ၶၼ်ငိုၼ်းမၢၼ်ႈ ၶိုၼ်ႈမႃးၶိုၼ်းဢိတ်းဢီႈ ယဝ်ႉသေတႃႉ ၶၼ်ၵုၼ်ႇၶူဝ်းၶွင် ဢမ်ႇယွမ်းလူင်းလႄႈ ၵူၼ်းမိူင်းယၢပ်ႇတႃႇႁႃၵိၼ်လဵင်ႉတွင်ႉ ဝႃႈၼႆ။

မိူဝ်ႈလိူၼ်ၵျူႊလၢႆႊပူၼ်ႉမႃး ၶၼ်ငိုၼ်းမၢၼ်ႈ တူၵ်းႁႅင်း ၶၼ်ငိုၼ်းၶႄႇလႄႈ ၶၼ်ငိုၼ်းထႆး ၵိုင်ႉၵၢင်ႉၶိုၼ်ႈလိူဝ်လႄႈ ၶၼ်ၵုၼ်ႇၵူႈၸိူဝ်ႉၵူႈလွင်ႈ ၵိုင်ႉၵၢင်ႉပုင်ႈၶိုၼ်ႈမွၵ်ႈ 3 ပုၼ်ႈ ႁဵတ်းႁႂ်ႈၵူၼ်းမိူင်း ၸိူဝ်းပၢႆႈၽေး သိုၵ်းလႄႈ ၸိူဝ်းဢမ်ႇပၢႆႈၽေးသိုၵ်း ယၢပ်ႇၽိုတ်ႇမိူၼ်ၵၼ် တင်းမူတ်း။

ၸဝ်ႈႁၢၼ်ႉၶဝ်ႈၽၵ်း ဝဵင်းၼမ်ႉၸၢင် ၵေႃႉၼိုင်ႈ လၢတ်ႈၽူႈတွႆႁွၵ်ႈဝႃႈ -“ၵူႈပွၵ်ႈၼႆႉတႄႉ ပေႃးၵိၼ် ပေႃးၸႂ်ႉယူႇ ယၢမ်းလဵဝ် ယွၼ်ႉၶၼ်ၵုၼ်ႇၶိုၼ်ႈႁႅင်းၼႃႇလႄႈ တေသိုပ်ႇၶၢႆထႅင်ႈၵေႃႈ သမ်ႉပေႃးၵဵင်ၸႂ် ဢီးလူၵူၼ်းသိုဝ်ႉမၼ်းယဝ်ႉ။ ပေႃး ဢမ်ႇၶိုၼ်ႈၵႃႈမၼ်းၵေႃႈ သမ်ႉဢမ်ႇၵိုတ်းဢမ်ႇလိူဝ်သင် ၶိူင်ႈၸႂ်ႉၼႂ်းႁၢၼ်ႉ မၢင်ၸိူဝ်းတင်းႁႃသိုဝ်ႉဢမ်ႇလႆႈ”- ဝႃႈၼႆ။

ၶၼ်ငိုၼ်းမၢၼ်ႈ တူၵ်းႁႅင်း 1 သႅၼ်ပျႃး လႅၵ်ႈလႆႈငိုၼ်းထႆး 490 ဝၢတ်ႇၵူၺ်း လႅၵ်ႈငိုၼ်းၶႄႇလႆႈ 100 ယႂၼ်ႊၵူၺ်း။ သိုဝ်ႉငိုၼ်းဢမေႊရိၵၼ်ႊ 1 တေႃႊလႃႊ လႆႈပၼ်ထိုင် 5,700 ပျႃး။ ၶၼ်ၵုၼ်ႇၵေႃႈ ၵိုင်ႉၵၢင်ႉပုင်ႈၶိုၼ်ႈ။

ၵူၺ်းၵႃႈ ယၢမ်းလဵဝ် ငိုၼ်းမၢၼ်ႈ 1 သႅၼ်ပျႃး လႅၵ်ႈလႆႈငိုၼ်းထႆး ပဵၼ် 630 ဝၢတ်ႇ ၊ လႅၵ်ႈလႆႈငိုၼ်းၶႄႇ ပဵၼ် 200 ယႂၼ်ႊ ဝႃႈၼႆသေတႃႉ ၶၼ်ၵုၼ်ႇၶူဝ်းၵိၼ် ဢၼ်သုင်ဝႆႉၼၼ်ႉတႄႉ ဢမ်ႇယွမ်းလူင်းၶိုၼ်း။

ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“တေႃႈလဵဝ် ၽေးသိုၵ်းၵေႃႈလႆႈပၢႆႈ။ ငိုၼ်းၶဝ်ႈၵေႃႈ ဢမ်ႇမီး။ ဢၼ်လႆႈသိုဝ်ႉၵိၼ်သမ်ႉ ၵႃႈယႂ်ႇ။ ၶၼ်ၵုၼ်ႇၼႆႉ ပေႃးလႆႈၶိုၼ်ႈယဝ်ႉ ဢမ်ႇယွမ်းလူင်းၶိုၼ်းယဝ်ႉ၊ ယၢပ်ႇတႃႇႁႃၵိၼ်လဵင်ႉတွင်ႉ။ တေႃႈလဵဝ်ၵေႃႈ မီးငိုၼ်းဢၼ်ၸဝ်ႈၸေႇတၼႃႇ ၶဝ်ၸွႆႈထႅမ်မႃးၼၼ်ႉ ဢိတ်းဢွတ်းၵူၺ်းယဝ်ႉ”- ဝႃႈၼႆ။

ယၢမ်းလဵဝ် တီႈဝဵင်းလႃႈသဵဝ်ႈ ပၢင်တိုၵ်းယဵၼ်ဝႆႉယူႇသေတႃႉ ၵူၼ်းမိူင်းပႆႇႁတ်းမိူဝ်း ယူႇၶိုၼ်းႁိူၼ်းယေး။ ၵူၼ်းၵႃႉၶၢႆ ၵေႃႈ ပႆႇႁတ်းတမ်းၸႂ် ငဝ်းလၢႆးသေ သိုဝ်ႉၶၢႆၶူဝ်းၶွင်သင်။ ၶဝ်ႈသၢၼ် ၼိုင်ႈထူင်ၶၢႆ 2 သႅၼ်ပျႃး။ ၼမ်ႉမၼ်း ၼိုင်ႈပုင်း 2 သႅၼ်ပျႃး၊ ၶႆႇၵႆႇ 1 လုၵ်ႈ 700 ပျႃး။ ၽၵ်းမီႇလႅင် ၼိုင်ႈၸွႆႉ 15,000 ပျႃး၊ ၼိူဝ်ႉမူ 1 ၸွႆႉ 5 မိုၼ်ႇပျႃး။ 

ၵူၼ်းမိူင်း ဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“တီႈလႃႈသဵဝ်ႈၼႆႉ ၶၼ်ၵုၼ်ႇၶိုၼ်ႈ 3 ပုၼ်ႈ။ ပႆႇၸၢင်ႈႁဵတ်းၵၢၼ် ႁႃၵိၼ်လဵင်ႉတွင်ႉသင်။ တေႃႈၼင်ႇ ၽၵ်းၶဵဝ်ယင်းဢမ်ႇလႆႈၵိၼ်”- ဝႃႈၼႆ။

တီႈတၢင်းၸိုင်ႈတႆးပွတ်းဢွၵ်ႇ ဝဵင်းတႃႈၶီႈလဵၵ်း – ၵဵင်းတုင် ၸိူဝ်းၼၼ်ႉတႄႉ ၶၼ်ငိုၼ်းထႆး ယွမ်းလူင်းၶိုၼ်းယူႇသေတႃႉ ယွၼ်ႉၶၼ်ၵုၼ်ႇဢမ်ႇယွမ်းလူင်းလႄႈ လႆႈယၢပ်ႇတႃႇႁႃၵိၼ်လဵင်ႉတွင်ႉ။

ၶၼ်ၵုၼ်ႇၶိုၼ်ႈ ဢမ်ႇယွမ်းလူင်းၼႆႉ ၵူၼ်းၵႃႉၶဝ်လၢတ်ႈဝႃႈ ပဵၼ်ယွၼ်ႉၶၼ်ၼမ်ႉမၼ်းၸၢၵ်ႈ ႁႃယၢပ်ႇ၊ ၵႃႈတၢင်ႇၵုၼ်ႇ တေႃႉသူင်ႇၶိုၼ်ႈသုင်လႄႈ ၶၼ်ၵုၼ်ႇၸင်ႇလႆႈၶိုၼ်ႈၸွမ်း ဝႃႈၼႆ။ 

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)