ႁၢၼ်လဵတ်း ၸတ်းပၢင်ပိုတ်ႇပပ်ႉ ႁၢင်ႈလူၼ်ႉၵိူဝ်ႉၵၢၼ်မိူင်း

မေႃတႅမ်ႈႁၢင်ႈလူၼ်ႉ ႁၢၼ်လဵတ်း (ႁွင်ႉ) ၸၢႆးသၢႆလႅတ်ႇ ၸတ်းႁဵတ်းပၢင်ပိုတ်ႇပပ်ႉ ႁၢင်ႈလူၼ်ႉၵိူဝ်ႉၵၢၼ်မိူင်း တီႈ ဝဵင်းတႃႈၵုင်ႈ ပဵၼ်ပွၵ်ႈၵမ်းႁႅၵ်ႈ။

ဝၼ်းတီႈ 14/06/2018 မေႃတႅမ်ႈႁၢင်ႈလူၼ်ႉ ၸိုဝ်ႈသဵင်ယႂ်ႇ ၼႂ်းမိူင်းႁူမ်ႈတုမ် ႁၢၼ်လဵတ်း(ႁွင်ႉ) ၸၢႆး သၢႆလႅတ်ႇ ၸတ်းႁဵတ်းပၢင်ပိုတ်ႇပပ်ႉႁၢင်ႈလူၼ်ႉ ၵိူဝ်ႉၵၢၼ်မိူင်း မၢႆ 3 လႄႈ ၸတ်းပႃးပၢင်သပ်းၸႅင်ႈၶၢဝ်ႇ တီႈႁူင်းၼႄပၢၼ်း သီ(ႁၢင်ႈ) Moon Art Gallery ဝဵင်းတႃႈၵုင်ႈ။ မီးမေႃတႅမ်ႈႁၢင်ႈ တင်း ၽူႈသိုဝ်ႇၶၢဝ်ႇ ၶဝ်ႈႁူမ်ႈပၼ်ႁႅင်း တင်းၼမ် ဝႃႈၼႆ။

ၸၢႆးႁၢၼ်လဵတ်း မေႃတႅမ်ႈႁၢင်ႈလူၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ၸဵမ်မိူဝ်ႈတႄႇတႅမ်ႈၵေႃႈ တႅမ်ႈႁၢင်ႈလူၼ်ႉ ၵၢၼ်မိူင်းၵမ်းလဵဝ်။ လႆႈတႅမ်ႈႁၢင်ႈ ပိုၼ်ၽႄႈၼႂ်းမူႇၸုမ်းမႃး။ တႅမ်ႈသႂ်ႇတီႈမၢင်ၸေႈ ၵူၺ်း ၼႂ်းၵႃႊတုၼ်ႊဢၼ် ၶႃႈတႅမ်ႈဢွၵ်ႇမႃးၼၼ်ႉ ၶႃႈႁဝ်းဢမ်ႇလူင်းလၢႆးမိုဝ်း ပဵၼ်ၶွင်ၶႃႈ။ ထိုင်ၶႃႈႁဝ်း လႆႈတႅမ်ႈႁၢင်ႈလွတ်ႈလွတ်ႈလႅဝ်း လႅဝ်းမႃး ၸင်ႇတေလူင်းလၢႆးမိုဝ်း တူဝ်ၸဝ်ႈၵဝ်ႇပႃးၸွမ်း” ဝႃႈၼႆ။

ဢၼ်လႆႈတႅမ်ႈႁၢင်ႈၵိူဝ်ႉၵၢၼ်မိူင်းမႃးၼႆႉ တင်းမူတ်း ပိုၼ်ၽႄႈ 3 ပပ်ႉ ပႃးၼႆႉယဝ်ႉ။ ပပ်ႉမၢႆ 1 လႄႈ 2 ပိုၼ်ၽႄႈ တီႈႁွင်ႈၵၢၼ်ၶၢဝ်ႇဢေႊယႃႊဝႃႊတီႊ၊ ပပ်ႉမၢႆ 3 သမ်ႉ တိုၵ်ႉပိုတ်ႇတူဝ် မိူဝ်ႈၼႆႉ ဝၼ်းတီႈ 14 ။ ၵမ်ႈၼမ် ပဵၼ်ႁၢင်ႈ လူၼ်ႉၵိူဝ်ႉၵၢၼ်မိူင်း တႅမ်ႈၸွမ်းငဝ်းလၢႆး ၵၢၼ်မိူင်း ဢၼ်ပဵၼ်ယူႇယၢမ်းလဵဝ်။

ၼႂ်းပၢင်ပိုတ်ႇပပ်ႉႁၢင်ႈလူၼ်ႉ ၵိူဝ်ႉၵၢၼ်မိူင်း ႁၢၼ်လဵတ်းၼႆႉ မီးၽူႈသိုဝ်ႇၶၢဝ်ႇတင်း မေႃတႅမ်ႈႁၢင်ႈလူၼ်ႉ လၢႆလၢႆၵေႃႉ ၶဝ်ႈႁူမ်ႈ။ တူဝ်ၶူးႁၢၼ်လဵတ်းလူင်းလၢႆးမိုဝ်းမၢႆတွင်းပၼ်ပႃးၸွမ်း။ ပပ်ႉၵႃႊတုၼ်ႊၼႆႉ ပႃးဝႆႉႁၢင်ႈလူၼ်ႉ 160 လွၵ်း။ 200 ၼႃႈ ၶၢႆ 1 ပပ်ႉ 4,000 ပျႃး ဝႃႈၼႆ။

ႁၢၼ်လဵတ်းၼႆႉ ပဵၼ်ၵူၼ်းၸႃတိ ဝဵင်းၼွင်မွၼ် ၸိုင်ႈတႆးပွတ်းၸၢၼ်း။ မိူဝ်ႈပီ 1982 တေႃႇထိုင် 1984 ၼၼ်ႉ လႆႈ ၶဝ်ႈႁဵၼ်း တီႈႁူင်းႁဵၼ်းပၢၼ်းသီ ဝဵင်းတႃႈၵုင်ႈ။ ဝၢႆးလင်ႁဵၼ်းယဝ်ႉ တႅမ်ႈႁၢင်ႈ တီႈႁူင်းၼႄၸိူင်းငဝ်း မျႃႉသုၶ ဝဵင်း တူၼ်ႈတီးသေ ႁႃၵိၼ်လဵင်ႉတွင်ႉ။ မိူဝ်ႈပီ 1988 ၼၼ်ႉ ၶၢႆႉယူႇၵဵင်းမႆႇ ၸိုင်ႈထႆးသေ တႅမ်ႈႁၢင်ႈ လူၼ်ႉ/ၵႃႊတုၼ်ႊ ပၼ် တႃႇၽိုၼ်လိၵ်ႈၽိုၼ်ၶၢဝ်ႇ မူႇၸုမ်းၸိူဝ်းပၵ်းဝႆႉတီႈမိူင်းၼွၵ်ႈ။ ပိူင်ယႂ်ႇမၼ်း လႆႈတႅမ်ႈပၼ်တႃႇ ၵေႃၶၢဝ်ႇၽူႈတွႆႇ ႁွၵ်ႈ လႄႈ ၵေႃၶၢဝ်ႇဢေႊယႃႊဝႃႊတီႊ။ မိူဝ်ႈပီ 2015 ၼၼ်ႉ ၶိုၼ်းၶၢႆႉ ယူႇတီႈဝဵင်းပၢင်လူင် ၸိုင်ႈတႆးပွတ်းၸၢၼ်းသေ သိုပ်ႇတႅမ်ႈၵႃႊတုၼ်ႊၾၢႆႇၵၢၼ်မိူင်းတင်းၼမ် တေႃႇထိုင်ဝၼ်းမိူဝ်ႈၼႆႉ။