ၵဵတ်ႉ/ လၢၼ်ႇသိုၵ်းမၢၼ်ႈ တီႈသဵၼ်ႈတၢင်းဢွၵ်ႇဝဵင်းလိူဝ်ႇ 16 လၵ်းၼၼ်ႉ ၵူတ်ႇထတ်းၵႃးလူင်/ ၵႃးတၢင်ႇ ၶူဝ်းၶွင် ဢၼ်ၶိုၼ်ႈမိူင်းတႆးႁၢဝ်ႈႁႅင်း ဝႃႈၼႆ။
သိုၵ်းမၢၼ်ႈ ယိုတ်းမိူင်းႁူမ်ႈတင်း ပလိၵ်ႈမၢၼ်ႈ ဢၢၼ်းတတ်းၶၢတ်ႇၶွင်ၵိၼ်ယႅမ်ႉ ၼႂ်းၼႃႈတီႈ ၸုမ်းသိုၵ်းတဢၢင်း TNLA ၵုမ်းၵမ်ၼႆသေ တီႈသဵၼ်ႈတၢင်းဢွၵ်ႇဝဵင်းလိူဝ်ႇ ၵူတ်ႇထတ်းၵႃးလူင် ဢၼ်တေၶိုၼ်ႈမႃးမိူင်းတႆး မိူၼ်ၼင်ႇ – ဝဵင်းၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ မိူင်းၵုတ်ႈလႄႈ မိူင်းမိတ်ႈ ၸဵမ်ၸိူဝ်းၼႆႉ။
ၸဝ်ႈၵႃး ဢၼ်လႅၼ်ႈတၢင်း ဝဵင်းလိူဝ်ႇ – လႃႈသဵဝ်ႈ ၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ – “ပေႃးတၢင်ႇမႃး ၶွင် ၵိၼ်ယႅမ်ႉ ဢၼ်ႁႅင်ႈလႄႈ ၼမ်ႉမီႇၼမ်ႉမၼ်းၼမ်ၼႆ သိုၵ်းမၢၼ်ႈၵူတ်ႇထတ်းႁၢဝ်ႈႁႅင်း၊ လိူဝ်ၼၼ်ႉ တီႈၵဵတ်ႉ/ လၢၼ်ႇသိုၵ်းမၢၼ်ႈ ၸိူဝ်းၼၼ်ႉ လႆႈပၼ်ငိုၼ်းၼမ်ႁႅင်း ၸင်ႇတေပၼ်လတ်း”- ဝႃႈၼႆ။
မိူၼ်ၼႆ တီႈၵဵတ်ႉ/ လၢၼ်ႇ သိုၵ်းမၢၼ်ႈ ၼႂ်းၵႄႈၼွင်ၶဵဝ် – ပၢင်ႁူႈၵေႃႈ ၸဝ်ႈၵႃးလူင်ၶဝ် ၵူတ်ႇထတ်းႁၢဝ်ႈ ႁႅင်း၊ ႁၢမ်ႈဢိုတ်းပႃး လွင်ႈတေႃႉတၢင်ႇယႃႈယႃလႄႈ ၶွင်ၵိၼ်ယႅမ်ႉၼမ်ႁႅင်း။ တေႃႇထိုင်ယၢမ်းလဵဝ် သဵၼ်ႈတၢင်းလူင် ၼွင်ၶဵဝ်ၼႆႉ ၵူၼ်းမိူင်းပႆႇၸၢင်ႈၵႂႃႇမႃး၊ ၵႃးလူင်ၶဝ် လႆႈလတ်းၵႂႃႇမႃးၸွမ်း ၼႂ်းသူၼ်ဢွႆႈ၊ မၢင်တီႈသမ်ႉ ယွၼ်ႉၾူၼ်တူၵ်းသေ ပဵၼ်ၵူမ်ႇပဵၼ်ဢုင် ၵႃးလူင်ၵႃးဢွၼ်ႇၼပ်ႉပၢၵ်ႇလမ်း ၶမ်ၵိုတ်းဝႆႉၸွမ်းတၢင်း ယၢပ်ႇၽိုတ်ႇၵိၼ်းၸႂ် – ဝႃႈၼႆ။
လိူဝ်ၼၼ်ႉ မိူၼ်ၼင်ႇ ဝဵင်းၵုၼ်လူင်၊ သႅၼ်ဝီလႄႈ ၵူတ်ႉၶၢႆ ၸိူဝ်းၼႆႉၵေႃႈ ၶူဝ်းၶွင်ၵိၼ်ယႅမ်ႉ ၶၼ်ပုင်ႈသုင် မႃးႁႅင်းၼႆယဝ်ႉ။
ဝၢႆးလင် ၽႅၼ်ၵၢၼ်ယၼ်ႇသိုၵ်း 1027 ၸုမ်းဢူၺ်းလီပွတ်းႁွင်ႇ မိူၼ်ၼင်ႇ – သိုၵ်းၵဝ်ႈၵၢင်ႉ MNDAA တင်း သိုၵ်းတ ဢၢင်း TNLA ယိုတ်းၵုမ်းလႆႈဝႆႉ တင်းၼမ်။ ၵူၺ်းၵႃႈ ယွၼ်ႉသိုၵ်းမၢၼ်ႈ ၵႆႉဢဝ်ၶိူင်ႈမိၼ် မႃးပွႆႇမၢၵ်ႇလႄႈ ႁဵတ်းႁႂ်ႈ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ