လူင်ပွင်ၸိုင်ႈမိူင်းႁူမ်ႈတုမ် ႁွင်ႈၵၢၼ်ၾၢႆႇပၢႆးပၺ်ၺႃ တွပ်ႇလၢတ်ႈၼႂ်းပၢင်ၵုမ်သၽႃးၵူၼ်းမိူင်းဝႃႈ ႁူင်းႁဵၼ်းၸၼ်ႉ ၵၢင်(ၽႄ) ဢိူင်ႇႁၢမ်းငၢႆး ၸႄႈဝဵင်းမိူင်းၵိုင်ၼၼ်ႉ မၵ်းမၼ်ႈၶိုၼ်ႈၸၼ်ႉပၼ် ႁႂ်ႈပဵၼ်ႁူင်းႁဵၼ်းၸၼ်ႉၵၢင်ၼင်ႇ ၽူႈ တႅၼ်းမိူင်းၵိုင် ၸၢႆးသႅင်မိူင်းတၢင်ႇလၢတ်ႈတုၵ်းယွၼ်းဝႆႉ ဝႃႈၼႆ။

ၽွင်းလူင်ၾၢႆႇပၢႆးပၺ်ၺႃ ၻွၵ်ႊတိူဝ်ႊမဵဝ်းတဵင်းၵျီး တွပ်ႇလၢတ်ႈပၼ် ၼႂ်းပၢင်ၵုမ်သၽႃးၵူၼ်းမိူင်း မိူဝ်ႈဝၼ်းတီႈ 18/06/2018။

ၸၢႆးသႅင်မိူင်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈႁူင်းႁဵၼ်း တီႈဢိူင်ႇႁၢမ်း ငၢႆးႁဝ်းၼႆႉ။ မိူဝ်ႈပီ 2016 ၼၼ်ႉ ၶႃႈတႅမ်ႈလိၵ်ႈ တၢင်ႇၼႂ်းသၽႃးၵမ်းၼိုင်ႈယဝ်ႉ။ ၵူၺ်းၵႃႈ ယူႇတီႈၾၢႆႇပၢႆးပၺ်ၺႃမိူင်း ႁူမ်ႈတုမ်ၶဝ် တႅမ်ႈတွပ်ႇမႃးပၼ်ၶိုၼ်း ဢမ်ႇၸၢင်ႈမၵ်းမၼ်ႈပဵၼ်ႁူင်းႁဵၼ်းၸၼ်ႉၵၢင် ။ ထိုင် မႃး ပီ 2017 ပူၼ်ႉမႃး လုၵ်ႈႁဵၼ်းႁဝ်းၶႃႈ ဢၼ်လုၵ်ႉတီႈဢိူင်ႇႁၢမ်းငၢႆး ၵႂႃႇတွပ်ႇလိၵ်ႈတီႈၼႂ်းဝဵင်းမိူင်းၵိုင်သေ ပွၵ်ႈမႃးၼၼ်ႉ မႃးပဵၼ်ၽေးၵိုင်ႉ  ၵၢင်ႉလူတ်ႉထူဝ်ႈပိၼ်ႈသေ လုၵ်ႈႁဵၼ်းလႆႈလူႉတၢႆ မၢတ်ႇၸဵပ်းတင်းၼမ်။ ယွၼ်ႉၼၼ် ၶႃႈႁဝ်းၸင်ႇႁဵတ်း လိၵ်ႈတၢင်ႇ  ထိုင်ၼႂ်းသၽႃးထႅင်ႈၵမ်းၼိုင်ႈ မိူဝ်ႈၼႂ်းလိူၼ်ၾႅပ်ႊၿိဝ်ႊရီႊ 2018 ၼၼ်ႉ။ ႁိုင်ၵႂႃႇပဵၼ်လၢႆလိူၼ်ယဝ်ႉ ၶဝ်ၸင်ႇမႃးတွပ်ႇပၼ် မိူဝ်ႈဝၼ်းတီႈ 18 ၼႆႉ” ဝႃႈၼႆ။

မိူဝ်ႈဝၼ်းတီႈ 25/05/2018 ၵၢၼ်ႁဵၼ်း 2018-2019 ၼၼ်ႉ ယူႇတီႈၾၢႆႇပၢႆးပၺ်ၺႃ မိူင်းႁူမ်ႈတုမ် လႆႈယုၵ်ႉမုၼ်း ၶိုၼ်ႈၸၼ်ႉပၼ် ၵိင်ႇၽႄႁူင်း ႁဵၼ်းၸၼ်ႉၵၢင် တီႈဢိူင်ႇႁၢမ်းငၢႆးၼၼ်ႉ တေႃႈလဵဝ် လႆႈယုၵ်ႉၶိုၼ်ႈပဵၼ် ႁူင်းႁဵၼ်း ၸၼ်ႉၵၢင်ၵႂႃႇယဝ်ႉ ဝႃႈၼႆ။

ယူႇတီႈၻွၵ်ႊတိူဝ်ႊမဵဝ်းတဵင်းၵျီး ၽွင်းလူင်ၾၢႆႇပၢႆးပၺ်ၺႃ မိူင်းႁူမ်တုမ် တွပ်ႇလၢတ်ႈဝႃႈ “ ၵိင်ႇၽႄႁူင်းႁဵၼ်းၸၼ်ႉၵၢင် တီႈဢိူင်ႇႁၢမ်းငၢႆးၼၼ်ႉ တွၼ်ႈတႃႇတေယုၵ်ႉပဵၼ် ႁူင်းႁဵၼ်းၸၼ်ႉၵၢင်ၼၼ်ႉ ပေႃးမႃးတူၺ်းၼႆမၼ်း ပႆႇၵိုင်ႇငၢမ်ႇ။ ယွၼ်ႉဝႃႈ ႁူင်းႁဵၼ်းၸၼ်ႉၵၢင်ၼႆႉ တေလႆႈမီးလုၵ်ႈႁဵၼ်း 240 ၵေႃႉၶိုၼ်ႈၼိူဝ်။ တီႈဢိူင်ႇႁၢမ်းငၢႆးသမ်ႉ လုၵ်ႈႁဵၼ်းမီး 102 ၵေႃႉၵူၺ်း။ ထႅင်ႈၾၢႆႇၼိုင်ႈၵေႃႈ ႁူင်းႁဵၼ်းၸၼ်ႉၵၢင်(ၽႄ) တီႈဢိူင်ႇႁၢမ်းငၢႆးၼၼ်ႉသမ်ႉၵႆ ဝဵင်း မိူင်းၵိုင်လႄႈ ၼင်ႇႁိုဝ် လုၵ်ႈႁဵၼ်းၶဝ် ပေႃးတေမီးသုၼ်ႇလႆႈၶိုၼ်ႈႁူင်းႁဵၼ်းလႆႈလီလီၼၼ်ႉ ၸင်ႇလႆႈယုၵ် မုၼ်း ၶိုၼ်ႈၵႂႃႇပဵၼ်ႁူင်း ႁဵၼ်းၸၼ်ႉၵၢင်ယဝ်ႉ” ဝႃႈၼႆ။

ၸၢႆးသႅင်မိူင်း လၢတ်ႈဝႃႈ ပေႃးထိုင်မႃး ပၢင်တွပ်ႇလိၵ်ႈ ၸၼ်ႉ 4 တင်း ၸၼ်ႉ 8 ၸိုင် ယွၼ်ႉဝႃႈ ပဵၼ်ပိူင်လူင်ပွင်ၸိုင်ႈ ထတ်းလႄႈ လုၵ်ႈႁဵၼ်းၶဝ်လႆႈၵႂႃႇတွပ်ႇလိၵ်ႈ တီႈၼႂ်းဝဵင်းမိူင်းၵိုင် ၵူႈပီ။ ယွၼ်ႉဝႃႈ မၼ်းပဵၼ်ႁူင်းႁဵၼ်းၽႄၵူၺ်း လႄႈ လုၵ်ႈဢွၼ်ႇၵႂႃႇမႃးယၢပ်ႇတႃႇၶဝ်။ ယွၼ်ႉၼၼ် ၶႃႈၸင်ႇတၢင်ႇယွၼ်းထႅင်ႈ ႁႂ်ႈပဵၼ်ႁူင်းႁဵၼ်းၸၼ်ႉၵၢင် ၼင်ႇႁိုဝ် လုၵ်ႈဢွၼ်ႇႁဵၼ်းႁဝ်း ပေႃးတေလႆႈတွပ်ႇလိၵ်ႈၼႂ်းႁူင်းႁဵၼ်းၼၼ်ႉၵူၺ်း ဝႃႈၼႆ။

မိူဝ်ႈပီ 2017 ၼၼ်ႉ လုၵ်ႈႁဵၼ်းတီႈဢိူင်ႇႁၢမ်းငၢႆး လႆႈၵႂႃႇတွပ်ႇလိၵ်ႈတီႈၼႂ်းဝဵင်းမိူင်းၵိုင်သေ ၶိုၼ်းပွၵ်ႈမႃးၼၼ်ႉ လႆႈမႃး ပဵၼ်ၽေးၵိုင်ႉၵၢင်ႉ ထူဝ်ႈပိၼ်ႈၶႂမ်ႈသေ လုၵ်ႈႁဵၼ်း ဢၼ်မႃးၸွမ်းၼႂ်းထူဝ်ႈၼၼ်ႉ လႆႈလူႉတၢႆ 5 ၵေႃႉလႄႈ မၢတ်ႇၸဵပ်း 17 ၵေႃႉ။

ဢိူင်ႇႁၢမ်းငၢႆးတင်း ဝဵင်းမိူင်းၵိုင်ၼႆႉ ယၢၼ်ၵႆၵၼ် 27 လၵ်း ဝႃႈၼႆ။