ၽူႈတႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈလွႆလႅမ် လႄႈ ၸႄႈတွၼ်ႈလၢင်းၶိူဝ်း တုၵ်းယွၼ်း တၢင်ႇထိုင် ၼႂ်းပၢင်ၵုမ်သၽႃးၸိူဝ်ႉၸၢတ်ႈ လွင်ႈၼမ်ႉ ၼွင်ၶမ်း ဢၼ်ၵူၼ်းမိူင်းလႆႈၸႂ်ႉတိုဝ်းတႃႇႁဵတ်းႁႆႈသူၼ်ၼႃး ႁိမ်း 100 ဢေႊၶိူဝ်ႊၼၼ်ႉ ႁႂ်ႈၾၢႆႇလူင်ပွင်ၸိုင်ႈ ၸွႆႈ ၵုမ်းလုမ်းလႃးၸွႆႈ ဝႃႈၼႆ။

ဝၼ်းတီႈ 15/06/2018 ပၢင်ၵုမ်သၽႃးၸိူဝ်ႉၸၢတ်ႈ ပွၵ်ႈၵမ်း 2 ၵမ်းထူၼ်ႈ 6 ၼၼ်ႉ ၽူႈတႅၼ်းသၽႃးၸိူဝ်ႉၸၢတ်ႈ ၸႄႈ တွၼ်ႈလွႆလႅမ် ၸၢႆးထုၼ်းဢွင်ႇ တၢင်ႇလၢတ်ႈၼႂ်းပၢင်ၵုမ်သၽႃးဝႃႈ ၼမ်ႉၼွင်ၶမ်း ဢၼ်မီးၼႂ်းဝဵင်းလၢႆးၶႃႈ ၼၼ်ႉ ပဵၼ်ၼမ်ႉၼွင် ဢၼ်ပၼ်ၵူၼ်းမိူင်းၸႂ်ႉတိုဝ်းတႃႇႁဵတ်းသူၼ်ႁႆႈၼႃး ၸွမ်းႁိမ်းႁွမ်းၼၼ်ႉလႄႈ ၶႂ်ႈႁႂ်ႈ ၾၢႆႇလူင် ပွင်ၸိုင်ႈမိူင်းတႆးၸွႆႈ ၵေႃႇၵုမ်းလုမ်းလႃးပၼ် ႁႂ်ႈၵူၼ်းမိူင်းလႆႈၸႂ်ႉတိုဝ်းၵႂႃႇၶၢဝ်းယၢဝ်း။ ယူႇတီႈၽွင်းလူင် ၾၢႆႇၽုၵ်ႇ သွမ်ႈ၊ လဵင်ႉလူတူဝ်သတ်းလႄႈ ႁွင်ႈၼမ်ႉ တွပ်ႇလၢတ်ႈဝႃႈ ဝၢႆးၾူၼ်ၼႆႉ တေလူင်းပိုၼ်ႉတီႈ ၵူတ်ႇထတ်းတူၺ်းယူႇ ဝႃႈၼႆ။

ၸၢႆးထုၼ်းဢွင်ႇ ၽူႈတႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ “ ၼမ်ႉၼွင်ၶမ်းၼႆႉ မီး မႃးတင်ႈတႄႇပၢၼ်ၸဝ်ႈၾႃႉယဝ်ႉ။ မိူဝ်ႈပၢၼ်ၸဝ်ႈၾႃႉၼၼ်ႉ ၼမ်ႉၼွင်ၶမ်းၼႆႉ ယႂ်ႇလိူဝ်တေႃႈလဵဝ်ၼႆႉထႅင်ႈ 3 ပုၼ်ႈ လူးၵွၼ်ႇ။ ယၢမ်းလဵဝ် ယွၼ်ႉပိူဝ်ႈပီမၼ်းႁိုင်ယဝ်ႉလႄႈ ၼမ်ႉၼွင်ၵေႃႈႁႅင်ႈမႃး။ ၾင်ႇၼွင်ၵေႃႈလူမ်ႇၵွႆ။ ဢမ်ႇၵဵပ်း ၼမ်ႉပၼ်လႆႈလီယဝ်ႉလႄႈ ၶႂ်ႈႁႂ်ႈလူင်ပွင်ၸိုင်ႈမႃးလုမ်းလႃးၵေႃႇတႅၼ်ႈ၊ ၵေႃႇၾင်ႇပၼ် သင်ဝႃႈ တေဢဝ်ႁႅင်းၵူၼ်း မိူင်း လၢႆးၶႃႈသေ ႁဵတ်းသၢင်ႈၵႂႃႇၸိုင် မၼ်းဢမ်ႇငၢႆႈ” ဝႃႈၼႆ။

ၼမ်ႉၼွင်ၶမ်းၼႆႉ မီးၾၢႆႇၸဵင်ႇႁွင်ႇဝၼ်းဢွၵ်ႇ ဝဵင်းလၢႆးၶႃႈ။ ယွၼ်ႉပိူဝ်ႈမီးတိတ်းၸပ်းဝဵင်းလႄႈ ပေႃးမႄးၵုမ်းလုမ်း လႃး လီလီၸိုင် ၸၢင်ႈပဵၼ်ပႃးတီႈဢႅဝ်ႇယဵမ်ႈမုင်ႈသႃႇဢၼ်ၼိုင်ႈ ဝႃႈၼႆ။

ယၢမ်းလဵဝ် တၢင်းၵႂၢင်ႈၼမ်ႉၼွင်ၼႆႉ တၢင်းယၢဝ်း မီးမွၵ်ႈ 1,000 ထတ်း၊ တၢင်းပွတ်း တေမီးမွၵ်ႈ 500 ထတ်း ဝႃႈၼႆ။