သိုၵ်းမၢၼ်ႈပွႆႇမၢၵ်ႇ ဝဵင်းလႃႈသဵဝ်ႈ ၵူၼ်းပွၵ်ႈၶိုၼ်းႁိူၼ်း ငိူင်ႉဝႄႈထႅင်ႈၵမ်း

သွင်သၢမ်ဝၼ်းမႃးၼႆႉ သိုၵ်းမၢၼ်ႈမႃးပွႆႇမၢၵ်ႇ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ဢမ်ႇလိူၵ်ႈၶၢဝ်းလိူၵ်ႈယၢမ်း ၵူၼ်းမိူင်းဢွၼ်ၵၼ်ၵူဝ်လႄႈမႆႈၸႂ်။

ၵူၼ်းမိူင်း ဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ႁဝ်းၶႃႈ ပွၵ်ႈမႃးႁိူၼ်းၶိုၼ်း ပႆႇမီးလိူၼ် သိုၵ်းမၢၼ်ႈမႃးပွႆႇမၢၵ်ႇၶိုၼ်း သွင်ဝၼ်းထပ်းၵၼ်။ တူၵ်းၸႂ်သေ ဢွၼ်ၵၼ်ပၢႆႈဢွၵ်ႇဝၢၼ်ႈ ဢွၵ်ႇဝဵင်းၼမ်ၼႃႇ။ ႁဝ်းၶႃႈၵေႃႈ မီးလုၵ်ႈ ဢွၼ်ႇ ၵူဝ်လုၵ်ႈဢွၼ်တူၵ်းၸႂ် ၵူဝ်တုမ်ႉတိူဝ်ႉပၢႆးၸႂ်လုၵ်ႈဢွၼ်ႇလႄႈ ဢွၼ်ၵၼ်ငိူင်ႉ ဝႆႉၶိုၼ်းယဝ်ႉ”- ဝႃႈၼႆ။

ၵူၼ်းၼႂ်းပွၵ်ႉ ဢုပ်ႇၵုမ်ၵၼ်သေ မၢင်ၸိူဝ်း ဢမ်ႇၶႆႈပၢႆႈၵေႃႈမီး၊ မၢင်ၸိူဝ်းမႆႈၸႂ်လႄႈ တေငိူင်ႉဝႄႈၵေႃႈ မီးတူၵ်းလူင်း ၵၼ်ဝႃႈ ပၢႆႈၵေႃႈ ၵူၼ်းတီႈႁိူၼ်းလီမီးယူႇဝႆႉ ၵေႃႉၼိုင်ႈ။ ပေႃးဢမ်ႇပႂ်ႉၵေႃႈ ၵူဝ်ၺႃးယိုတ်းပိၵ်ႉ- ဝႃႈၼႆ။  

ၵူၼ်းပိုၼ်ႉတီႈ လၢတ်ႈထႅင်ႈဝႃႈ – “ပေႃးပၢႆႈ ဢမ်ႇမီးၵူၼ်းပႂ်ႉႁိူၼ်းသေၵေႃႉၵေႃႈ မႆႈၸႂ်၊ သေးလၢႆ ၶူဝ်းၶွင်ႁိူၼ်းယေး၊ ပေႃးတေဢမ်ႇပၢႆႈၵေႃႈ ၵူဝ်သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ ၵၢင်ၶမ်ႈၵၢင်ၶိုၼ်း၊၊ ၶႂ်ႈတႄႉၶႂ်ႈပၢႆႈယူႇ၊ တိုၵ်ႉပွၵ်ႈမႃး ၶိုၼ်းႁိူၼ်းၵေႃႈ ပႆႇႁိုင် ၵၢၼ်ႁႃၵိၼ်လဵင်ႉတွင်ႉၵေႃႈ ဢမ်ႇမီး ယွၼ်ႉၼၼ် ဢမ်ႇၸၢင်ႈႁဵတ်းႁိုဝ် ငိုၼ်းတွင်းဢမ်ႇတဵမ်ထူၼ်ႈလႄႈ ၵႃႈလႆႈယူႇၵႂႃႇႁဵတ်းၼႆၵူၺ်းယဝ်ႉ”- ဝႃႈၼႆ။

ၵူၼ်းမိူင်းဝဵင်းလႃႈသဵဝ်ႈ ဢၼ်ငိူင်ႉပၢႆႈၽေးသိုၵ်းဝႆႉၼႆႉ ၸမ်သုတ်းပၢႆႈၵႂႃႇ တၢင်းဝၢၼ်ႈပၢင်သိူင်း၊ ဝၢၼ်ႈမွၼ်း၊ မိူင်းယေႃ၊ တၢင်ႉယၢၼ်း ၸိူဝ်းၼႆႉ။

မိူဝ်းဝၼ်းတီႈ 09/09/2024 ယၢမ်းၵၢင်ၼႂ်ၸဝ်ႉ သိုၵ်းမၢၼ်ႈ မႃးပွႆႇမၢၵ်ႇ 2 လုၵ်ႈ တီႈဝဵင်းလႃႈသဵဝ်ႈ ပွၵ်ႉ 1 ၵူၼ်းပိုၼ်ႉတီႈ လူႉတၢႆ 1 ၵေႃႉ မၢတ်ႇၸဵပ်း 12 ၵေႃႉ။ မိူၼ်ၼႆ ၼင်ႇၵဝ်ႇ ဝၼ်းတီႈ 08/09/2024 ၵေႃႈ သိုၵ်းမၢၼ်ႈ ပွႆႇမၢၵ်ႇတီႈ ပွၵ်ႉ 12 တီႈ Silver Sky Hotel တုမ်ႉတိူဝ်ႉႁိူၼ်းယေး ၵူၼ်းမိူင်း။

ဝၼ်းတီႈ 04/09/2024 ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ႁွတ်ႈထိုင်ဝဵင်းတူၼ်ႈတီးသေ လၢတ်ႈဝႃႈ ဢိင်ၼိူဝ်ငဝ်းလၢႆးသေ တေဢၢၼ်းၵုမ်းဢဝ်ၶိုၼ်း ပိုၼ်ႉတီႈဢၼ်လႆႈပွႆႇသုမ်းၵႂႃႇ ၽွင်းပၢင်တိုၵ်း ဝႃႈၼႆ။

တင်ႈတႄႇ သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇယိုတ်းလႆႈ တီႈဝဵင်းလႃႈသဵဝ်ႈသေ ၶၢဝ်းတၢင်းလိူၼ်ပၢႆၼႆႉ လွင်ႈယိုဝ်းၵၼ် ဢမ်ႇမီးယဝ်ႉသေတႃႉ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇယဝ်ႉ ဢမ်ႇယွမ်း 3 ၵမ်း။ 

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)