ၼႂ်းလိူၼ်သႅပ်ႊထႅမ်ႊပိူဝ်ႊပူၼ်ႉမႃးၼႆႉ ၽူႈသူင်ႁၵ်ႉၾၢႆႇဢၢႆႊထီႊတႆး PL Developer လႆႈၶူင်သၢင်ႈႁဵတ်းဢွၵ်ႇမႃး ဢႅပ်ႊပလီႊၶေႊသျိၼ်ႊ (Applications) ပၵ်းယဵမ်ႈဝၼ်းတႆး တႃႇလူတူၺ်းၼႂ်းၾူၼ်း ႁႂ်ႈပေႃးငၢႆႈလူမ်ၸႂ် ၼႆယဝ်ႉ။

ဢႅပ်ႊပလီႊၶေႊသျိၼ်ႊ ပၵ်းယဵမ်ႈဝၼ်းတႆးၼႆႉ တႄႇၸႂ်ႉတိုဝ်းလႆႈၼႂ်းၾူၼ်း သႅၼ်းဢႅၼ်ႊတရွႆႊ (Android) မိူဝ်ႈဝၼ်းတီႈ 08/09/2024 ၼၼ်ႉမႃး၊ တႃႇသႅၼ်းဢၢႆႊၾူၼ်ႊ IOS သမ်ႉ တႄႇၸႂ်ႉတိုဝ်းမႃး မိူဝ်ႈဝၼ်းတီႈ 27/09/2024 ၼၼ်ႉ ယၢမ်းလဵဝ် ၸိုဝ်ႈဢႅပ်ႊပလီႊၶေႊသျိၼ်ႊၼၼ်ႉ တၢင်ႇဝႆႉဝႃႈ (Tai Calendar) သေ လူတ်ႇဢဝ်လႆႈၼႂ်း Play Store လႄႈ App Store လႆႈယဝ်ႉ။

ၽူႈလဵပ်ႈႁဵၼ်း ၾၢႆႇဢၢႆႊထီႊတႆး PL Developer ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “တၢင်းယိူင်းဢၢၼ်းတႄႉ ၵၢပ်ႈယၢမ်းလဵဝ် ပဵၼ်ပၢၼ်ဢၢႆႊထီႊ IT ယဝ်ႉလႄႈ လွင်ႈလႂ်ၵေႃႈ လူဝ်ႇၶိုတ်းၸၼ်ႉ။ ပၵ်းယဵမ်ႈဝၼ်းၼႆႉ ၵူၼ်းတႆးႁဝ်း ၵုမ်ႇလႆႈတူၺ်းၼႂ်းမၢင်ၸေႈၵူၺ်းတႄႉ ပွင်ႇဝႃႈ ႁဝ်းပႆႇလမ်းၶိုတ်း ပၢၼ် IT ။ ႁဝ်းပႆႇယူႇမႅၼ်ႈ ၸွမ်းငဝ်းလၢႆးၵၢပ်ႈပၢၼ်ယၢမ်းလဵဝ်။ ယွၼ်ႉၼၼ်လႄႈ ၸင်ႇၶူင်ႁဵတ်းဢွၵ်ႇ မႃး ဢႅပ်ႊပလီႊၶေႊသျိၼ်ႊ ပၵ်းယဵမ်ႈဝၼ်းတႆး ၼႆယဝ်ႉ”- ဝႃႈၼႆ။

ၽွၼ်းလီ ဢၼ်လႆႈၸႂ်ႉ ပၵ်းယဵမ်ႈဝၼ်းတႆး ၼႂ်းၾူၼ်းၼႆႉ တေမီးဝႆႉယူႇ လၢႆလွင်ႈ မိူၼ်ၼင်ႇ – တေဢမ်ႇလႆႈသဵင်ႈ ၵႃႈၸႂ်ႉၸၢႆႇသင်သေပျႃး၊ ၶဝ်ႈတူၺ်းဝၼ်း၊ လိူၼ်၊ ပီ လႆႈငၢႆႈငၢႆႈ ။ သင်ဝႃႈ သိုဝ်ႉပပ်ႉပၵ်းယဵမ်ႈဝၼ်း ဢၼ်ဢဝ်ၸေႈ ႁဵတ်းဝႆႉၼၼ်ႉ ပေႃးမၼ်းသဵင်ႈပီ ဢမ်ႇၼၼ် ဢႃယုမူတ်းယဝ်ႉၸိုင် လႆႈႁႃတီႈပႅတ်ႈသေ တေပဵၼ်ယုၵ်းယၢၵ်းႁၢႆႉၸႃႉတေႃႇသိင်ႇဝႅတ်ႉလွမ်ႉထႅင်ႈ – ၽူႈလဵပ်ႈႁဵၼ်း ဢၢႆႊထီႊတႆးလၢတ်ႈ။

“ၽွၼ်းလီမၼ်းမီးထႅင်ႈ မိူၼ်ၼင်ႇဝႃႈ ပေႃးမီးၼႂ်းပပ်ႉမၢင်ၸေႈတႄႉၸိုင် မၼ်းသိမ်းဝႆႉၵေႃႈၸၢင်ႈႁၢႆ ဢမ်ႇတူၺ်းလႆႈတႃႇသေႇ။ သင်ဝႃႈ မီးဢႅပ်ႊ(App) ၼႂ်းၾူၼ်းဝႆႉယဝ်ႉတႄႉ ၶႂ်ႈတူၺ်းမိူဝ်ႈလႂ်ၵေႃႈလႆႈ။ ပီလိူၼ်တႆးႁဝ်းၼႆႉ တူၺ်းႁူၼ်လင်ၶိုၼ်း10 ပီ 50 ပီ ၵေႃႈလႆႈထႅင်ႈလူးၵွၼ်ႇ”- ဝႃႈၼႆ။

ၵၢၼ်ႁဵတ်းဢွၵ်ႇမႃး ပၵ်းယဵမ်ႈဝၼ်းတႆး ဢၼ်ၸႂ်ႉတိုဝ်း တူၺ်းလႆႈၼႂ်းၾူၼ်းၼႆႉ မီးလွင်ႈယၢပ်ႇၽိုတ်ႇဝႆႉယူႇ ယွၼ်ႉဝႃႈ ဢမ်ႇမီးတီႈဢၢင်ႈဢိင်ပၵ်းယဵမ်ႈဝၼ်းတႄႉတႄႉ။ ဢၼ်ႁဵတ်းဝႆႉယူႇၼႆႉ လႆႈဢိင်မႃး တီႈပၵ်းယဵမ်ႈဝၼ်းမၢၼ်ႈ။ ၵမ်ႈၽွင်ႈၵေႃႈဝႃႈ လၢႆးတူၺ်းပၵ်းယဵမ်ႈဝၼ်း ပွတ်းတၢင်းတႆးၼိူဝ် – တႆးမၢဝ်း မီးဝႆႉယူႇ ဝႃႈၼႆၵေႃႈမီး။ ၵူၺ်းၵႃႈ ပႆႇႁၼ်တီႈ ဢၼ်မီးဝႆႉ တီႈဢၢင်ႈဢိင်တႅတ်ႈတေႃးလႄႈ လႆႈၸႂ်ႉဝႆႉ ၶေႃႈမုလ်း ဢၼ်ၵူၼ်းတင်းၼမ် ၸႂ်ႉဝႆႉၼၼ်ႉၵူၺ်းယဝ်ႉ – ၽူႈလဵပ်ႈႁဵၼ်း ဢၢႆႊထီႊတႆးလၢတ်ႈ။

ဢႅပ်ႊပလီႊၶေႊသျိၼ်ႊ ပၵ်းယဵမ်ႈဝၼ်းတႆးၼႆႉ မိူဝ်ႈဢွၼ်တၢင်းၵေႃႈ မီးလၢႆမူႇၸုမ်း ႁဵတ်းဢွၵ်ႇမႃး ယဝ်ႉသေတႃႉ ပႆႇ ၸႂ်ႉလႆႈၼႂ်းဢၢႆႊၾူၼ်း (iphone) ။ ဢႅပ်ႊ (Tai Calendar) ပွၵ်ႈၵမ်းၼႆႉတႄႉ ၸႂ်ႉလႆႈ ၼႂ်းၾူၼ်း သႅၼ်း OIS – Android လႆႈၵူႈဢၼ် ဝႃႈၼႆ။