ၸုမ်းတူင်ႇဝူင်းတႆး ၼႂ်းၵဵင်းမႂ်ႇ လၢႆမူႇၸုမ်း လူင်းပိုၼ်ႉတီႈ ၸွႆႈထႅမ်ၵူၼ်းထူပ်းၽေးၼမ်ႉထူမ်ႈ တီႈပီႈၼွင်ႉ ၸၢဝ်းထႆး – ႁႅင်းၵၢၼ်တႆး ၼႂ်းၸႄႈတွၼ်ႈၵဵင်းမႂ်ႇ လၢႆပိုၼ်ႉတီႈ။

ဝၼ်းတီႈ 07/10/2024 ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး ၵဵင်းမႂ်ႇ တင်း ၸုမ်းလုၵ်ႈလၢၼ် ဝတ်ႉၵူႇတဝ်ႈ ႁဵတ်းၶဝ်ႈၵွင်ႇ 450 ၵွင်ႇ ႁူမ်ႈလူၺ်ႈ ၼမ်ႉၵိၼ် ၶွင် ၵိၼ်ႁႅင်ႈသေ လူင်းပိုၼ်ႉတီႈ ၸွႆႈထႅမ်ၵူၼ်းထူပ်းၽေးၼမ်ႉထူမ်ႈ တၢင်းမူႇဝၢၼ်ႈသၼ်ပႃႇၶွႆႇ၊ ၵၢတ်ႇမိူင်းမႂ်ႇ၊ ဝၢၼ်ႈပႃႇၽႅင်ႉလႄႈ ဝၢၼ်ႈၵူႇတဝ်ႈ ၼႂ်းဝဵင်းၵဵင်းမႂ်ႇ ၸိုင်ႈထႆး။  

ၽူႈၶဝ်ႈၸုမ်း လုၵ်ႈလၢၼ်ဝတ်ႉၵူႇတဝ်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃး ဝၼ်းတီႈ 7 ယၢမ်းၵၢင်ၼႂ် ႁဝ်းၶႃႈ ႁဵတ်းၶဝ်ႈ ၵွင်ႇ 200 ၵွင်ႇ လူင်းပိုၼ်ႉတီႈ ၵႂႃႇၸွႆႈၼႂ်းမူႇဝၢၼ်ႈၵူႇတဝ်ႈ။ ယၢမ်းႁူဝ်ၶမ်ႈ ႁဵတ်းၶဝ်ႈၵွင်ႇ 250 ၵွင်ႇ လူင်းၵႂႃႇၸွႆႈတၢင်း ၵၢတ်ႇမိူင်းမႂ်ႇ၊ သၼ်ပႃႇၶွႆႇ၊ ပႃႇၽႅင်ႉ ၸိူဝ်းၼႆႉ။ ဢၼ်ၵႂႃႇၸွႆႈၼႆႉ ဢမ်ႇဝႃႈၵူၼ်းထႆး၊ ၵူၼ်းမိူင်း၊ ၵူၼ်းတႆး ၸွႆႈမူတ်းၶႃႈ။ ယဝ်ႉၵေႃႈ ၸွႆႈပႃးၶွင်ၵိၼ်ႁႅင်ႈထႅင်ႈ”- ဝႃႈၼႆ။

သိုပ်ႇလၢတ်ႈဝႃႈ – “ဢၼ်ၵႂႃႇၸွႆႈၼႆႉ ၸိူဝ်းပိုၼ်ႉတီႈၼမ်ႉထူမ်ႈႁၢဝ်ႈႁႅင်း မၢင်တီႈ ၼမ်ႉတိုၵ်ႉထူမ်ႈပဵင်းႁူဝ် ၶဝ်ႇ ၶႃလူင်ယူႇ။ ယဝ်ႉၵေႃႈ ၵူၼ်းထူပ်းၽေးၼမ်ႉ မၢင်ၸိူဝ်း ဢမ်ႇလႆႈၵိၼ်ၶဝ်ႈမႃး ဝၼ်းသွင်ဝၼ်းၵေႃႈ မီး။ ယွၼ်ႉၼမ်ႉလိုၵ်ႉၼမ်ႉၸႅဝ်ႈလႄႈ ႁိူဝ်းဢမ်ႇၸၢင်ႈၶဝ်ႈ ၸွႆႈသူင်ႇပၼ် ၶဝ်ႈၼမ်ႉတၢင်းၵိၼ်၊ မၢင်ၸိူဝ်း ယူႇၼႂ်းၵိဝ်ႇ(သွႆး)လိုၵ်ႉ ၼမ်ႉထူမ်ႈႁႅင်းသေ ဢမ်ႇၸၢင်ႈပႆဢွၵ်ႇမႃးဢဝ်ၶဝ်ႈတီႈပိူၼ်ႈၸႅၵ်ႇ ၸိူဝ်းၼႆႉ မီးၼမ်။ မိူဝ်ႈၼႆႉ ယၢမ်းႁူဝ်ၶမ်ႈ ႁဝ်းၶႃႈ တေႁၢင်ႈ ႁႅၼ်း လူင်းပိုၼ်ႉတီႈထႅင်ႈၶႃႈ”- ဝႃႈၼႆ။

ဢိင်ၼိူဝ် လွင်ႈၼမ်ႉထူမ်ႈၼႆႉသေ မၢင်ပိုၼ်ႉတီႈၵေႃႈ ၼမ်ႉတိုၵ်ႉထူမ်ႈယူႇ ယင်းပႆႇႁႅင်ႈ၊ မၢင်တီႈ ၼမ်ႉ လူတ်းယွမ်းလူင်းယဝ်ႉသေတႃႉ ၶီႈၵူမ်ႇၶီႈငႂ်ႈ တိုၵ်ႉၵိုတ်းၶမ်ဝႆႉၵေႃႈ မီးထႅင်ႈတင်းၼမ်။ ယၢမ်းလဵဝ် ၼမ်ႉတႃႇၸႂ်ႉ ၶၢတ်ႇဝႆႉလၢႆပိုၼ်ႉတီႈလႄႈ တႃႇတေသုၵ်ႈလၢင်ႉပတ်းၽဵဝ်ႈႁွင်ႈသဝ်းႁိူၼ်းယေး တီႈယူႇၸိူဝ်းၼႆႉ ယင်းတိုၵ်ႉယၢပ်ႇၽိုတ်ႇဝႆႉ ဝႃႈၼႆ။

မိူၼ်ၼႆ ၼင်ႇၵဝ်ႇ မိူဝ်ႈၼႆႉ ဝၼ်းတီႈ 8 ယၢမ်းၵၢင်ၼႂ် ယူႇတီႈ ပီႈၼွင်ႉတႆး ဝၢၼ်ႈမႂ်ႇတႆး မၼ်ႈၵိုမ်း ႁူမ်ႈလူၺ်ႈ ပီႈၼွင်ႉထႆး ၼႂ်းဢိူင်ႇမိူင်ၵႅဝ်ႈ ဝဵင်းမႄႈရိမ်း ႁူမ်ႈၵၼ် လူင်းပိုၼ်ႉတီႈ ၵႂႃႇၸွႆႈထႅမ်ႈ တီႈပၢင်ၸၢင်ႉ ၸႄႈဝဵင်းမႄႈတႅင်လႄႈ လုမ်း ၽူႈၵွၼ်းၸႄႈဝဵင်းမႄႈရိမ်း ၼႆၸိူဝ်းၼႆႉ။

ၸၢႆးႁၢၼ်ၾႃႉ ၽူႈၶဝ်ႈႁူမ်ႈ ၸွႆႈထႅမ် လၢတ်ႈၽူႈတွႆႇႁွၵ်ႈဝႃႈ – “ႁဝ်းၶႃႈ ပီႈၼွင်ႉတႆး – ထႆး လႆႈႁူမ်ႈႁွမ်းငိုၼ်း ၵၼ်သေ ၶဝ်ႈၸွႆႈလိူဝ် တီႈပၢင်ႇၸၢင်ႉမႄႈတႅင် ယွၼ်ႉပိူဝ်ႈဝႃႈ ႁၼ်ၸၢင်ႉ ႁၼ်ပီႈၼွင်ႉတႆးႁဝ်း ဢၼ်ယူႇဝႆႉ ၸိူဝ်းၼၼ်ႉ ၺႃး ၽေးၼမ်ႉသေ ႁိူၼ်းၶဝ်လႆႈလူႉၵွႆၵႂႃႇၼမ်လႄႈ ထူပ်းတၢင်းယၢပ်ႇၽိုတ်ႇႁႅင်း ၵွပ်ႈၼႆ ၸင်ႇလႆႈၵႂႃႇၸွႆႈထႅမ် ယဝ်ႉၵေႃႈ ၵႂႃႇၸွႆႈဝႆႉ တီႈလုမ်းၽူႈၵွၼ်းၸႄႈဝဵင်းမႄႈရိမ်းထႅင်ႈ”- ဝႃႈၼႆ။

ၶွင်ၵိၼ်ယႅမ်ႉ ဢၼ်လႆႈၵႂႃႇၸွႆႈ တၢင်းၸႄႈဝဵင်းမႄႈရိမ်း – မႄႈတႅင်ၼၼ်ႉသမ်ႉ မိူၼ်ၼင်ႇ ၶဝ်ႈသွႆးႁႅင်ႈ (မႃးမႃႉ 25 ၵွင်ႇ)၊ ၶဝ်ႈသၢၼ် 2 ထူင်၊ ၶႆႇၵႆႇ 20 ၵၢပ်ႈ(ၽႅင်)၊ ၼမ်ႉ 130 ၽႅၵ်ႉ ၼႆႉတႄႉ ၸွႆႈဝႆႉတီႈလုမ်းၽူႈၵွၼ်းၸႄႈဝဵင်းမႄႈရိမ်း။ ယဝ်ႉၵေႃႈ ၶဝ်ႈၵွင်ႇ 400 ၵွင်ႇ၊ ဢွႆႈၵႃးၼိုင်ႈလမ်းလႄႈ ၼမ်ႉၵိၼ် 100 ၽႅၵ်ႉ ၼႆႉသမ်ႉ ၵႂႃႇၸွႆႈ တီႈပၢင်ၸၢင်ႉ ဝဵင်းမႄႈတႅင်။

ယဝ်ႉၵေႃႈ မိူဝ်ႈၼႆႉ ဝၼ်းတီႈ 08 ယၢမ်းၵၢင်ၼႂ် ယူႇတီႈ ၸုမ်းပၢႆးမွၼ်းတႆး ဝဵင်းၵဵင်းမႂ်ႇၵေႃႈ ႁူမ်ႈၵၼ် လူင်းပိုၼ်ႉတီႈ ၸွႆႈထႅမ်ၵူၼ်းထူပ်းၽေးၼမ်ႉထူမ်ႈ တၢင်းၸႄႈဝဵင်းသရႃးၾီးလႄႈ ဢိၵ်ႇထႅင်ႈလၢႆလၢႆတီႈ။  

ပေႃးထိုင်မႃး ယၢမ်းႁူဝ်ၶမ်ႈ မိူဝ်ႈၼႆႉ ဝၼ်းတီႈ 8 သမ်ႉ တေယူႇတီႈ ၸုမ်းႁူမ်ႈႁႅင်းသိမ်းပႅင်းၾိင်ႈထုင်းသေ တေႁဵတ်းၶဝ်ႈၵွင်ႇ 400 ၵွင်ႇ ႁူမ်ႈလူၺ်ႈၼမ်ႉၵိၼ် တေလူင်းပိုၼ်ႉတီႈ ၵႂႃႇၸွႆႈထႅမ် တၢင်းၸႄႈဝဵင်းသရႃးၾီး၊ သၼ်ၵမ်ႈၽႅင်း ၸိူဝ်းၼၼ်ႉ ဝႃႈၼႆ။

တႄႇဢဝ် ဝၼ်းတီႈ 05 ၼႆႉမႃး ၼမ်ႉလုပ်ႇထူမ်ႈ ၼႂ်းၸႄႈတွၼ်ႈၵဵင်းမႂ်ႇ ၸိုင်ႈထႆး မႃးႁၢဝ်ႈႁႅင်း ၸွမ်းၼင်ႇ ၶၢဝ်းထႆး ဢွၵ်ႇဝႆႉတႄႉ မိူၼ်ၼင်ႇ တၢင်းၸႄႈဝဵင်းမႄႈတႅင်၊ မႄႈရိမ်း၊ ၵဵင်းမႂ်ႇ၊ ႁၢင်ၻူင်း၊ သရႃၾီး၊ သၼ်ပႃႇတွင်းလႄႈ ဢိၵ်ႇထႅင်ႈလၢႆၸႄႈဝဵင်း ဝႃႈၼႆ။