ၾူၼ်ဢမ်ႇတူၵ်းၵေႃႈ ၼမ်ႉႁူၺ်ႈၼွင်းလူၵ်ႈ သွင်မႄႈလုၵ်ႈတၢႆ တီႈဝဵင်းဢွင်ႇပၢၼ်း

တီႈဝဵင်းဢွင်ႇပၢၼ်း ၸိုင်ႈတႆးပွတ်းၸၢၼ်းၼၼ်ႉ ၾူၼ်ဢမ်ႇတူၵ်းသေ ၼမ်ႉႁူၺ်ႈၵိုင်ႉၵၢင်ႉၼွင်း လၢၵ်ႈသွင်မႄႈလုၵ်ႈလႆၸွမ်းၼမ်ႉတၢႆ။

ဝၼ်းတီႈ 04/09/2024 ယၢမ်းဝၢႆးဝၼ်း 4 မူင်း ၼၢင်းၼေႃႇ ဢႃယု 24 ပီလႄႈ လုၵ်ႈယိင်း ၵေႃႉလဵၵ်ႉဢွၼ်ႇ တိုၵ်ႉလႆႈ 6 လိူၼ် ၵူၼ်းဝၢၼ်ႈထီႇသိမ်ႇ (ထီသိမ်) ၸႄႈဝဵင်းဢွင်ႇပၢၼ်း (ဢုမ်ႇပဝ်း) လုၵ်ႉတီႈသူၼ်သေ ဢၢၼ်းပွၵ်ႈၶိုၼ်းႁိူၼ်း ၽွင်းလတ်းႁူၺ်ႈၼၼ်ႉ ၼမ်ႉလွႆလေႃႈလူင်းမႃးၸွမ်းႁူၺ်ႈႁႅင်းသေ လၢၵ်ႈဢဝ်သွင်မႄႈလုၵ်ႈ လွင်ႈၵႂႃႇၸွမ်း လူႉတၢႆ ဝႃႈ ၼႆ။  

ၵူၼ်းၸွႆႈ ထႅမ်ပရႁိတ ဝဵင်းဢွင်ႇပၢင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “လွင်ႈၸိူင်ႉၼႆ တီႈဝဵင်းဢွင်ႇပၢၼ်းၼႆႉ ပဵၼ်ပွၵ်ႈဢွၼ်တၢင်းသုတ်း ဢၼ်ႁဝ်းၶႃႈ ယၢမ်ႈထူပ်း ၸိူင်ႉၼႆ။ ႁူၺ်ႈႁိမ်းဝၢၼ်ႈၼၼ်ႉ ပဵၼ်ႁူၺ်ႈႁႅင်ႈ။ ပေႃးၾူၼ်တူၵ်း ၼမ်ႉလွႆၸင်ႇလူင်းမႃး။ မိူဝ်ႈဝႃးၼႆႉတႄႉ ၾူၼ်ဢမ်ႇတူၵ်းသေ ၼမ်ႉလွႆၵိုင်ႉၵၢင်ႉလႆ။ လႅပ်ႈတေပဵၼ် ၾူၼ်တူၵ်း တွၼ်ႈတၢင်းၼိူဝ်ႁူၺ်ႈလႄႈ ၼမ်ႉလွႆၸင်ႇလေႃႈလူင်းမႃး။ သွင်မႄႈ လုၵ်ႈဢမ်ႇပေႉႁႅင်းၼမ်ႉသေ လွင်ႈလႆၸွမ်းလူႉတၢႆ”- ဝႃႈၼႆ။

ဝၢႆးၶဝ်မႄႈလုၵ်ႈႁၢႆ ၵူၼ်းဝၢၼ်ႈၸွမ်းႁႃၸွမ်းသၢႆႁူၺ်ႈသၢႆႁွင်ႈ။ ထိုင်ဝၢႆးဝၼ်း ၵႂႃႇႁၼ်တူဝ်တၢႆၵေႃႉပဵၼ်မႄႈ လွၵ်ႈလိူတ်ႈ မၢတ်ႇၸဵပ်းၸွမ်းၼႃႈ ၊ ၸွမ်းၵွၵ်းႁူဝ်။ တေႃႇထိုင် မိူဝ်ႈၼႆႉ ဝၼ်းတီႈ 05/09/2024 တႄႉ တူဝ်တၢႆလုၵ်ႈဢွၼ်ႇ ယင်းပႆႇ ႁၼ်။ 

“တူဝ်တၢႆ မႄႈလုၵ်ႈဢွၼ်တႄႉႁၼ်ယဝ်ႉ မီးလွင်ႈမၢတ်ႇၸဵပ်း တီႈၵွၵ်းႁူဝ်၊ ၼႃႈ ၸိူဝ်းၼႆႉ။ တူဝ်တၢႆလုၵ်ႈ ဢွၼ်ႇလဵၵ်ႉတႄႉပႆႇႁၼ်။ တူဝ်လုၵ်ႈဢွၼ်ႇလဵၵ်ႉၼႃႇလႄႈ ယူဝ်သၢႆးထူမ်၊ ၵူမ်ႇထူမ် ပႅတ်ႈယဝ်ႉႁိုဝ်ၵေႃႈ ပဵၼ်လႆႈ။ ၵူၺ်းၵႃႈ တိုၵ်ႉသိုပ်ႇႁႃယူႇ” – ဝႃႈၼႆ။

ဝၢၼ်ႈထီႇသိမ်ႇၼႆႉ ယၢၼ်ၵႆၵၼ်တင်းဝဵင်းဢွင်ႇပၢၼ်း 13 လၵ်း။ မိူဝ်ႈၼႆႉ ဝၼ်းတီႈ 05/09/2024 ယၢမ်း ၵၢင်ဝၼ်းတႄႉ ၸုမ်းၸွႆႈထႅမ်လႄႈ ၵူၼ်းဝၢၼ်ႈ ဢွၼ်ၵၼ်လုမ်းလႃးၶၢပ်ႈတူဝ် ၼၢင်းၼေႃႇ မႄႈလုၵ်ႈဢွၼ်ႇၼၼ်ႉယူႇ ၸုမ်းၸွႆႈထႅမ် ပရႁိတ လၢတ်ႈၼင်ၼႆ ။

လိူဝ်ၼၼ်ႉ ၸုမ်းၸွႆႈထႅမ် ၾၢင်ႉပႃးဝႃႈ – ႁႂ်ႈၵူၼ်းပိုၼ်ႉတီႈ ဢဝ်လွင်ႈၼႆႉပဵၼ်တွၼ်ႈသွၼ်သေ ၽွင်းၶၢဝ်းႁိုဝ်ႉၶၢဝ်း ၾူၼ်ၼႆႉ သင်ဝႃႈ ၵႂႃႇႁဵတ်းၵၢၼ်သူၼ်ၵၢၼ်ႁႆႈမႃး တေလတ်းႁူၺ်ႈလတ်းႁွင်ႈၸိုင် ၶႂ်ႈႁႂ်ႈၾၢင်ႉတူၺ်းၼႃႈၾႃႉတႃ ၾူၼ်သေ ၸင်ႇလတ်း ဝႃႈၼႆ။

 တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)