ပီၼႆႉ မႄႈၼမ်ႉဢိၼ်း လုပ်ႇထူမ်ႈၼႂ်းဝၢၼ်ႈသၢႆး – မိူင်းဢိၼ်း ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းၼႆႉ ဢမ်ႇယွမ်း 4 ပွၵ်ႈယဝ်ႉ လုပ်ႇထူမ်ႈႁိူၼ်းယေး 41 လင် တိူၵ်ႇႁႆႈသူၼ်ၼႃး လူႉသုမ်းၼပ်ႉႁူဝ်ႁဵင်ဢေႊၶိူဝ်ႊ။

ၵူၼ်းပိုၼ်ႉတီႈ ဝၢၼ်ႈသၢႆး – မိူင်းဢိၼ်း လၢတ်ႈတီႈၽူႈတွႆႇႁွၵ်ႈဝႃႈ – “တူင်ႈႁႆႈၼႃး ႁဝ်းၶႃႈ ပီၼႆႉ လူႉယႂ်ႇသုမ်းၼမ် ဢေႃႈ။ သၢႆးမႃးလုပ်ႇထူမ်ႈ တူင်ႈႁႆႈၼႃးတင်းၼမ်တင်းလၢႆယဝ်ႉ။ ၼႂ်းတူင်ႈၼႃး ၸိူဝ်းၼႆႉ ပေႃးပဵၼ်ၵုၼ်သၢႆးၵႂႃႇပႅတ်ႈ ၸိူင်ႉၼၼ်ၶႃႈဢေႃႈ။ ၶဝ်ႈၼႃး ဢၼ်တႃႇတေလႆႈၵိၼ် ပီၼႃႈၼႆႉ တေၵုမ်ႇတႃႇ 5-6 လိူၼ် ၵူၺ်းယဝ်ႉ”- ဝႃႈၼႆ။

ဢၼ်ၼမ်ႉလုပ်ႇထူမ်ႈ ႁိူၼ်းယေး သူၼ်ႁႆႈၼႃး ၵူၼ်းဝၢၼ်ႈသၢႆး – မိူင်းဢိၼ်းၼႆႉ တႄႇပဵၼ်မႃး မိူဝ်ႈႁူဝ်လိူၼ်သႅပ်ႊထႅမ်ႊပိူဝ်ႊၼၼ်ႉသေ ႁၢၼ်ႉတေႃႇထိုင်ယၢမ်းလဵဝ် မၢင်ပိုၼ်ႉတီႈ ၼမ်ႉယင်းပႆႇယွမ်းလူင်းမူတ်း။ တီႈဝၢၼ်ႈသၢႆးၼႆႉ လင် ႁိူၼ်းမီး 60 လင်ပၢႆ ဢၼ်ၺႃးၼမ်ႉလုပ်ႇထူမ်ႈသမ်ႉ မီး 41 လင်။

ၸၢႆးထုၼ်းလႅင်း ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၵွပ်ႈၼႃး ၵူၼ်းဝၢၼ်ႈ ယူႇၸမ်ၾင်ႇၼမ်ႉဢိၼ်းလႄႈ သၢႆး/ မၢၵ်ႇႁိၼ် ၸိူဝ်းၼႆႉ လႆထူမ်ႈၼႂ်းၼႃးၶဝ် တူၼ်ႈၶဝ်ႈပေႃး ဢမ်ႇမီးယဝ်ႉ တေဢမ်ႇၸၢင်ႈႁဵတ်းၵိၼ်ယဝ်ႉ တႃႇ 2-3 ပီတႄႉ”- ဝႃႈၼႆ။

ၼိုင်ႈပီၼႆႉ ပေႃးၽတ်ႉၽဵင်ႇၵၼ်ၸိုင် ၼိုင်ႈႁိူၼ်းလႂ် တေလႆႈၶဝ်ႈၼႃး 150 ထူင်။ ၼိုင်ႈထူင်လႂ် တေမႅၼ်ႈငိုၼ်းမၢၼ်ႈ 4 မိုၼ်ႇပျႃး တေႃႇပီ တေလႆႈငိုၼ်း 50 – 60 သႅၼ်ပျႃး – ၵူၼ်းပိုၼ်ႉတီႈလၢတ်ႈ။

ၵူၼ်းၵဵင်းတုင် ဢၼ်ၵႂႃႇၸွႆႈထႅမ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်ၼႆႉ ၼမ်ႉၵေႃႈ တိုၵ်ႉၼွင်းယူႇ ၵူၼ်းဝၢၼ်ႈၵေႃႈ ဢမ်ႇၸၢင်ႈႁဵတ်းႁိုဝ်။ ယၢပ်ႇၽိုတ်ႇႁၢဝ်ႈႁႅင်းဢေႃႈ။ တႃႇၵိၼ်ယႅမ်ႉၵေႃႈ ယင်းၶႂ်ႈယၢပ်ႇယဝ်ႉ။ တႃႇတေမႄးႁိူၼ်း ၼိုင်ႈၶႅၼ်းယၢပ်ႇ။ တူင်ႈၼႃးၵေႃႈ ၺႃးသၢႆးထူမ်ႈပႅတ်ႈသေ တႃႇတေၽုၵ်ႇသွမ်ႈၵေႃႈ ယၢပ်ႇၽိုတ်ႇယဝ်ႉ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 14/10/2024 ၼႆႉ ယူႇတီႈ သင်ၶၸဝ်ႈလႄႈ ၵူၼ်းဝဵင်းၵဵင်းတုင် ႁူမ်ႈၵၼ် ၵႂႃႇၸွႆႈၵမ်ႉထႅမ်ပၼ် ၼမ်ႉမီႇၼမ်ႉမၼ်းၶဝ်ႈသၢၼ်ႇ ၸိူဝ်းၼႆႉ ဝႃႈၼႆ။