ၼၢင်းယိင်းၼႂ်းလုမ်ႈၾႃႉပတ်းပိုၼ်ႉ ႁူမ်ႈပႃးမိူင်းမၢၼ်ႈ ၸိူဝ်းလႆႈၶၢမ်ႇတၢမ်ႇသိုၵ်း မီး 600 လၢၼ်ႉပၢႆ ၸၢတ်ႈၸိုင်ႈလုမ်ႈၾႃႈလၢတ်ႈ (UN) ဝႃႈ ၼႂ်းၶၢဝ်းတၢင်း 10 ပီၼႆႉ ၼမ်ၶိုၼ်ႈမႃး 50% – ဝႃႈၼႆ။

ၵဵဝ်ႇလူၺ်ႈ ပၼ်ႁႃလွင်ႈယိပ်းၵွင်ႈၵၢင်ႇလႄႈ လွင်ႈၵေႃႇၵၢၼ်ႁၢႆႉ ၸိူဝ်းၼႆႉ ၼမ်ၶိုၼ်ႈမႃးသေ လွင်ႈႁုၼ်ႈမုၼ်းၶိုၼ်ႈယႂ်ႇ ၼၢင်းယိင်း ဢၼ်လႆႈမႃးၼႂ်းၶၢဝ်းတၢင်း 10 ပီၼၼ်ႉၵေႃႈ ၺႃးလွၵ်ႇငိုတ်ႈဝႆႉ – ၽူႈၵုမ်းၸီႉသင်ႇ ၸုမ်းၸၢတ်ႈၸိုင်ႈလုမ်ႈၾႃႉ Antonio Guterres လၢတ်ႈဝႆႉၼႂ်းၽိုၼ်လိၵ်ႈႁၢႆငၢၼ်း ၼင်ႇၼႆ။

မိူၼ်ၼင်ႇ သုၼ်ႇလႆႈတႅပ်းတတ်းႁဵတ်းသၢင်ႈ ၼႂ်းၵၢၼ်ၾၢႆႇႁူမ်ႇလူမ်ႈလႄႈ ၾၢႆႇငမ်းယဵၼ် ၼၼ်ႉၵေႃႈ တိုၵ်ႉမီးဝႆႉယူႇ တီႈၼႂ်းမိုဝ်းၵူၼ်းၸၢႆး ၵမ်ႈၼမ် – ၼႆယဝ်ႉ။

ၼၢင်းယိင်း ၸိူဝ်းလႆႈလူႉတၢႆၵႂႃႇ ၼႂ်းၵႄႈပၼ်ႁႃပတိၵ်ႈၶၢတ်ႈ ယိပ်းၵွင်ႈၵၢင်ႇ ၼႂ်းပီ 2023 ၼႆႉ ၼမ်လိူဝ်သေ မိူဝ်ႈပီပူၼ်ႉမႃးၼၼ်ႉ 2 ပုၼ်ႈ။ လိူဝ်ၼၼ်ႉ လွင်ႈၵေႃႇၵၢၼ်ႁၢႆႉ ပူၼ်ႉပႅၼ်တၢင်းၵႃႇမၵေႃႈ ၼမ်ၶိုၼ်ႈမႃး 50 % ၸၢတ်ႈၸိုင်ႈလုမ်ႈၾႃႉ ႁၢႆးငၢၼ်းဝႆႉၼင်ႇၼႆ။

မိူင်းမၢၼ်ႈ ဢၼ်ပၼ်ႁႃပတိၵ်ႈၶၢတ်ႈ ယိပ်းၶိူင်ႈၵွင်ႈၵၢင်ႇ ၼမ်ၶိုၼ်ႈမႃးယူႇၵူႈဝၼ်းၼႆႉ လွင်ႈမုင်ႈမွင်း ၼၢင်းယိင်းၶဝ် ၵေႃႈ လႆႈၸူမ်ႁၢႆၵႂႃႇၼႆ ၽူႈမီးၸၼ်ႉၾၢႆႇသုၼ်ႇလႆႈၽဵင်ႇပဵင်း ၼၢင်းယိင်း ၸုမ်းၸၢတ်ႈၸိုင်ႈလုမ်ႈၾႃႉ Sima Hahous လၢတ်ႈၵႂႃႇၼႂ်းပၢင်ၵုမ် ၶွင်ႇသီႇ ၾၢႆႇႁူမ်ႇလူမ်ႈၸၢတ်ႈၸိုင်ႈလုမ်ႈၾႃႉ ၼင်ႇၼႆ။

ဢၢင်ႈဢိင် – VOA