ၵူၼ်းထူပ်းၽေးၼမ်ႉ တီႈၸႄႈဝဵင်းတၢတ်ႉၵူင်း တိူင်းၼေႇပျီႇတေႃႇ ဢွၼ်ၵၼ်ပဵၼ်မဝ်း တူၼ်ႉႁၢၵ်ႈသေ လႆႈႁၢမ်သူင်ႇ ႁူင်းယႃဝဵင်းတၢတ်ႉၵူင်း ဝႃႈၼႆ။
ဝၼ်းတီႈ 17/09/2024 ယၢမ်းၵၢင်ၶမ်ႈ ၵူၼ်းပၢႆႈၽေးသိုၵ်းၸမ်ပၢၵ်ႇ တီႈဝၢၼ်ႈၶျွင်းၶျႃး ဝဵင်းတၢတ်ႉၵူင်း ဝၢႆးၵိၼ်ယႅမ်ႉတၢင်းၵိၼ် ဢၼ်ၸဝ်ႈတႃႇၼ မႃးၵမ်ႉၸွႆႈယဝ်ႉၼၼ်ႉ ဢွၼ်ၵၼ်ၸပ်းပဵၼ်မဝ်း တူၼ်ႉႁၢၵ်ႈ တွင်ႉႁေႈတွင်ႉၸဵပ်းသေ ထိုင်မႃးယၢမ်းၶမ်ႈ မွၵ်ႈ 7 မူင်း ၸင်ႇလႆႈႁၢမ်ႈသူင်ႇႁူင်းယႃၶၼ်ဝႆး ၼႆယဝ်ႉ။
တီႈႁူင်းယႃတၢတ်ႉၵူင်းသမ်ႉ မႅၼ်ႈၽွင်းတိုၵ်ႉပတ်းၽဵဝ်ႈၵူမ်ႇဢုင် ဝၢႆးၼမ်ႉယွမ်း၊ မေႃယႃ မေႃလုမ်းလႃး ဢမ်ႇၵုမ်ႇထူၼ်ႈလႄႈ လႆႈဢဝ်ၵူၼ်းထူပ်းၽေးၼမ်ႉ ဢၼ်ၸပ်းပဵၼ်မဝ်းတူၼ်ႉႁၢၵ်ႈ ၸိူဝ်းၼၼ်ႉ လႆႈၶၢႆႉ သူင်ႇယူတ်းယႃတူဝ်ဝႆႉ တီႈႁူင်းယႃၼေႇပျီႇတေႃႇ ဢၼ်ၶဝ်ႈၵူႇ 300 လႄႈ ႁူင်းယႃ လုၵ်ႈဢွၼ်ႇ ဢၼ်ၶဝ်ႈၵူႇ 500 ၊ တေႃႇထိုင်ဝၼ်းတီႈ 18 ၼႆႉ တိုၵ်ႉလႆႈၶၢမ်ႇယူတ်းယႃတူဝ်ဝႆႉယူႇ ဝႃႈၼႆ။
ၼႂ်းၼႃႈတီႈ ၼေႇပျီႇတေႃႇၼႆႉ ယွၼ်ႉၼမ်ႉၼွင်းထူမ်ႈသေ ၵူၼ်းမိူင်းၼႂ်းၸႄႈဝဵင်းတၢတ်ႉၵူင်း ဢိင်ႇပႃး ထႅင်ႈ လၢႆပိုၼ်ႉတီႈ လူႉတၢႆ 47 ၵေႃႉ၊ ဢၼ်လႆႈငိူင်ႉပၢႆႈၽေးၼမ်ႉသမ်ႉ မီးဝႆႉ 2 မိုၼ်ႇပၢႆၼႆ သိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇဝႆႉ ၼင်ႇၼႆ။
ဢၢင်ႈဢိင် – RFA
