မေႃႇထၢၼ်ႇႁိၼ် တီႈမိူင်းဢီႊလၢၼ်ႊ ပွတ်းဢွၵ်ႇ တႅၵ်ႇၽူင်ႉလႄႈ မီးၵူၼ်းလူႉတၢႆ 33 ၵေႃႉ မၢတ်ႇၸဵပ်း 17 ၵေႃႉ – ဝႃႈ ၼႆ။

လွင်ႈၼႆႉ ပဵၼ်ၵႂႃႇ မိူဝ်ႈဝၼ်းတီႈ 21/09/2024 ယၢမ်းၵၢင်ၶမ်ႈ ပဵၼ်လွင်ႈတႅၵ်ႇၽူင်ႉ ဢၼ်ႁၢႆႉႁႅင်းသုတ်း လိူဝ်ပိူၼ်ႈ ၼႂ်းပိုၼ်းမိူင်းဢီႊလၢၼ်ႊ။ ဝၢႆးလင် ပဵၼ်လွင်ႈတႅၵ်ႇၽူင်ႉယဝ်ႉ မီးၵူၼ်းႁၢႆလၢႆဝႆႉထႅင်ႈ။

လွင်ႈတႅၵ်ႇၽူင်ႉဢၼ်ၼႆႉ ပဵၼ်ၵႂႃႇတီႈ ဝဵင်း Tabas ဢၼ်မီးၸဵင်ႇၸၢၼ်းဝၼ်းဢွၵ်ႇ၊ ယၢၼ်ၵႆၵၼ်တင်း ဝဵင်းလူင်တႁီႊရႅၼ်ႊ 300 လၵ်းပၢႆ။ ၶၢပ်ႈတူဝ်ၵူၼ်း ၸိူဝ်းလူႉတၢႆ တီႈၼႂ်းမေႃႇထၢၼ်ႇႁိၼ်ၼၼ်ႉ လႆႈဢဝ်လူတ်ႉၾႆး ၸိူဝ်းတေႃႉတၢင်ႇထၢၼ်ႁိၼ်ၼၼ်ႉသေ တေႃႉဢွၵ်ႇမႃး – ဝႃႈၼႆ။

မိူဝ်ႈၽွင်းပဵၼ်လွင်ႈတႅၵ်ႇၽူင်ႉၼၼ်ႉ ၵူၼ်းၸိူဝ်းႁဵတ်းၵၢၼ်ဝႆႉ တီႈၼႂ်းမေႃႇထၢၼ်ႇႁိၼ် မီးဝႆႉမွၵ်ႈ 70 ၵေႃႉ၊ တႃႇ 17 ၵေႃႉသမ်ႉ ၶမ်ဝႆႉယူႇတီႈၼႂ်းမေႃႇထၢၼ်ႇႁိၼ် ဢၼ်တၢင်းလိုၵ်ႉမီး 650 – 2,300 ထတ်း။ ၶၢဝ်ႇၼႂ်းပိုၼ်ႉတီႈ မၢင်ဢၼ် ၵေႃႈ ႁၢႆးငၢၼ်းဝႃႈ ႁူဝ်ၼပ်ႉၵူၼ်းၸိူဝ်းလူႉတၢႆ ၸၢင်ႈမီးၼမ်လိူဝ်ၼႆႉ – ၼႆယဝ်ႉ။

ၾၢႆႇၽူႈမီပုၼ်ႈၽွၼ်းၶဝ် လၢတ်ႈဝႃႈ လွင်ႈတႅၵ်ႇၽူင်ႉၼႆႉ ပဵၼ်ယွၼ်ႉထၢတ်ႈ Methane ၸိုမ်းႁူဝ်ႈၼႆသေ တိုၵ်ႉတႄႇႁဵတ်းသၢင်ႈ လွင်ႈၵူတ်ႇထတ်းဝႆႉယူႇ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။