လူင်ပွင်ၸိုင်ႈမိူင်းထႆး ႁွင်ႈၵၢၼ်ၾၢႆႇႁႅင်းၵၢၼ် ႁၢင်ႈႁႅၼ်းပၵ်းပိူင်မႂ်ႇတႃႇႁႅင်းၵၢၼ် ယွၼ်ႇယၢၼ်းပၼ်ႁႂ်ႈႁႅင်းၵၢၼ်ယၢၼ်မိူင်း ၸိူဝ်းႁႃႁဵတ်းၵၢၼ်ၼႂ်းမိူင်းထႆး လႆႈႁဵတ်းၼႃႈၵၢၼ် ၼမ်တိူဝ်းမႃးထႅင်ႈမွၵ်ႈ 11 သႅၼ်း(ယၢင်ႇ)။

ၼႂ်းလိူၼ်ၵျုၼ်ႊ 2018 ၼႆႉသိုဝ်ႇၶၢဝ်ႇထႆးၶျွင်ႊ3 ပိုၼ်ၽၢဝ်ႇဝႃႈ လူင်ပွင်ၸိုင်ႈမိူင်းထႆး ႁွင်ႈၵၢၼ်ၾၢႆႁႅင်းၵၢၼ်ႁၢင်ႈ ႁႅၼ်း တေပူတ်းပႅတ်ႈ ပၵ်းပိူင်ဢၼ်ႁႄႉႁၢမ်ႈႁႅင်းၵၢၼ်ယၢၼ်မိူင်းႁဵတ်း 11 ယၢင်ႇ ၼႂ်းၼႃႈၵၢၼ်ဢၼ်ႁႄႉႁၢမ်ႈႁႅင်း ၵၢၼ်ယၢၼ်မိူင်းႁဵတ်း 39 ၼႃႈၵၢၼ် ။

တူဝ်တႅၼ်းၸုမ်းပေႃႈလဵင်ႉ၊ မႄႈလဵင်ႉ လၢတ်ႈဝႃႈ – “ မိူဝ်ႈလဵဝ်ၵၢၼ်ဢၼ်ႁႄႉႁၢမ်ႈ ဢမ်ႇပၼ်ႁႂ်ႈႁႅင်းၵၢၼ်ႁဵတ်း မိူၼ်ၼင်ႇၵၢၼ်ၶၢႆၶူဝ်းၶွင်ဝႃႇ၊ ပႂ်ႉႁၢၼ်ႉတၢင်းၶၢႆဝႃႇ၊ ႁၢၼ်ႉႁၢင်ႈၶိူင်ႈၶူၼ်ႁူဝ်ဝႃႇ၊ ႁၢၼ်ႉႁၢင်ႈၶိူင်ႈၼဵပ်ႉတိၼ် ၼဵပ်ႉမိုဝ်းဝႃႇၸိူဝ်းၼႆႉ ၵူၼ်းထႆးဢမ်ႇႁဵတ်း၊ ပိုတ်ႇႁပ်ႉၵူၼ်းႁဵတ်းၵၢၼ်ၵေႃႈ ဢမ်ႇမီးၵူၼ်းထႆးမႃးႁဵတ်း၊ ၵွပ်ႈၼၼ်လႄႈၶႂ်ႈႁႂ်ႈလူင်ပွင်ၸိုင်ႈယွၼ်ႇယၢၼ်းပၼ် ႁႂ်ႈႁႅင်းၵၢၼ်ယၢၼ်မိူင်း လႆႈႁဵတ်းၵၢၼ် ၶၢႆၶူဝ်းၶွင်ၼႃႈႁၢၼ်ႉ၊ ႁၢၼ်ႉႁၢင်ႈၶိူင်ႈႁဵတ်း ၼဵပ်ႉတိၼ်ၼဵပ်ႉမိုဝ်းၸိူဝ်းၼႆႉ ” ဝႃႈၼႆ။

ၸၢႆးပိူင်းၸဝ်ႈၼႃႈတီႈၾၢႆႇမၢႆမီႈ ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ – “  မိူဝ်ႈဢွၼ်တၢင်းၼႆႉ ၼႃႈၵၢၼ်ဢၼ်ၶဝ်ႁႄႉႁၢမ်ႈမီးယူႇ 39 ၼႃႈၵၢၼ် ၼႂ်းလိူၼ်ၼႆႉသမ်ႉလႆႈငိၼ်းဝႃႈ တေယူၵ်ႉလိူၵ်ႈပႅတ်ႈၶေႃႈႁၢမ်ႈ 11 ၶေႃႈၼႆလႄႈ တေၵိုတ်းယူႇ 28 ၶေႃႈဢၼ်ႁႄႉႁၢမ်ႈႁႅင်းၵၢၼ်ႁဵတ်း၊ ၵူၺ်းၵႃႈမိူဝ်ႈလဵဝ်တႄႉပႆႇမီးၽိုၼ်လိၵ်ႈလူင်ပွင်ၸိုင်ႈ ဢၼ်ဢွၵ်ႇမႃးၵမ်းသိုဝ်ႈၼင်ႇၵဝ်ႇ တေလႆႈပႂ်ႉတူၺ်းထႅင်ႈၵမ်းၼိုင်ႈဝႃႈ ၼႃႈၵၢၼ်ဢၼ်ၶဝ် ပၼ်ႁဵတ်းထႅင်ႈၼၼ်ႉ ပဵၼ်ၼႃႈၵၢၼ်သင်လၢႆလၢႆ ဝႃႈၼႆ။

ၼႂ်းမိူင်းထႆးၼႆႉ မီးႁႅင်းၵၢၼ်ယၢၼ်မိူင်း ဢၼ်လုၵ်ႉမႃးတၢင်းမိူင်းႁူမ်ႈတုမ်မၢၼ်ႈ၊ လၢဝ်း၊ ၵမ်ႊပူႊၶျႃႊ ၸိူဝ်းၼႆႉၼပ်ႉ ႁူဝ်လၢၼ်ႉ။ တႄႇဢဝ်လိူၼ်ၼႃႈၼႆႉၵႂႃႇ လူင်ပွင်ၸိုင်ႈမိူင်းထႆးပိုၼ်ၽၢဝ်ႇဝႃႈ ႁွင်ႈၵၢၼ်ၾၢႆႇႁႅင်းၵၢၼ်လႄႈ ႁွင်ႈ ၵၢၼ်ၾၢႆႇၵဵဝ်ႇၶွင်ႈ တေလူင်းၵူတ်ႇထတ်းႁႅင်းၵၢၼ် ၸိူဝ်းၽိတ်းပၵ်းပိူင်မၢႆမီႈၼႆလႄႈ ၸိူဝ်းဢမ်ႇၸၢင်ႈတေႃႇဝတ်းဝႂ် မၢင်ၸိူဝ်းပေႃးပွၵ်ႈႁိူၼ်းၵေႃႈမီး၊ ၸိူဝ်းၺႃးတီႉသေသူင်ႇပွၵ်ႈၶိုၼ်းတၢင်းတႃႈၶီႈလဵၵ်းၵေႃႈမီး ၼႆယဝ်ႉ။