သိုၵ်းမၢၼ်ႈ ယိုတ်းမိူင်း မၢပ်ႇၼႄးဝႃႈ ပဵၼ်လုၵ်ႈၸုမ်းၵႅတ်ႇၶႄ ၵူၼ်းမိူင်း PDF ၼႆသေ တီႉၺွပ်းဝႆႉ ၵူၼ်းၼုမ်ႇ ပၢၵ်ႇပၢႆ ဢၼ်တေၵႂႃႇ တၢင်းဝဵင်းမူႇၸေႊ လႅၼ်လိၼ်တႆး – ၶႄႇၼၼ်ႉ။
ဝၼ်းတီႈ 08/08/2024 ၵူၼ်းၼုမ်ႇ ပၢၵ်ႇပၢႆ တင်းၵႃး 10 လမ်း မႃးထိုင်တီႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း ၺႃးသိုၵ်းမၢၼ်ႈ ပလိၵ်ႈမၢၼ်ႈ ၵူတ်ႇထတ်းၸႅတ်ႈထၢမ် ၸိူဝ်းၶဝ်ၼၼ်ႉသေ လၢတ်ႈဝႃႈ MNDAA တေပၼ်ၵၢၼ် တီႈလႃႈသဵဝ်ႈၼႆလႄႈ ဢၢၼ်းတေၵႂႃႇ ဝႃႈၼႆ။ ယၢမ်းလဵဝ် သိုၵ်းမၢၼ်ႈ ၵူတ်ႇထတ်းတီႉၺွပ်း ၵုမ်းတူဝ်ၶဝ်ဝႆႉ တီႈႁူင်းပလိၵ်ႈလၢႆး ၶႃႈ။
ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ပိူၼ်ႈဢွၼ်ၵၼ်ပၢႆႈဢွၵ်ႇ ပွတ်းႁွင်ႇမႃး ၶဝ်သမ်ႉ ဝႃႈ တေၵႂႃႇ။ ၵမ်ႈၼမ် ပဵၼ်ၸၢဝ်းမၢၼ်ႈ သႅၼ်းၵူၼ်းၼုမ်ႇလၢႆလၢႆ။ ယၢမ်းလဵဝ်တႄႉ သိုၵ်းမၢၼ်ႈ ပလိၵ်ႈမၢၼ်ႈ ၵုမ်းတူဝ်ၶဝ်ဝႆႉ တီႈႁူင်းပလိၵ်ႈၼႆႉယဝ်ႉ”- ဝႃႈၼႆ။
ၼႂ်းၸိုင်ႈတႆးပွတ်းႁွင်ႇၼႆႉ မိူၼ်ၼင်ႇ ဝဵင်းၵူတ်ႉၶၢႆ ၊ သႅၼ်ဝီ ၊ လႃႈသဵဝ်ႈ ၊ သီႇပေႃႉ ၊ ၵျွၵ်ႉမႄး ၊ ၼွင်ၶဵဝ် ၸိူဝ်းၼႆႉ ၸုမ်းယိပ်းၵွင်ႈၵၢင်ႇတင်း သိုၵ်းမၢၼ်ႈ ယိုတ်းမိူင်း တိုၵ်ႉၶဵင်ႈၶႅင်တေႃႇၵၼ်ဝႆႉ၊ ၾၢႆႇသိုၵ်းမၢၼ်ႈ ၵႆႉဢဝ်ၶိူင်ႈမိၼ် မႃးပွႆႇမၢၵ်ႇထႅင်ႈ။
လိူဝ်ၼၼ်ႉ ၼႂ်းဝၼ်းၽတ်းၼႆႉ သိုၵ်းဝႃႉ UWSA ထႅမ်ႁႅင်းသိုၵ်းတင်းၼမ်သေ လုၵ်ႉတီႈသဵၼ်ႈတၢင်း တၢင်ႉယၢၼ်း – မိူင်းယႆ ၶဝ်ႈၸူးဝဵင်းလႃႈသဵဝ်ႈ တီႈသိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈဝႆႉ မိူဝ်ႈဝူင်ႈ ပူၼ်ႉမႃးၼၼ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ