ႁွင်ႈၵၢၼ်ၾၢႆႇပလိၵ်ႈ လူင်ပွင်ၸိုင်ႈမိူင်းထႆး ၸတ်းပၢင်သပ်းၸႅင်ႈၶၢဝ်ႇ တေႁူမ်ႈၵၼ် ၵူတ်ႇထတ်း တီႉၺွပ်းၵူၼ်းတၢင်ႇမိူင်း ၸိူဝ်းယိပ်းဝတ်းဝႂ်မၢႆၾၢင်ထႆး ဢၼ်ပွမ်သေ ႁဵတ်းၵၢၼ်ၵႃႉၶၢႆၼႂ်းမိူင်းထႆး ထိုင်တီႈပဵၼ်ၽူႈမၢၵ်ႈၵူၼ်းမီး။ တႃႇပၼ်တူတ်ႈတၢမ်ႇဝႃႈၼႆ။
ဝၼ်းတီႈ 21/06/2018 ႁွင်ႈၵၢၼ်ၾၢႆႇပလိၵ်ႈ လူင်ပွင်ၸိုင်ႈမိူင်းထႆး ၸတ်းပၢင်သပ်းၸႅင်ႈၶၢဝ်ႇ ၵဵဝ်ႇလူၺ်ႈလွင်ႈ ၵူၼ်းတၢင်ႇမိူင်း (ၵမ်ႈၼမ်ပဵၼ်ၶႄႇ ) ႁဵတ်းဝႂ်လၵ်းထၢၼ်သၢၵ်ႈသေႇဢၼ်ပွမ် ႁဵတ်းဝႂ်ၵပ်းတူဝ်(မၢႆၾၢင်)ထႆး ။ ၸဝ်ႈ ၼႃႈတီႈပလိၵ်ႈထႆးလၢတ်ႈဝႃႈ – “ မိူဝ်ႈမႃးတႄႉဢမ်ႇမီးသင် ပႆတၢင်းမႃးၵူၺ်း ဝၢႆးလိုၼ်းမႃး ႁႃတိုဝ်ႉတၢင်းႁဵတ်းဝႂ်ထႆး ၸၢင်ႈပိူၼ်ႈပဵၼ်ပေႃႈမႄႈ၊ တႅၼ်းဝတ်းၵူၼ်းတၢႆၸိူဝ်းၼႆႉ ႁဵတ်းဝႂ်ထႆး ပေႃးလႆႈဝႂ်ထႆးယဝ်ႉ ႁဵတ်းၵၢၼ်ပၢႆးမၢၵ်ႈမီး ၵၢၼ်ၵႃႉၶၢႆ ၊ ၵၢၼ်ႁူင်းသဝ်း ၊ ၵၢၼ်ဢွၼ်ၵူၼ်းဢႅဝ်ႇမိူင်းၸိူဝ်းၼႆႉသေ ပဵၼ်သထေးငိုၼ်းႁူဝ်ပၢၵ်ႇလၢၼ်ႉ ” ။
သိုပ်ႇၼႆႉၵႂႃႇ တၢင်းၾၢႆႇၸဝ်ႈၼႃႈတီႈတေၵူတ်ႇထတ်း ၵူၼ်းၸိူဝ်းဢၼ်ဢမ်ႇၸႂ်ႈၵူၼ်းထႆးတႄႉတႄႉ ယိပ်းမၢႆၾၢင်ထႆးၼၼ်ႉ တေယိုတ်းၶိုၼ်းဝႂ်ထႆးယိုတ်းဢဝ် ၶူဝ်းၶွင်ငိုၼ်းၶမ်းတင်းမူတ်း ႁူမ်ႈပႃးတေဢဝ်ၽိတ်းၵူၼ်းၸိူဝ်းဢၼ် ၵဵဝ်ႇၶွင်ႈ ႁပ်ႉႁွင်းပၼ်တႃႇလႆႈဝႂ်ထႆးၸိူဝ်းၼႆႉ တေပၼ်တူတ်ႈတၢမ်ႇၸွမ်းၼင်ႇမၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
တီႈမိူင်းထႆးၼႆႉ မီးၵူၼ်းတၢင်ႇဝၢၼ်ႈတၢင်ႇမိူင်းယူႇသဝ်းၵိၼ်သၢင်ႈ ႁႃၵိၼ်လဵင်ႉတွင်ႉတင်းၼမ်တင်းလၢႆ ၼင်ႇႁိုဝ်တေဢမ်ႇတုမ်ႉတိူဝ်ႉၼႃႈၵၢၼ်ၵူၼ်းထႆးၼႆသေ ၸဝ်ႈၼႃႈတီႈ တေႁူမ်ႈၵၼ်လၢႆၾၢႆႇ လူင်းၵူတ်ႇထတ်းႁၢဝ်ႈႁႅင်း တေယိုတ်းၶိုၼ်းဝႂ်ထႆး ၵူၼ်းၸိူဝ်းဢမ်ႇၸႂ်ႈထႆးတႄႉသေ လၵ်ႉလွမ်ႁဵတ်းဝတ်းထႆးၼၼ်ႉ။ လိူဝ်ၼၼ်ႉပလိၵ်ႈထႆး မီးၽႅၼ်ၵၢၼ် တေၵူတ်ႇထတ်းတီႉၺွပ်းႁႅင်းၵၢၼ်ယၢၼ်မိူင်းႁၢဝ်ႈႁႅင်း ဝႃႈၼႆ။
