ဝၼ်းတီႈ 09/08/2024 ၼႆႉ ႁူင်းႁဵတ်းႁိူဝ်း ဢၼ်မီးတီႈ ဝဵင်းပၢၼ်ႉသႆး ၸႄႈတွၼ်ႈဢယုတ်ႉထယႃး ပဵၼ်လွင်ႈတႅၵ်ႇၽူင်ႉသေ ႁႅင်းၵၢၼ်မိူင်းမၢၼ်ႈ လူႉတၢႆ 2 ၵေႃႉ မၢတ်ႇၸဵပ်း 4 ၵေႃႉ – ဝႃႈၼႆ။

ၾၢႆႇလူင်ပွင်ၸိုင်ႈထႆး ပိုၼ်ၽၢဝ်ႇဝႃႈ ပဵၼ်လွင်ႈတႅၵ်ႇၽူင်ႉၵႂႃႇ ၽွင်းႁႅင်းၵၢၼ်ၶဝ် တိုၵ်ႉၵပ်းလဵၵ်း/ သေႃႇလဵၵ်း တီႈႁူင်း ႁဵတ်းႁိူဝ်း။ ၵူၼ်းၸိူဝ်းမၢတ်ႇၸဵပ်းၼၼ်ႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃ ဢယုတ်ႉထယႃးယဝ်ႉ။ ၼႂ်းၵူၼ်းမၢတ်ႇၸဵပ်းၼၼ်ႉ တႃႇ 3 ၵေႃႉ မၢတ်ႇၸဵပ်းဝႆႉႁၢဝ်ႈႁႅင်း၊ ဢၼ်ၵိုတ်းလိူဝ်ထႅင်ႈ ၵေႃႉၼိုင်ႈတႄႉ ၸိုၼ်ႈၶႅၼ်းၶိုၼ်းသေ လူင်းႁူင်းယႃၵႂႃႇယဝ်ႉ – ဝႃႈၼႆ။

ယွၼ်ႉပဵၼ် လွင်ႈဢမ်ႇသၢင်ႇတေႃႇ ၼႂ်းဢွင်ႈတီႈႁဵတ်းၵၢၼ်လႄႈ ထုၵ်ႇလီၶပ်းၶိုင် ႁႂ်ႈလႆႈၵႃႈသၢႆႈတႅၼ်း ပၼ်ၵူၼ်း ၵေႃႉဢၼ်လႆႈလူႉတၢႆၵႂႃႇၼၼ်ႉၼႆ – ဢူးမူဝ်းၵျူဝ်း ႁူဝ်ပဝ်ႈၶွမ်ႊမတီႊ ၾၢႆႇတူင်ႉၼိုင် လွင်ႈႁႅင်းၵၢၼ်မိူင်းမၢၼ်ႈ လၢတ်ႈၼင်ႇၼႆ။

ၼႂ်းသိုဝ်ႇၶၢဝ်ႇမိူင်းထႆးတႄႉ ႁၢႆးငၢၼ်းဝႆႉဝႃႈ – တွၼ်ႈတႃႇ ၵူဝ်ႇၵျေႃႇမျႅတ်ႉတူႇလႄႈ ၵူဝ်ႇဝိၼ်းထုၼ်း ႁႅင်း ၵၢၼ်မိူင်းမၢၼ်ႈ 2 ၵေႃႉ ဢၼ်လႆႈလူႉတၢႆၵႂႃႇၼၼ်ႉ ယူႇတီႈ ႁွင်ႈၵၢၼ်ၽွင်းလူင် ၾၢႆႇႁႅင်းၵၢၼ် မိူင်းထႆး တေပၼ်ၵႃႈသၢႆႈတႅၼ်း ၵႂႃႇ ၼိုင်ႈၵေႃႉလႂ် 8 သႅၼ်ဝၢတ်ႇပၢႆ  – ဝႃႈၼႆ။ ႁူင်းႁဵတ်းႁိူဝ်း ဢၼ်ပဵၼ်လွင်ႈတႅၵ်ႇၽူင်ႉပွၵ်ႈၼႆႉ မိူဝ်ႈပူၼ်ႉမႃး 8 ပီ ၼၼ်ႉၵေႃႈ ယၢမ်ႈပဵၼ်မႃးယဝ်ႉ ပွၵ်ႈ ၼိုင်ႈ ယၢမ်ႈမီးႁႅင်းၵၢၼ်မိူင်းမၢၼ်ႈ လူႉတၢႆ 4 ၵေႃႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။