼ်းလႄႈ သင်ၶၸဝ်ႈ၊ လၢမ်းၶၢတ်ႈဝႆႉတႄႉ သင်ၶၸဝ်ႈ တေမႃးမွၵ်ႈ 50 ပႃး၊ ၵူၼ်းႁိူၼ်းၼႆႉ တေမီးမွၵ်ႈ 150 ၵေႃႉၼႆႉ။ သမ်ႉတေတုမ်ႉၵၼ်တင်း ပွႆးလူႇတၢၼ်းသၢင်ႇၵၢၼ်း (ၵထိၼ်) ၸိူဝ်းၼႆႉလႄႈ ၵမ်ႈၽွင်ႈ တေပဵၼ်မႃးႁိုဝ် ဢမ်ႇပဵၼ်မႃးတႄႉ ဢမ်ႇၸၢင်ႈလၢမ်းလႆႈ။ လုၵ်ႈသိတ်ႇတိူၵ်ႈသွၼ်လိၵ်ႈတီႈၼႆႉ မိူဝ်ႈႁဵၼ်းလိၵ်ႈသမ်ႉ တိုၵ်ႉပဵၼ်သင်ၶရ ႁၢၼ်းသေတႃႉ ဝၢႆးႁဵၼ်းလိၵ်ႈယဝ်ႉ ထွတ်ႇၽႃႈလိူင်သေ လႅၵ်ႈပဵၼ်ၶူဝ်းၵူၼ်းႁိူၼ်းၵႂႃႇၵေႃႈမီး။ ၸိူဝ်းၶဝ်ၵေႃႈ ႁဝ်းမၵ်းမၼ်ႈပဵၼ်လုၵ်ႈႁဵၼ်းလုၵ်ႈသိတ်ႇ ယူႇတႃႇသေႇ ဢမ်ႇလူင်ဢမ်ႇလိုမ်းၵၼ်ၼၼ်ႉၶႃႈ ၼႃႇၼေႃႈ”- ဝႃႈၼႆ။

ၶပ်းမၢႆ ၼႂ်းပၢင်ၵႅဝ်ႈၼႆႉ ပွတ်းၼႂ် တေမီးပၢင်ႁူပ်ႉထူပ်းဢုပ်ႇဢူဝ်းသင်ၶၸဝ်ႈ။ တေမီးပႃးပၢင်လိူၵ်ႈ သင်ၶၸဝ်ႈ ၼင်ႈၵျွင်း ဝႃႈၼႆလူးၵွၼ်ႇ။ ပွတ်းဝၼ်း တေမီးပၢင်တၢၼ်ႈၶႆႈ။ ၽူႈတၢၼ်ႈၶႆႈ ၼႂ်းဝၼ်းတီႈ 31/10/2024 ၼႆႉ ပဵၼ်ၸဝ်ႈပိုၼ်ၶမ်း ၽယၵ်ႉဝူင်း၊ ဝၼ်းတီႈ 01/11/2024 သမ်ႉ ပဵၼ်ၸဝ်ႈၶူး သီႇရိ ထမ်ႇမ ဝဵင်းဢိၼ်း တေမႃးတၢၼ်ႈၶႆႈ။ ဝၼ်းတီႈ 02/11/2024 ၼႆႉ မႅၼ်ႈဝၼ်းၵေႃႇတင်ႈတိူၵ်ႈသွၼ်လိၵ်ႈ (တူၵ်းမႅၼ်ႈလိူၼ်သိပ်းသွင်မႂ်ႇသွင်ၶမ်ႈ) တေပိုတ်ႇပႃး ဢၽိထၸဢႃ​​ၸေယျပုတ်ႉထ ​​ၶေႃးလဵၵ်ႉသေ ယၢတ်ႇၼမ်ႉၶွမ်ႈတဝ်ႈ ၵႂႃႇၼႂ်းဝၼ်းၼၼ်ႉ ဝႃႈၼႆ။

တႃႇတေပဵၼ်မႃး ပုတ်ႉထၶေႃးလဵၵ်ႉၼႆႉ သင်ၶၸဝ်ႈ ၾၢႆႇမိူင်းၾၢႆႇတႆး တီႈၵဵင်းတုင် လႆႈမိူဝ်းလဵပ်ႈႁဵၼ်း ဢဝ်ၶေႃႈလႆႈ ၸႂ်ၵၼ်တၢင်းပုတ်ႉထၶေႃးလဵၵ်ႉတူၼ်ႈတီး မိူဝ်ႈ 2 ပီပူၼ်ႉမႃး။ ပိုတ်ႇၽုၺ်ႇသေ ႁႂ်ႈၵိုင်ႉၵၢင်ႉတဵမ်ထူၼ်ႈ ၵမ်းလဵဝ်တႄႉ ပႆႇမီး၊ တၵ်းလႆႈထွၼ်ထႅမ် မူၼ်ႉမႄးၵႂႃႇလွႆးလွႆး။ ၸဵမ်ဢဝ်တၢင်းႁူႉ ၾၢႆႇသႃသၼႃ၊ တၢင်းႁူႉၾၢႆႇၾိင်ႈငႄႈၾိင်ႈထုင်း ပွတ်းဢွၵ်ႇၶူင်း ပေႃးတေႁိူင်းၼၼ်ႉ တေၸတ်းၵႂႃႇ။

ၼင်ႇႁိုဝ် တေပဵၼ်ဢွင်ႈတီႈဢၼ်ႁၵ်ႉသႃ လိၵ်ႈလူင်လိၵ်ႈထမ်းလႄႈ ၾိင်ႈႁွင်ႉၵႂၢမ်းသိူၼ်၊ သေႃး၊ မၢတ်ႈ ပီႈၼွင်ႉၵဵင်းတုင် ၸိူဝ်းၼႆႉၼၼ်ႉ တေၶိုင်ပွင်ၵႂႃႇပဵၼ်ၶၵ်ႉပဵၼ်တွၼ်ႈယူႇၼႆ ၸဝ်ႈၶူး ဢိၼ်ႇတသီရိ တိူၵ်ႈသွၼ်လိၵ်ႈထမ်ႇမေႃးတယလၢတ်ႈ။