ၼမ်ႉလုပ်ႇထူမ်ႈထုင်ႉပူင်း တုမ်ႉတိူဝ်ႉတူင်ႈၼႃးလူႉသုမ်း ၼပ်ႉႁူဝ်မိုၼ်ႇဢေႊၶိူဝ်ႊ

ၼမ်ႉလုပ်ႇၼွင်းထူမ်ႈ ထုင်ႉပူင်း ၶၢဝ်းတၢင်း 9 ဝၼ်းယဝ်ႉ ပႆႇယူပ်ႈလူင်း တုမ်ႉတိူဝ်ႉတူင်ႈၼႃး ၵူၼ်းမိူင်း လူႉသုမ်းၼပ်ႉႁူဝ် မိုၼ်ႇဢေႊၶိူဝ်ႊ။

တႄႇဢဝ် ဝၼ်းတီႈ 10-19/09/2024 ၼႆႉ ၼမ်ႉႁူၺ်ႈၼမ်ႉလွႆ လႆၼွင်းထူမ်ႈ ၼႂ်းဢိူင်ႇဝၢၼ်ႈယဵၼ်ႇ၊ ဢိူင်ႇထုင်ႉပူင်း၊ ဢိူင်ႇၼွင်မွၼ် ၼႂ်းၸႄႈဝဵင်းသီႇသႅင်ႇ။ ၼႂ်းဢိူင်ႇၵုင်းၵႅင်း ၼႂ်းၸႄႈဝဵင်းႁူဝ်ပူင်းလႄႈ ၼႂ်းဢိူင်ႇၼမ်ႉၵူတ်ႉ၊ ဢိူင်ႇၼႃး ႁီးလႄႈ ဢိူင်ႇၵၢတ်ႇၵူႇ ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇႁႅင်း ၼႆယဝ်ႉ။

ၵူၼ်းပိုၼ်ႉတီႈ ထုင်ႉပူင်း လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၼမ်ႉထူမ်ႈယူႇယၢမ်းလဵဝ်ၼႆႉ ဢမ်ႇယွမ်း 36 ဝၢၼ်ႈ။ တူင်ႈၼႃး ဢၼ်ၺႃးၼမ်ႉထူမ်ႈၼႆႉ ၼပ်ႉႁူဝ်မိုၼ်ႇဢေႊၶိူဝ်ႊယဝ်ႉ။ ၼႃးၵူၼ်းမိူင်း ဢၼ်လႆႈသုမ်း ၵႂႃႇၼၼ်ႉသမ်ႉ ၸိူဝ်းတိုၵ်ႉၽုၵ်ႇသွမ်ႈ ၸွမ်းသၢပ်ႇလွႆၼၼ်ႉ ၺႃးၼမ်ႉႁူၺ်ႈလွႆ ၶီႈၵူမ်ႇထူမ်သႂ်ႇသေ ၼၼ်ႉၵေႃႈ လူႉသုမ်းၼမ်။ ၸိူဝ်းပၢတ်ႇ ႁွႆႈဝႆႉ ပဵၼ်ႁၢဝ်း ၸိူဝ်းၼၼ်ႉၵေႃႈ ၺႃးၼမ်ႉလုပ်ႇၵႂႃႇပႅတ်ႈမူတ်းယဝ်ႉ။ ဢၼ်ပႆႇပၢတ်ႇသေ မီးယူႇတႂ်ႈၼမ်ႉ ၸူမ်ဝႆႉၸိူဝ်းၼၼ်ႉၵေႃႈ မီးထႅင်ႈတင်းၼမ်ယဝ်ႉ”- ဝႃႈၼႆ။

လိူဝ်ၼၼ်ႉ ၵူၼ်းဝၢၼ်ႈပၢင်မွၼ်း၊ ဝၢၼ်ႈပၢင်ယူၼ်ႇလႄႈ ဝၢၼ်ႈၼွင်ၸၢင်ႉ ၸိူဝ်းၼႆႉ လႆႈပၢႆႈၽေးၼမ်ႉထူမ်ႈ ႁွတ်ႈထိုင်ဝႆႉ တီႈဝၢၼ်ႈၵၢတ်ႇၵူႇ၊ ၼွင်မွၼ်လႄႈ ဝၢၼ်ႈယဵၼ်ႇ ၸိူဝ်းၼႆႉ။

“ၵူၼ်းဝၢၼ်ႈ ဢၼ်လႆႈပၢႆႈၽေးၼမ်ႉထူမ်ႈသမ်ႉ တေမီး 3 ဝၢၼ်ႈၼႆႉ မိူၼ်ၼင်ႇ ဝၢၼ်ႈပၢင်မွၼ်းတင်း ဝၢၼ်ႈပၢင်ယူၼ်ႇၼႆႉ ၼမ်ႉလိုၵ်ႉမွၵ်ႈ 10 ပေႇၼႆႉ။ ၼႆႉတႄႉ လင်ႁိူၼ်းၵူၼ်းဝၢၼ်ႈ 1 ဝၢၼ်ႈလႂ် ဢမ်ႇယွမ်း 100 လင် ယၢမ်းလဵဝ် ၵူၼ်းဝၢၼ်ႈဢွၼ်ၵၼ်ၶၢႆႉပၢႆႈမူတ်းယဝ်ႉ။ ယဝ်ႉၵေႃႈ ဝၢၼ်ႈၼွင်ၸၢင်ႉ ၸိူဝ်းၼႆႉ”- ၵူၼ်းပိုၼ်ႉတီႈ ထုင်ႉပူင်း သိုပ်ႇလၢတ်ႈၼႄၼင်ႇၼႆ။

ပီၼႆႉၵူၺ်း ၼမ်ႉႁူၺ်ႈၼမ်ႉလွႆ လႆထူမ်ႈ ၼႂ်းထုင်ႉပူင်း ႁၢဝ်ႈႁႅင်းၼႆႉ မီး 3 ပွၵ်ႈယဝ်ႉ မိူဝ်ႈဢွၼ်တၢင်း ဝၼ်းတီႈ 17 လိူၼ်မေႊၼၼ်ႉ ၵမ်းၼိုင်ႈ၊ ဝၼ်းတီႈ 17 လိူၼ်ၵျုၼ်ႊၼၼ်ႉ ၵမ်းၼိုင်ႈလႄႈ ယၢမ်းလဵဝ်ၼႆႉ ထႅင်ႈၵမ်းၼိုင်ႈ ဝႃႈၼႆ။

ဢိင်ၼိူဝ် လွင်ႈၼမ်ႉထူမ်ႈ ၼႂ်းထုင်ႉပူင်း ႁၢဝ်ႈႁႅင်း ၸိူင်ႉၼႆၼႆႉ ယၢမ်းမီးမႃး 3 ပွၵ်ႈ ၼႆယဝ်ႉ။ မိူဝ်ႈပီ 2011 ၼၼ်ႉ ပွၵ်ႈ ၼိုင်ႈ။ ပီ 2021 ၼၼ်ႉ ပွၵ်ႈၼိုင်ႈလႄႈ ပီ 2024 ၼႆႉ ပွၵ်ႈၼိုင်ႈ။ ၵူၺ်းၵႃႈ ပီၼႆႉတႄႉ ပဵၼ်ပီဢၼ်ၼမ်ႉထူမ်ႈ လိူဝ်ႁႅင်းသုတ်း ၼႆယဝ်ႉ။