ၸၢႆးႁိၼ်ပဝ်း ႁွင်ႉၸၢႆးၶျိတ်ႉငူၺ်ႇ ၸဝ်ႈၶွင်ႁူင်းလဵၼ်ႈႁႅင်း “ၽွၼ်းလီ” ဝဵင်းၵႃလီႉ ၶဝ်ႈၶႅင်ႇႁႅင်းယႂ်ႇ တီႈတႃႈၵုင်ႈ ပေႉလႆႈတီႈသၢမ် – ဝႃႈၼႆ။

ဝၼ်းတီႈ 09/06/2018 ၸုမ်းၾၢႆႇလဵၼ်ႈဢဵၼ်ႁႅင်း မႃႇၶႅင်ႁႅင်းၵိုမ်းမိူင်းမၢၼ်ႈ ၸတ်းႁဵတ်းပၢင်ၶႅင်ႇၸၢႆးမႃႇၶႅင်ႁႅင်း ၵိုမ်းလႄႈ ၼၢင်းႁၢင်ႈလီလဝ်းဝိုၼ်း တီႈဝဵင်းလူင်တႃႈၵုင်ႈ ၼႂ်းပၢင်ၼၼ်ႉ ၸၢႆးၶျိတ်ႉငူၺ်ႇ ႁိုဝ် ၸၢႆးႁၢၼ်မိူင်းၶဝ်ႈၶႅင်ႇ လႆႈသူးတီႈသၢမ်။

ၼႂ်းပၢင်ၶႅင်ႇၼၼ်ႉမီးတင်းမူတ်း 6 သႅၼ်း ၽူႈၸၢႆးသႅၼ်းဢႃယုယႂ်ႇ 50 ၶိုၼ်ႈၼိူဝ်၊ သႅၼ်းဢႃယု 21 လူင်းတႂ်ႈ၊ ဢႃယုသႅၼ်းၵၢင်လႄႈသႅၼ်းတူဝ်ၶိင်းလဝ်း ။ ၼၢင်းယိင်းသမ်ႉသႅၼ်းတၢင်းသုင် 160 cm ၶိုၼ်ႈၼိူဝ်လႄႈ 160 cm  လူင်းတႂ်ႈ ၸိူဝ်းၼႆႉ ။

ၸၢႆးၶျိတ်ႉငူၺ်ႇ လၢတ်ႈဝႃႈ -“ ၵၢၼ်လဵၼ်ႈဢဵၼ်ႁႅင်းၼႂ်းတႆးႁဝ်းၼႆႉ ယင်းတိုၵ်ႉမီးဢေႇၼႃႇ ၵွပ်ႈၼၼ်လႄႈ ပေႃးပဵၼ်လႆႈၶႂ်ႈႁႂ်ႈၵူၼ်းၼုမ်ႇ သႅၼ်းႁုၼ်ႈမႂ်ႇ သႂ်ႇၸႂ်တူၺ်းလွမ်ပၢႆးယူႇလီ ၊ လိူၵ်ႈၵိၼ်တၢင်းၵိၼ်ဢၼ်မီးၽွၼ်းလီသေ ၵမ်း” ဝႃႈၼႆ။

ၸၢႆးႁိၼ်ပဝ်း ႁိုဝ် ၸၢႆးၶျိတ်ႉငူၺ်ႇ ဢမ်ႇၼၼ် ၸၢႆးႁၢၼ်မိူင်းၼႆႉ ၸႃတိၵူၼ်းမိူင်းၵုတ်ႈ မၼ်းၸၢႆးၼႆႉယၢမ်ႈလႆႈရၢင်း ဝလ်း (သူး) သူၺ်ႇမၢၼ်းမွင်ႇ (မၢဝ်ႇမႃႇၶႅင်ႁႅင်းၵိုမ်းဝဵင်းလိူဝ်ႇ) တင်ႈတႄႇပီ 2011 တေႃႇထိုင် 2015 လႆႈႁပ်ႉရၢင်းဝလ်း ထီႉ 1 တႃႇ 4 ပီထပ်းၵၼ် သူးရၢင်းဝလ်းတၢင်ႇၸိူဝ်ႉတၢင်ႇပိူင် ၵေႃႈလႆႈႁပ်ႉမႃးတင်းၼမ်၊ ထိုင်တီႈပေႃးလႆႈၵႂႃႇ ၶႅင်ႇပၢင်ၶႅင်ႇႁႅင်းၵိုမ်းၼွၵ်ႈမိူင်းမႃးလၢႆလၢႆပၢင် ။ ယၢမ်းလဵဝ်ပိုတ်ႇႁူင်းလဵၼ်ႈဢဵၼ်ႁႅင်း ၸိုဝ်ႈ “ၽွၼ်းလီ” တီႈဝဵင်း ၵႃလီႉ ၸႄႈဝဵင်းၵုၼ်ႁဵင် ပိူဝ်ႈႁႂ်ႈၵူၼ်းမိူင်းတႆး ပၢႆးယူႇလီၶႅမ်ႉလႄႈ ၵႆယၢၼ်ယႃႈမဝ်းၵမ်။