ၾူၼ်တူၵ်းႁႅင်း ၼႂ်းထုင်ႉဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁဵတ်းႁႂ်ႈၼမ်ႉလႆ ၶဝ်ႈထူမ်ႈ ၸွမ်းတီႈတႅမ်ႇတီႈယၢၼ်း ၵူၼ်းဝၢၼ်ႈ ဢမ်ႇတၼ်းၶၢႆႉၶူဝ်းၶွင်ၸႂ်ႉသွႆ လႆလွင်ႈၸွမ်းၼမ်ႉသုမ်းမူတ်း။
ဝၼ်းတီႈ 01/09/2024 ယၢမ်းၵၢင်ဝၼ်းတဵင်ႈ ယွၼ်ႉၾူၼ်တူၵ်းႁႅင်းသေ ၼမ်ႉႁူၺ်ႈၼမ်ႉလွႆ လႆၶဝ်ႈထူမ်ႈ ၼႂ်းဝၢၼ်ႈၵွင်းလၢင်း ဝဵင်းၼမ်ႉလၼ်ႈ။
ၵဵဝ်ႇလူၺ်ႈလွင်ႈၼႆႉ ပေႃႈလုၵ်ႈဢွၼ်ႇ ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ မိူဝ်ႈဝႃးယၢမ်း 12 မူင်းၼႆႉ ၼမ်ႉႁူၺ်ႈၼမ်ႉလွႆ ၵိုင်ႉၵၢင်ႉလႆလူင်းမႃးလႄႈ ၶူဝ်းၶွင်ႁိူၼ်းယေး ဢမ်ႇတၼ်းလႆႈသင်။ ပႃးၵႂႃႇၸွမ်းၼမ်ႉမူတ်း။ မိူဝ်ႈၼႆႉတႄႉ ၼမ်ႉယွမ်းလူင်းၶိုၼ်းယဝ်ႉ။ ၼမ်ႉတေထူမ်ႈႁိူၼ်း ၵူၼ်းမိူင်းၼႂ်းဝၢၼ်ႈၵွင်းလၢင်းၼႆႉ ၵမ်ႈၼမ် ၶႃႈဢေႃႈ ”- ဝႃႈၼႆ။
ၼမ်ႉႁူၺ်ႈၼမ်ႉလွႆ လႆလူင်းထူမ်ႈ ပွၵ်ႈၼႆႉ ၶႂ်ႈဝႃႈလႆႈလူင်းဝႆးလႄႈ ၼမ်လိူဝ်ၵူႈပီ ၵူၼ်းပိုၼ်ႉတီႈဢမ်ႇ တၼ်းႁူႉတူဝ်။ ပေႃးၾူၼ် တေတူၵ်းသမ်ႉ ပေႃးမႆႈၸႂ် ၵူဝ်ႁႄပႂ်ႉထႃႈယူႇယဝ်ႉ ဝႃႈၼႆ။
“မိူဝ်ႈပီၵၢႆၵေႃႈ ၼမ်ႉထူမ်ႈၶႃႈဢေႃႈ။ မိူဝ်ႈလဵဝ် ၼမ်ႉယွမ်းဝႆႉသေတႃႉ ၵူဝ်မၼ်းၶိုၼ်ႈၶိုၼ်းၶႃႈဢေႃႈ။ ပၢင်တိုၵ်းၵေႃႈ ယင်းပႆႇယဵၼ်။ သမ်ႉမႃးၺႃးၽေးၼမ်ႉထႅင်ႈၼႆႉ ယၢပ်ႇတႄႉတႄႉ ၶႃႈဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။
ၼၢင်းယိင်း မႄႈလုၵ်ႈဢွၼ်ႇလဵၵ်ႉ ၵူၼ်းၼမ်ႉလၼ်ႈ ဢၼ်လႆႈပၢႆႈၽေးသိုၵ်းသိူဝ် ၵႂႃႇယူႇဝႆႉတၢင်း မိူင်းၵိုင် ၼၼ်ႉၵေႃႈ လၢတ်ႈတီႈၽူႈတွႆႇႁွၵ်ႈဝႃႈ – “ထူပ်းၽေးသိုၵ်းယဝ်ႉ ဢမ်ႇၵႃး ထူပ်းၽေးသၽႃႇဝ ပႃးထႅင်ႈ၊ တေလႆႈပွၵ်ႈၶိုၼ်း ႁိူၼ်းမိူဝ်ႈလႂ်ၵေႃႈ ဢမ်ႇႁူႉ ပဵၼ်ဢၼ်ယၢပ်ႇၽိုတ်ႇၵိၼ်းၸႂ်လႄႈ မႆႈၸႂ်တႃႇ ၵိၼ်တႃႇလဵင်ႉၵၼ်တႄႉတႄႉ”- ဝႃႈၼႆ။
တင်ႈတႄႇ ႁၢင်လိူၼ်ဢေႃႊၵတ်ႊသ် ပီ 2024 ၼႆႉမႃး တပ်ႉသိုၵ်းမၢၼ်ႈ ဢၼ်မီးၼႂ်းဝဵင်းၼမ်ႉလၼ်ႈ ၵႆႉယိုဝ်းၵွင်ႈလူင် ၵႂႃႇတၢင်းဝၢၼ်ႈၼွင်ၵေႃႈ ၸႄႈဝဵင်းသီႇပေႃႉသေ ၵူၼ်းမိူင်း ဢွၼ်ၵၼ်ပၢႆႈၽေးသိုၵ်းဝႆႉ။ တေႃႇထိုင်ယၢမ်းလဵဝ်ၵေႃႈ သိုၵ်းတင်း သွင်ၾၢႆႇတိုၵ်ႉၶဵင်ႈၶႅင်ၵၢၼ် သိုၵ်းတေႃႇၵၼ် ယူႇၵေႃႈပိူင်ၼိုင်ႈ ယွၼ်ႉၾူၼ်တူၵ်းၼမ်ႉထူမ်ႈၵေႃႈ ပိူင်ၼိုင်ႈ ႁဵတ်းႁႂ်ႈၵူၼ်းမိူင်း ဢမ်ႇႁတ်းပွၵ်ႈၶိုၼ်းႁိူၼ်းယေး၊ ၸိူဝ်းၵိုတ်းဝႆႉ ၼႂ်းဝၢၼ်ႈၼႂ်းဝဵင်းၵေႃႈ ထူပ်းတၢင်းယၢပ်ႇၽိုတ်ႇ လၢႆလွင်ႈလၢႆတၢင်း။
တႅမ်ႈ – ၼၢင်းသႅင်ၶမ်း (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ