ႁွင်ႈၵၢၼ်ၾၢႆႇတေႃႉသူင်ႇ လူင်ပွင်ၸိုင်ႈမိူင်းတႆး တေႁဵတ်းပၼ်ဝႂ်ၶွၼ်ႇ လၢႆႊသိၼ်ႊလူတ်ႉၶိူင်ႈ တီႈလၢႆးၶႃႈ ၼႂ်းဝၼ်းတီႈ 27 -28/06/2018 လႄႈပွင်ႇလႅင်းႁႂ်ႈၵူၼ်းမိူင်း လူင်းသဵၼ်ႈသၢႆမၢႆဝႆႉ တီႈၽူႈမီးပုၼ်ႈၽွၼ်းၶဝ်ဝႃႈၼႆ။
တႄႇဝၼ်းတီႈ 15/06/2018 ၸဝ်ႈၼႃႈတီႈၾၢႆႇလူတ်ႉၵႃးၸႄႈဝဵင်းလၢႆးၶႃႈ ပွင်ႇလႅင်းထိုင်ၵူၼ်း ဝၢၼ်ႈၵူၼ်းမိူင်း ၼႂ်းပွၵ်ႉၼႂ်းယွမ်ႇ ႁႂ်ႈဢွၼ်ၵၼ်လူင်းသဵၼ်ႈသၢႆမၢႆ တႃႇႁဵတ်းဝႂ်လၢႆႊသိၼ်ႊလူတ်ႉၶိူင်ႈ။ ဢၼ်ၾၢႆႇၸဝ်ႈၼႃႈတီႈလူတ်ႉၵႃး တေလူင်းႁဵတ်းပၼ် ၼႂ်းဝၼ်းတီႈ 27 – 28/06/2018 ၼႆႉ။
လၢႆႊသိၼ်ႊ (ၶွၼ်ႇ) လူတ်ႉၶိူင်ႈဢၼ်ၾၢႆႇပလိၵ်ႈ တေလူင်းႁဵတ်းပၼ်ၼႆႉ ၸဝ်ႈၼႃႈတီႈၶဝ် တေတူၺ်းသႅၼ်း လူတ်ႉၶိူင်ႈသေ တတ်းမၵ်းၵႃႈမၼ်း မိူၼ်ၼင်ႇလူတ်ႉၶိူင်ႈ ဢၼ်မႃးတၢင်းမိူင်းၶႄႇၼႆႉ ၵႃႈၶၼ်ဢၼ်ထုၵ်ႇသုတ်းတူၵ်းယူႇ 39,850 ပျႃး ဢၼ်ၵႃႈသုတ်းတူၵ်းယူႇ 87,35 0ပျႃး ။ လူတ်ႉၶိူင်ႈၸိူဝ်းဢၼ်မႃးတၢင်းမိူင်းထႆးတႄႉ ၵႃႈႁဵတ်းဝႂ်ၶွၼ်ႇတေတိူဝ်းၵႃႈလိူဝ် ဢၼ်မႃးတၢင်းမိူင်းၶႄႇ။
ၸၢႆးလႅင်းႁိူင်း ၽူႈၵိူဝ်းၵုမ် ၸုမ်းၵူၼ်းၼုမ်ႇလၢႆးၶႃႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ -“ ၾၢႆႇလူတ်ႉၵႃးၶဝ် ပွင်ႇလႅင်းထိုင်ၽူႈၵွၼ်းပွၵ်ႉဢိူင်ႇ ၵူၼ်းလူင်ဝၢၼ်ႈလႂ်ဝၢၼ်ႈၼၼ်ႉ ႁႂ်ႈပွင်ႇလႅင်း ထိုင်လုၵ်ႈဝၢၼ်ႈၽႂ်မၼ်း ၸိူဝ်းဢၼ်မီးလူတ်ႉၶိူင်ႈၼၼ်ႉ သင်ၶႂ်ႈႁဵတ်းဝႂ်လၢႆႊသိၼ်ႊၼႆ ႁႂ်ႈဢွၼ် ၵၼ်လူင်းသဵၼ်ႈမၢႆဝႆႉ ပေႃးထိုင်ဝၼ်းတီႈ 27-28/06/ 2018 ၼႆၶဝ်တေမႃးႁဵတ်းပၼ် ၼႆဢေႃႈ။ မိူဝ်ႈၽွင်းပိူၼ်ႈႁဵတ်းပၼ်ၼႆႉ ႁၼ်ထိုင်ဝႃႈ ႁဝ်းၶႃႈဢွၼ်ၵၼ်ႁဵတ်းၵေႃႈလီယူႇ ပေႃးမိူဝ်းၼႃႈမႃး ၵႂႃႇလႂ်မႃးလႂ်ၵေႃႈတေထၢင်ႇႁၢင်ႈ။ ၵႃႈပူၼ်ႉမႃးၼႆႉ ပေႃးႁဵတ်းၼိုင်ႈၵမ်းၼႆၸႂ်ႉလႆႈမွၵ်ႈ 2 ပီ ၊ 2 ပီတေႃႇၼိုင်ႈပွၵ်ႈဢေႃႈ ” ဝႃႈၼႆ။
တႄႇဝၼ်းတီႈ 11/06/2018 မႃးၼႆႉ ၾၢႆႇလူတ်ႉၵႃး၊ ပလိၵ်ႈဢိၵ်ႇၾၢႆႇၵဵဝ်ႇၶွင်ႈ ႁူမ်ႈၵၼ်လူင်းပိုၼ်ႉတီႈ ၵူတ်ႇထတ်းလူတ်ႉၵႃးဢမ်ႇမီးၶွၼ်ႇ ၼႂ်းၸိုင်ႈတႆးပွတ်းၸၢၼ်းလၢႆဝဵင်း မိူၼ်ၼင်ႇလွႆလႅမ်၊ ပၢင်လွင်း၊ ၼမ်ႉၸၢင် ၊ ၼႂ်းၸိုင်ႈတႆးပွတ်းဢွၵ်ႇသမ်ႉ တႃႈၶီႈလဵၵ်း၊ ၵဵင်းတုင် ၸိူဝ်းၼႆႉ။ ၼႂ်းမိူင်းတႆးၼႆႉ ၸုမ်းယိပ်းၵွင်ႈၵၢင်ႇၼမ် ၵူၼ်းႁဵတ်းၵၢၼ်ပၢႆးမၢၵ်ႈမီးၵေႃႈၼမ် တႃႇတေႁဵတ်း ဝႂ်ႂ်ၶွၼ်ႇၵေႃႈယၢပ်ႇ လႆႈသဵင်ႈငိုၼ်းၼမ် ၵွပ်ႈၼၼ်လႄႈ လူတ်ႉၵႃးဢၼ်ဢမ်ႇမီးၶွၼ်ႇၼႂ်းမိူင်းတႆးၼႆႉ မီးၼမ် ။
Photo by- Sai Lang Herng LaiKha
