ၼမ်ႉတဵင်းၼွင်းထူမ်ႈဝဵင်းလၢင်းၶိူဝ်းၸိုင်ႈတႆးပွတ်းၸၢၼ်း ၵူၼ်းမိူင်းၼပ်ႉႁူဝ်ႁဵင်လူဝ်ႇတၢင်းၸွႆႈထႅမ်

တႄႇဢဝ်ဝၼ်းတီႈ 10/09/2024 ယၢမ်းၵၢင်ၼႂ် ၼမ်ႉတဵင်းၼွင်းထူမ်ႈဝဵင်းလၢင်းၶိူဝ်းၸိုင်ႈတႆးပွတ်းၸၢၼ်း ၼွင်းထူမ်ႈႁၢဝ်ႈႁႅင်း တေႃႇထိုင်ဝၼ်းမိူဝ်ႈၼႆႉ ၼွင်းထူမ်ႈၺႃးလင်ႁိူၼ်းမွၵ်ႈ ၶိုင်ႈဝဵင်း ၵူၼ်းထူပ်းၽေးၼမ်ႉထူမ်ႈ ယၢပ်ႇၽိုတ်ႇလူဝ်ႇတၢင်းၸွႆႈထႅမ်ႁႅင်း ။

ၼမ်ႉတဵင်းၼွင်းထူမ်ႈၵမ်းၼႆႉ လႆႈဝႃႈၼွင်းထူမ်ႈႁၢဝ်ႈႁႅင်းသုတ်းၼႂ်းပိုၼ်းမိူင်းဝဵင်းလၢင်းၶိူဝ်း၊ ၵူၼ်းမိူင်းထူပ်းၽေးၼမ်ႉထူမ်ႈလူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ် မီးၼပ်ႉႁူဝ်ႁဵင်၊ ၵူၼ်းၸိူဝ်းပၢႆႈၶိုၼ်ႈလွႆသေ ၵႂႃႇၶၢင်ႉၶမ်ဝႆႉ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ်မီး 300 ပၢႆ  ၊ ယၢမ်းလဵဝ်ၵၢၼ်တိတ်းတေႃႇၵပ်းသိုပ်ႇၶၢတ်ႇမူတ်းလႄႈ တႃႇႁႃၵၼ် တႃႇယွၼ်းတၢင်းၸွႆႈထႅမ် ၵေႃႈယၢပ်ႇၽိုတ်ႇမူတ်း ဝႃႈၼႆ။

ၸၢႆးပႃႉႁၢၼ်ႇ ၵူၼ်းၼုမ်ႇဝဵင်းလၢင်းၶိူဝ်း ဢၼ်တူင်ႉၼိုင်ၸွႆႈထႅမ်ၵူၼ်းထူပ်းၽေးၼမ်ႉ လၢတ်ႈတီႈၽူႈတွႆႇႁွၵ်ႈဝႃႈ- “ၼႂ်းထုင်ႉဝဵင်းလၢင်းၶိူဝ်း ၸဵမ်ၼႂ်းပွၵ်ႉယွမ်ႇၼႂ်းဝဵင်းလႄႈ ဝၢၼ်ႈတၢင်းၼွၵ်ႈ တင်းမူတ်း ထူပ်းၽေးၼမ်ႉထူမ်ႈၶႃႈဢေႃႈ။ ဢၼ်ဢမ်ႇထူပ်းၽေးၼမ်ႉၼႆႉမီးဝၢၼ်ႈလွႆလႄႈ ဝၢၼ်ႈလူင်ပွၵ်ႉတူၵ်းၵူၺ်း။ ဢၼ်ထူပ်းၽေးၼမ်ႉႁၢဝ်ႈႁႅင်းသုတ်းပဵၼ်ဝၢၼ်ႈၼမ်ႉဢုၼ်ႇတင်းဝၢၼ်ႈ လႄႈ ဝၢၼ်ႈပူးၵမ်ႇတင်းဝၢၼ်ႈ  ။ ယၢမ်းလဵဝ်လူဝ်ႇတၢင်းၸွႆႈထႅမ်ႁၢဝ်ႈႁႅင်းဢေႃႈ ။ ၵူၺ်းၵႃႈၵၢၼ်ၵပ်းသိုပ်ႇၵပ်းသၢၼ်သမ်ႉၶၢတ်ႇဝႆႉမူတ်းယဝ်ႉလႄႈ ပဵၼ်ဢၼ်ယၢပ်ႇၽိုတ်ႇတႄႉတႄႉ ။ ”-ဝႃႈၼႆ။

ဝၢၼ်ႈဢၼ်ၼမ်ႉထူမ်ႈတင်းဝၢၼ်ႈ ၼႆႉပဵၼ်ဝၢၼ်ႈၼမ်ႉဢုၼ်ႇ ၊ ဝၢၼ်ႈပူးၵမ်ႇ၊ ဝၢမ်ႈတိုင်းၵႂၢင်ႉ ဝၢၼ်ႈႁူၺ်ႈသိမ်ႇ  ဢၼ်မီးတၢင်းၼွၵ်ႈဝဵင်း ၊ ၼႂ်းဝဵင်းသမ်ႉ ဝၢၼ်ႈတႃႈ  ၊ ဝၢၼ်ႈပၢင်သၼွင်း၊ ဝၢၼ်ႈပၢင်ဝွင်၊ ဝၢၼ်ႈပၢင်ႁုင်း၊ ဝၢၼ်ႈလူင်ပွၵ်ႉဢွၵ်ႇ၊ ဝၢၼ်ႈမၢၵ်ႇမၢၵ်ႇပိၼ်း၊ ဝၢၼ်ႈၵၢတ်ႇ၊ ၵၢတ်ႇလူင်ဝဵင်းလၢင်းၶိူဝ်း၊ ဝၢၼ်ႈတႂ်ႈ၊ ဝတ်ႉၵျွင်းၵမထၢၼ်း၊ ဝၢၼ်ႈပုင်းထုၼ်၊ ဝၢၼ်ႈႁူၺ်ႈႁိူဝ်း၊ ဝၢၼ်ႈမႂ်ႇ ၊ ဝၢၼ်ႈၵုၼ် ၸိူဝ်းၼႆႉၵေႃႈ ထူပ်းၽေးၼမ်ႉထူမ်ႈမွၵ်ႈ 90 ပိူဝ်ႊသဵၼ်ႊ။ ဢၼ်ဢမ်ႇထူပ်းၽေးၼမ်ႉထူမ်ႈၵိုတ်း 2 ဝၢၼ်ႈၵူၺ်း ပဵၼ်ဝၢၼ်ႈလူင်ပွၵ်ႉတူၵ်းလႄႈ ဝၢၼ်ႈလွႆ ဢၼ်မီးပိုၼ်ႉတီႈသုင်လႄႈ ဢၼ်ယၢၼ်ၵႆၵၼ်တင်းၼမ်ႉတဵင်း  ။

ၸၢႆးပႃႉႁၢၼ်ႇလၢတ်ႈဝႃႈ – ”တင်းမူတ်းႁူဝ်ၼပ်ႉၵူၼ်းတႅတ်ႈတေႃးတႄႉဢမ်ႇၸၢင်ႈႁူႉလႆႈသေတႃႉ လၢမ်းၶၢတ်ႈတႄႉႁိူၼ်းယေးဢၼ်ၺႃးၼမ်ႉထူမ်ႈ ဢမ်ႇယွမ်းႁဵင်လႄႈႁူဝ်ၵူၼ်းထူပ်းၽေးၼမ်ႉၵေႃႈၼပ်ႉႁူဝ်ႁဵင်။ ယၢမ်းလဵဝ်ၵူၼ်းထူပ်းၽေးၼမ်ႉ ဢၼ်ၶွၼ်ႈၵၼ် ယူႇသဝ်းဝႆႉတေမီးတီႈ ဝိႁၢရ်ၽြႃးရၶႅင်ႇ(ၵျွင်းတေႃႇ) ၵၢင်ဝဵင်း၊ ၵျွင်းလူင်ၵၢင်ဝဵင်း၊ ၸလွပ်ႈ(ထမ်ႇမႃႇယူင်ႇ) ဝၢၼ်ႈလူင်ပွၵ်ႉဢွၵ်ႇ ၸိူဝ်းၼႆႉ။ ၵမ်ႈၼမ်တႄႉ ၵႂႃႇသွၼ်ႈယူႇၸွမ်းႁိူၼ်းပီၽႂ်ၼွင်ႉမၼ်း၊ ၵူၼ်းၵူၼ်းႁူႉၸၵ်းမိုတ်ႈၵိုဝ်းၸမ်ၸႂ်ၽႂ်မၼ်းၸိူဝ်းၼႆႉ”- ဝႃႈၼႆ။

ဢၼ်ပၢႆႈၶိုၼ်ႈၵႂႃႇယူႇၼိူဝ်လွႆ တၢင်းဢွၵ်ႇမိူဝ်းဝဵင်းမိူင်းပၼ်ႇသမ်ႉပဵၼ်ပီႈၼွင်ႉဝၢၼ်ႈၼမ်ႉဢုၼ်ႇ ႁူဝ်ၵူၼ်းမီး 300 ပၢႆ။ ၼမ်ႉထူမ်ႈသဵၼ်ႈတၢင်းၶဝ်ႈဝဵင်းလၢင်းၶိူဝ်းလႄႈ ဢမ်ႇၸၢင်ႈလႆႈတၢင်းၸွႆႈထႅမ် ။

ၸၢႆးထုၼ်းယဵၼ်ႇၵူၼ်းဝၢၼ်ႈၼမ်ႉဢုၼ်ႇ ဝဵင်းလၢင်းၶိူဝ်းလၢတ်ႈတီႈၽူႈတွႆႇႁွၵ်ႈဝႃႈ-“ ဝၢၼ်ႈၼမ်ႉဢုၼ်ႇႁဝ်းၶႃႈၼႆႉမၼ်းပဵၼ်တီႈတႅမ်ႇ။ ၼမ်ႉဢၼ်လုၵ်ႉတၢင်းၼိူဝ်သေလႆလူင်းၶၢမ်ႈတၢင်းမႃးၵေႃႈမႃးၶဝ်ႈဝၢၼ်ႈ။ ဢၼ်လူၼ်ႉၼမ်ႉတဵင်းၾၢႆႇၸၢၼ်းဝၢၼ်ႈႁဝ်းသေၶဝ်ႈမႃးၼႂ်းဝၢၼ်ႈၵေႃႈမီးလႄႈႁဵတ်းႁႂ်ႈဝၢၼ်ႈႁဝ်းၶႃႈၸူမ်တႂ်ႈၼမ်ႉ။ သဵၼ်ႈတၢင်းၶဝ်ႈဝဵင်းၵေႃႈၼမ်ႉထူမ်ႈၶၢတ်ႇဝႆႉလႄႈ ဢမ်ႇၸၢင်ႈၶဝ်ႈဝဵင်း။ လႆႈဢွၼ်ၵၼ်ႁဵတ်းသုမ်ႉႁဵတ်းသွင်းသေယူႇဝႆႉၸွမ်းတၢပ်ႈလွႆ။ ၾူၼ်ၵေႃႈဢမ်ႇပႆႇႁိူတ်ႇ ၊ ၶမ်ႈဝႃးၵေႃႈဢွၼ်ၵၼ်ဢိုပ်းၶဝ်ႈ။ တေမိူဝ်းတၢင်းမိူင်းပၼ်ႇသမ်ႉ လိၼ်လွႆၵူၼ်ႇဝႆႉလႄႈဢမ်ႇၸၢင်ႈမိူဝ်း။ ပီႈၼွင်ႉတၢင်းမိူင်းပၼ်ႇၵေႃႈဢမ်ႇၸၢင်ႈလူင်းမႃးၸွႆႈႁဝ်းၶႃႈ ။ လူဝ်ႇတၢင်းၸွႆႈထႅမ်ဝႆႉႁၢဝ်ႈႁႅင်း ”- ဝႃႈၼႆ။

ဝၢၼ်ႈၼမ်ႉဢုၼ်ႇၼႆႉ ပဵၼ်ဝၢၼ်ႈဢၼ်မီးၼမ်ႉပုင်ႇဢုၼ်ႇသၽႃႇဝ၊ ပဵၼ်တီႈၵူၼ်းမိူင်းထုင်ႉမိူင်းၼၢႆးလၢင်းၶိူဝ်းမိူင်းပၼ်ႇမႃးဢၢပ်ႇၼမ်ႉဢုၼ်ႇၽွင်းၶၢဝ်းၵတ်း။ ဝၢၼ်ႈၼမ်ႉဢုၼ်ႇၼႆႉ တူၼ်ႈမႆႉဢုမ်ႇမႆႉတိုၵ်ႉမီးၼမ် ပဵၼ်တီႈဢၼ်မီးသိင်ႇဝႅတ်ႉလွမ်ႉၶႅမ်ႉတဵမ်ထူၼ်ႈတီႈၼိုင်ႈၼႂ်းဝဵင်းလၢင်းၶိူဝ်း။ ႁိူၼ်းၵူၼ်းမီး 80 ပၢႆ ႁူဝ်ၵူၼ်းၼႂ်းဝၢၼ်ႈမီး 300 ပၢႆ။

“ယၢမ်းလဵဝ်တႄႉထူပ်းၽေးၼမ်ႉထူမ်ႈ ဢမ်ႇၵိုတ်းလိူဝ်ႁိူၼ်းသေလင်။ ၼမ်ႉထူမ်ႈသုင်ထိုင်ၶေႃးႁိူၼ်း 2 ၸၼ်ႉ။ ၶူဝ်းၶွင်ႁိူၼ်းယေး ဢမ်ႇၵိုတ်းလိူဝ်သင် ၊ၸဵမ်ၸိူဝ်ႉၽၼ်း တႃႇၽုၵ်ႇသွမ်ႈႁႃၵိၼ်လဵင်ႉတွင်ႉ တႃႇပီတေမႃးၵေႃႈဢမ်ႇၵိုတ်းသင်ယဝ်ႉ ”-ၼႆ ၼၢင်းၶမ်းပီး ၵူၼ်းဝၢၼ်ႈၼမ်ႉဢုၼ်ႇ ႁွင်ႉႁႆႈတိူဝ်ႉၸႂ်သေပိုတ်ႇလၢတ်ႈၼေၼင်ႇၼႆ  ။

ဢိင်ၼိူဝ်ၵူၼ်းမိူင်းလၢင်းၶိူဝ်းထူပ်းၽေးၼမ်ႉၼွင်းထူမ်ႈၸိူင်ႉၼႆသေ ၾၢႆႇၸွႆႈထႅမ်ၵူၼ်းထူပ်းၽေး ႁွင်ႈၵၢၼ်တႂ်ႈလူင်ပွင်ၸိုင်ႈမိူင်းႁူမ်ႈတုမ် လူင်းၸွႆႈထႅမ်ယူႇသေတႃႉ ဢမ်ႇတူဝ်ႈထိုင်ၸွတ်ႇလႆႈၵူႈတီႈ။ ၾၢႆႇၼိုင်ႈၵေႃႈ ၵၢၼ်ၵပ်းသိုပ်ႇ သဵၼ်ႈတႃႈသၢႆတၢင်းၶၢတ်ႇဝႆႉမူတ်းတၢင်းၶဝ်ႈလႄႈတၢင်းဢွၵ်ႇဝဵင်း။

ဝၼ်းတီႈ 12/09/2024 ၼႆႉ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ၸႄႈဝဵင်းမၢႆ 3  လူင်းပိုၼ်ႉတီႈၸွႆႈထႅမ်ႁေႃႇၶဝ်ႈၸွၵ်းၽၵ်းၵူၼ်းမိူင်းၼႂ်းဝဵင်းလၢင်းၶိူဝ်း။

ၸၢႆးတေႇၸိင်ႇ လႄႈ ပီႈၸၢႆးဢေႃးတ ႁူဝ်ၼႃႈၸုမ်းၸွႆႈထႅမ်ႁေႃႇၶဝ်ႈလၢတ်ႈတီႈၽူႈတွႆႇႁွၵ်ႈဝႃႈ- “ဝၼ်းမိူဝ်ႈၼႆႉ ႁဝ်းၶႃႈမီး ႁေႃႇၶဝ်ႈ ၸွၵ်းၽၵ်း 2500 ပၢႆ  မႃးၸွႆႈထႅမ်ပၼ်ပီႈၼွင်ႉထူပ်းၽေးၼမ်ႉထူမ်ႈ တီႈၵျွင်းလူင် ၵၢင်ဝဵင်းလၢင်းၶိူဝ်း ဝၢၼ်ႈပၢင်သၼွင်း ဝၢၼ်ႈတႃႈ လႄႈႁူၺ်ႈသိမ်ႇ တိုင်းၵႂၢင်ႉၸိူဝ်းၼႆႉ။ ၵူၼ်းတိုၵ်ႉလူဝ်ႇတၢင်းၸွႆႈထႅမ် ထႅင်ႈတင်းၼမ်။ သင်ၼမ်ႉပႆႇယွမ်းလူဝ်ႇတၢင်းၸွႆႈထႅင်ႈတႄႉ တေလူင်းၸွႆႈပၼ်ႁေႃႇၶဝ်ႈၸွၵ်းၽၵ်းထႅင်ႈယူႇ။ ၽႅၼ်ၵၢၼ်ၶၢဝ်းယၢဝ်းတႄႉ လွင်ႈတႃႇၶိုၼ်းၵေႃႇသၢင်ႈႁိူၼ်းယေး တႄႉယၢမ်းလဵဝ်ပႆႇမီး။  ၵူၺ်းၵႃႈ မီးၽႅၼ်ဝႆႉတႃႇဢဝ် ၸိူဝ်ႉၽၼ်းမၢၵ်ႇၶဝ်ႈတဝ်ႈၼမ်ႉ တႃႇၶိုၼ်းၽုၵ်ႇသွမ်ႈၼႂ်း သူၼ် မိူၼ်ၼင်ႇထူဝ်ႇၼဝ်ႈ ၸိူဝ်ႉငႃး လႄႈ မၢၵ်ႇဝၼ်းဝၢႆႇ ထူဝ်ႇၶဵဝ် ၽၵ်းၵၢတ်ႇ ၸိူဝ်းဢၼ်တေၸၢင်ႈၽုၵ်ႇဝၢႆးၼမ်ႉထူမ်ႈၼႆႉ။   ”- ဝႃႈၼႆ။

ၼမ်ႉထူမ်ႈတီႈဝဵင်းလၢင်းၶိူဝ်းၵမ်းၼႆႉ လႆႈငိၼ်းဝႃႈမီးၵူၼ်းလႆလွင်ႈၸွမ်း ဢမ်ႇယွမ်း 5 ၵေႃႉ ။ ပဵၼ်လုၵ်ႈဢွၼ်ႇၵူၼ်းဝၢၼ်ႈတၢင်းထုင်ႉပူးၵမ်ႇ  4 ၵေႃႉလႄႈ လုၵ်ႈမေးသိုၵ်းမၢၼ်ႈတပ်ႉၶမယ 518 ၵေႃႉၼိုင်ႈ -ဝႃႈၼႆသေတႃႉ ဢိင်ၼိူဝ်ၵၢၼ်ၵပ်းသိုပ်ႇတိတ်းတေႃႇၵၼ်ဢမ်ႇလႆႈသေ ပႆႇမီးၽႂ်ယိုၼ်ယၼ်ပၼ်။

ဢၼ်ၼမ်ႉထူမ်ႈလၢင်းၶိူဝ်းပွၵ်ႈၵမ်းၼႆႉ ထဝ်ႈဝၢၼ်ႈထဝ်ႈၼႃး ၵူၼ်းမိူင်းလၢင်းၶိူဝ်းဝႃႈ ဢၼ်လွင်ႈလႆမႃးၸွမ်းၼမ်ႉ ပဵၼ်ၶႅၵ်ႉတူၼ်ႈမႆႉၵိင်ႇမႆႉဢွၼ်ႇၸိူဝ်းၼႆႉၵူၺ်း။ ဢမ်ႇမီးတူၼ်ႈမႆႉယႂ်ႇလူင်လွင်ႈမႃးၸွမ်း။  ပဵၼ်ယွၼ်ႉပႃႇထိူၼ်ႇလူႉ သိင်ႇဝႅတ်ႉလွမ်ႉလီဢမ်ႇမီးယဝ်ႉလႄႈ ၼမ်ႉလိၼ်ႁိၼ်ၽႃႁူၺ်ႈလွႆ ဢမ်ႇမီးႁႅင်းၸုပ်ႇၼမ်ႉၾူၼ် – ၸင်ႇဝႃႈၼမ်ႉၼွင်းလူင်းၶဝ်ႈၼႂ်းမႄႈၼမ်ႉ လူၼ်ႉၾင်ႇ ဝႃႈၼႆ။

ၵူၼ်းၼုမ်ႇထုင်ႉလၢင်းၶိူဝ်းတွၼ်ႈတၢင်းၸၢၼ်းၵေႃႈလၢတ်ႈဝႃႈ – ၼမ်ႉၶူင်းၵေႃႈၼွင်းလႄႈ ႁဵတ်းႁႂ်ႈၼမ်ႉတဵင်းဢမ်ႇၸၢင်ႈလႆၶဝ်ႈ  ၼမ်ႉၶူင်းၶိုတ်းတၼ်း တီႈတႃႈသူပ်းတဵင်း။ ၸင်ႇဝႃႈၼမ်ႉတဵင်းယိုင်ႈသေၼွင်းလူၼ်ႉၾင်ႇ။ တၢင်းထုင်ႉဝၢၼ်ႈၸလွင်း  ၼႃးၵူင်း မႆႉဢုၼ်လဝ်း ၸိူဝ်းမီးတၢင်းၸၢၼ်းဝဵင်းလၢင်းၶိူဝ်းၵေႃႈ ၼမ်ႉထူမ်ႈ ယႂ်ႇၵႂၢင်ႈ။ လိၼ်သူၼ်ႁႆႈၼႃးမၢၵ်ႇၶဝ်ႈတဝ်ႈၼမ်ႉတႄႉ လူႉသုမ်းမူတ်းယဝ်ႉဝႃႈၼႆ။

ဝဵင်းလၢင်းၶိူဝ်းၼႆႉ မီး 11 ပွၵ်ႉ၊ 14 ဢိူင်ႇလႄႈ တင်းမူတ်းမီး 94 ဝၢၼ်ႈ။ ႁူဝ်ၵူၼ်းမီး 4700 ပၢႆ(ၸွမ်းၼင်ႇလွင်ႈၵဵပ်းသဵၼ်ႈမၢႆႁူဝ်ၵူၼ်းပီ 2014) ။ႁဵတ်းၵၢၼ်ၽုၵ်ႇသွမ်ႈႁႃၵိၼ်လဵင်ႉတွင်ႉပဵၼ်ပိူင်ယႂ်ႇ။  ၼမ်ႉဢွႆႈ၊ ထူဝ်ႇႁႄႉ၊ ငႃး၊ ထူဝ်ႇလိၼ်၊ ၶဝ်ႈၵၢပ်ႇလႄႈ ယႃႈလႅင်ဢၼ်ဢွၵ်ႇလၢင်းၶိူဝ်းၸိုဝ်ႈသဵင်ယႂ်ႇ။

 ၼႂ်းႁူဝ်လိူၼ်သႅပ်ႉထႅမ်ႊပိူဝ်ႊၼႆႉၼမ်ႉတဵင်းလူၼ်ႉၾင်ႇယဝ်ႉၵမ်းၼိုင်ႈ။ ထူမ်ႈႁိူၼ်းယေးသူၼ်ႁႆႈၼႃး သေ တိုၵ်ႉယွမ်းလူင်းႁႅင်ႈႁႂ်ႇၵႂႃႇလႆႈမွၵ်ႈ 3 ဝၼ်း။ ယွၼ်ႉပိူဝ်ႈလူမ်းလႅင်ႉလူင် Typhoon  Yagi ဢၼ်ၽတ်ႉပဝ်ႇၼႂ်းၸိုင်ႈမိူင်းဝႅတ်ႉၼၢမ်ႊ လႄႈ မိူင်းၶႄႇသေ ပၢႆမၼ်းၽတ်ႉၶဝ်ႈထိုင်မိူင်းတႆး ပွတ်းၸၢၼ်းလႄႈမိူင်းထႆး ။ၸင်ႇဝႃႈႁဵတ်းႁႂ်ႈၾူၼ်တူၵ်းႁႅင်းၼမ်ႉထူမ်ႈၼႂ်းၸိုင်ႈတႆးပွတ်းၸၢၼ်း 20 ဝဵင်းပၢႆ။ လႄႈမိူင်းထႆးတွၼ်ႈၼိူဝ် 5 ၸႄႈတွၼ်ႈ။

တီႈဝဵင်းလၢင်းၶိူဝ်းၼႆႉ ပူၼ်ႉမႃး 20 ပီ ၽွင်းပီ 2004 မိူဝ်ႈသိုၵ်းမၢၼ်ႈ တႄႇပၼ်ၶႂၢင်ႉၶွမ်ႊပၼီႊ ၵေႃႇသၢင်ႈႁူင်းၸၢၵ်ႈၾႆးၾႃႉတီႈၵဵင်းတွင်းၼၼ်ႉၵေႃႈၼမ်ႉထူမ်ႈဝဵင်း  ယႂ်ႇလူင်ႁၢဝ်ႈႁႅင်းယဝ်ႉပွၵ်ႈၼိုင်ႈ။ ယၢမ်းလဵဝ် ပီ 2024 ၼႆႉသမ်ႉ ထူမ်ႈႁၢဝ်ႈႁႅင်းလိူဝ်ၽွင်းပီ 2004 ၼၼ်ႉထႅင်ႈလူးၵွၼ်ႇ။ လႆႈဝႃႈ ထူမ်ႈႁႅင်းသုတ်းၼႂ်းပိုၼ်းမိူင်းလၢင်းၶိူဝ်း 100 ပီပၢႆ – ၵူၼ်းထဝ်ႈၵူၼ်းၵႄႇ မိူင်းလၢင်းၶိူဝ်းလၢတ်ႈၼင်ႇၼႆ။

သင်ၸိူဝ်ႉမီးၸဝ်ႈတႃႇၼ တီႈၸမ်တီႈၵႆ ၼွၵ်ႈမိူင်းၼႂ်းမိူင်း ၸိူဝ်းၶႂ်ႈသူင်ႇတၢင်းၸွႆႈထႅမ်ၶူဝ်းၶွင်ၵိၼ်ယမ်ႉလႄႈ ငိုၼ်းတွင်းတႃႇၵမ်ႉၸွႆႈၵူၼ်းထူပ်းၽေးၼမ်ႉ တီႈဝဵင်းလၢင်းၶိူဝ်းၸိုင် တိတ်းတေႃႇၵပ်းသိုပ်ႇၸူး ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ဝဵင်းလၢင်းၶိူဝ်းလႆႈတီႈမၢႆၾူၼ်း-  09-428-143-401  လႄႈ 09-794-459- 456 လႆႈၵမ်းသိုဝ်ႈ ဝႃႈၼႆၶႃႈဢေႃႈ။