ၵူၼ်းမိူင်းပၢႆး ပၢႆႈၽေးသိုၵ်းယဝ်ႉ လႆႈပၢႆႈၽေးၼမ်ႉထူမ်ႈထႅင်ႈ

သိုၵ်းမၢၼ်ႈ ၶမယ 422 ဢၼ်ပၵ်းတပ်ႉတီႈႁိမ်းၾၢႆၼမ်ႉ မိူင်းပၢႆးၼၼ်ႉ ဢမ်ႇလၢတ်ႈဢမ်ႇပွင်ႇၶၢဝ်ႇၸူး ၵူၼ်းမိူင်းသင်သေ ၵိုင်ႉၵၢင်ႉပိုတ်ႇၽၵ်းတူၾၢႆလႄႈ ၵူၼ်းမိူင်းၸိူဝ်းယူႇႁိမ်းၾင်ႇၼမ်ႉမႄႈၽီလူး ၸိူဝ်းၼၼ်ႉ ထူပ်းၽေးၼမ်ႉထူမ်ႈ လင်ၶႃးႁိူၼ်း 400 ပၢႆ၊ တိူၵ်ႇႁႆႈလွၵ်းၼႃး ထုၵ်ႇၼမ်ႉထူမ်ႈ လူႉသုမ်း ၼပ်ႉႁူဝ်ႁဵင် ဢေႊၶိူဝ်ႊ။ ၵူၼ်းမိူင်း ဢမ်ႇၸၢင်ႈႁဵတ်းၵၢၼ် ႁႃၵိၼ်လဵင်ႉတွင်ႉသင်သေဢမ်ႇၵႃး ဢမ်ႇလႆႈႁပ်ႉ လွင်ႈၸွႆႈထႅမ်။ ၵူၼ်းမိူင်းပၢႆးၼႆႉ ဢွၼ်တၢင်းၵေႃႈ ယၢမ်ႈပၢႆႈၽေးသိုၵ်းဝႆႉယဝ်ႉ ၵမ်းၼိုင်ႈ ၵမ်းၼႆႉသမ်ႉ လႆႈပၢႆႈၽေးၼမ်ႉထူမ်ႈထႅင်ႈလႄႈ ပဵၼ်ဢၼ်တူၵ်းၵိၼ်းႁႅင်းဝႆႉ ဝႃႈၼႆ။

တႄႇဢဝ် ဝၼ်းတီႈ 25/07/2024 မႃး သိုၵ်းမၢၼ်ႈ ပိုတ်ႇၽၵ်းတူၾၢႆၼမ်ႉမိူင်းပၢႆး တေႃႇထိုင် ဝၼ်းတီႈ 31/07/2024 ႁိုင်မႃးၶၢဝ်းတၢင်းၼိုင်ႈဝူင်ႈ ထိုင်ယၢမ်းလဵဝ် ပႆႇဢိုတ်းပၼ်ၶိုၼ်း။ ႁဵတ်းႁႂ်ႈၼမ်ႉထူမ်ႈ တီႈယူႇ တၼ်းသဝ်းၵူၼ်းမိူင်း ဢၼ်ယူႇဢိူမ်ႈၸမ် ၼမ်ႉမႄႈၽီလူး ၸိူဝ်းၼၼ်ႉ မိူၼ်ၼင်ႇ – ဝၢၼ်ႈၺွင်ႇဝႅင်း၊ ပွႆးၵူင်း၊ သေးၵူင်း ၸိူဝ်းၼႆႉလႄႈသင် ဝၢၼ်ႈဢၼ်ယူႇပွတ်းတႂ်ႈ ဝဵင်းမိူင်းပၢႆး မိူၼ်ၼင်ႇ – ၽွင်းတေႃး၊ ၽြႃးၽိဝ်ႇ၊ ၽြႃးၼီႇ၊ ဝၢၼ်ႈၼမ်ႉၸၢင်ႈၶမ်း ဢိၵ်ႇပႃး ၼွင်ၶၢႆး ၸိူဝ်းၼႆႉ – ၺႃးၼမ်ႉထူမ်ႈၵႂႃႇ တႃႇလင်ၶႃးႁိူၼ်း 400 ပၢႆ။

ယဝ်ႉၵေႃႈ တိူၵ်ႇႁႆႈလွၵ်းၼႃး ၵူၼ်းမိူင်းၵေႃႈ ၼမ်ႉထူမ်ႈၸူမ်ၸွမ်း ဢမ်ႇယွမ်း 3,000 ဢေႊၶိူဝ်ႊ။ ၵူၼ်းမိူင်း လႆႈပၢႆႈၶၢႆႉတီႈယူႇ ၼပ်ႉႁူဝ်ႁဵင် ၼႆယဝ်ႉ။

ၸဵမ်မိူဝ်ႈလၢႆပီပူၼ်ႉမႃးၵေႃႈ ပေႃးထိုင်ၶၢဝ်းႁိုဝ်ႉၶၢဝ်းၾူၼ်မႃး မႄႈၼမ်ႉၽီလူး ၵႆႉယိုင်ႈၶိုၼ်ႈသုင်၊ ၼႂ်းပိုၼ်ႉတီႈသမ်ႉလိုဝ်းၵၼ်ဝႆႉဝႃႈ ပေႃးၼမ်ႉလူၼ်ႉၾင်ႇၸိုင် ၾၢႆၼမ်ႉၸၢင်ႈတႅၵ်ႇ၊ ၸၢင်ႈၵူၼ်ႇၼႆလႄႈ ဢိင်ၼိူဝ် ၾူၼ်တူၵ်းထပ်းၵၼ်မႃး ဢမ်ႇထၢတ်ႇသေ သိုၵ်းမၢၼ်ႈ ၵူဝ်ၾၢႆတႅၵ်ႇလႄႈ ပိုတ်ႇၽၵ်းတူၼမ်ႉၵေႃႈပဵၼ်လႆႈ ၵူၼ်းမိူင်းပၢႆး ၵေႃႉၼိုင်ႈလၢတ်ႈၼႄဝႆႉၼင်ႇၼႆ –

“ၾၢႆၼမ်ႉၼႆႉ ပဵၼ်ၽႂ် ၸုမ်းလႂ်ၵေႃႉယႃႉ ၵွႆၼႆ ဢမ်ႇလၢတ်ႈလႆႈၵမ်းသိုဝ်ႈသေတႃႉ ႁိမ်းၾၢႆၼမ်ႉၼၼ်ႉသမ်ႉ မီးတပ်ႉမၢၼ်ႈ ၶမယ 422 ယူႇဢိူမ်ႈဝႆႉၵူၺ်းလႄႈ လိူဝ်သေၶဝ်ယဝ်ႉ ဢမ်ႇၸၢင်ႈထၢင်ႇၽႂ်။ တၢင်းၼၼ်ႉ ၶဝ်ႁႄႉႁၢမ်ႈၵူၼ်းမိူင်းဝႆႉ ဢမ်ႇပၼ်ၽႂ်ၵႂႃႇမႃးၶႃႈလူး။ ၵူႈပွၵ်ႈတႄႉ ၵႆႉယၢမ်ႈငိၼ်းဝႃႈ ပေႃးၼမ်ႉၼွင်းယႂ်ႇ လူၼ်ႉၾၢႆ ၼႃႈၼမ်ႉသုင်ႁႅင်းၼႆ ၸၢင်ႈႁဵတ်းႁႂ်ႈၾၢႆၵူၼ်ႇၼႆဢေႃႈ။ ယွၼ်ႉၼၼ်လႄႈ ၸင်ႇၽုၺ်ႇၽၵ်းတူ ၾၢႆတၢင်းသၢမ်တီႈၼႆဢေႃႈ။ ၵွပ်ႈၼႆလႄႈ တပ်ႉသိုၵ်းမၢၼ်ႈၶဝ် ဢဝ်ၶေႃႈဢၢင်ႈ ဢၼ်ၼၼ်ႉသေ ၸင်ႇၽုၺ်ႇႁိုဝ်ဢမ်ႇႁူႉ”- ဝႃႈၼႆ။  

ၸဵမ်မိူဝ်ႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ယိုတ်းမိူင်းမႃးသေ သိုၵ်းလုၵ်ႉၽိုၼ်ႉ တၢင်းမိူင်းယၢင်းလႅင် ႁူမ်ႈၵၼ် လေႃႇတိုၵ်း သိုၵ်းမၢၼ်ႈ မႃးၶိူဝ်းယႂ်း ႁဵတ်းႁႂ်ႈၵူၼ်းမိူင်းပၢႆး လႅၼ်လိၼ်တႆး – ယၢင်းလႅင် ၸိူဝ်းၼၼ်ႉ ႁႃပၢႆႈသွၼ်ႈယူႇၸွမ်း တီႈလွတ်ႈၽေးၽႂ်မၼ်း။ မၢင်ၸိူဝ်း ဢမ်ႇၸၢင်ႈပၢႆႈၵႂႃႇၵႆႈလႄႈ ႁႃပၢႆႈယူႇၸွမ်း ၾင်ႇၼမ်ႉၽီလူးသေ ၽုၵ်ႇၼႃး ၽုၵ်ႇသူၼ်ႁႃၵိၼ်လဵင်ႉတွင်ႉဝႆႉၵေႃႈမီး။ ယၢမ်းလဵဝ် ၼမ်ႉသမ်ႉမႃး ထူမ်ႈၸိူင်ႉၼႆ ၵမ်ႈၽွင်ႈ ပၢႆႈၵႂႃႇထႅင်ႈတၢင်းၾၢႆၶုၼ်၊ ၵမ်ႈၽွင်ႈ ပၢႆႈယူႇပိုၼ်ႉတီႈသုင် ၼႂ်းမိူင်းပၢႆး ၸိူဝ်းၼၼ်ႉၶိုၼ်း။

ၵူၼ်းမိူင်းပၢႆး ၵမ်ႈၼမ် လႆႈပၢႆႈၽေးမႃးလၢႆတေႃႇယဝ်ႉလႄႈ ယၢမ်းလဵဝ် လႆႈယၢပ်ႇၽိုတ်ႇဝႆႉလၢႆလွင်ႈ ဢမ်ႇထၢင်ႇႁၢင်ႈ ႁဵတ်းၵၢၼ်ႁႃၵိၼ်လဵင်ႉတွင်ႉ။ ယွၼ်ႉပဵၼ်ဢွင်ႈတီႈ ဢၼ်သိုၵ်းမၢၼ်ႈလႄႈ သိုၵ်းလုၵ်ႉၽိုၼ်ႉ ယၢင်းလႅင်ၶဝ် ၶဵင်ႈၶႅင်ၵၼ် ႁႅင်းလႄႈ ပႆႇမီးၸုမ်းလႂ် ၶဝ်ႈထိုင်လႆႈ လွင်ႈၵမ်ႉၸွႆႈ ပႆႇတဵမ်ထူၼ်ႈ။ သင်ၼမ်ႉထူမ်ႈဝၢၼ်ႈထူမ်ႈၼႃးၸိူင်ႉၼႆ ႁိုင်ၼၢၼ်းတႄႉ ၵူၼ်းမိူင်း တေၸၢင်ႈထူပ်းၽေး ဢိုပ်းယၢၵ်ႈထႅင်ႈၼႆ ၵူၼ်းမိူင်းပၢႆး လၢတ်ႈၼႄဝႆႉၼင်ႇၼႆ –

“ၵူၼ်းပၢႆႈၽေး ၸိူဝ်းၼႆႉ ၵမ်ႈၼမ် ဢမ်ႇလႆႈလွင်ႈၵမ်ႉၸွႆႈတၢင်းလႂ်။ ဢၼ်မႃးၸွႆႈၵေႃႈ ပဵၼ်ၵူၼ်းမိူင်းၼင်ႇၵၼ် ပွင်ပဵၼ်လႆႈလႄႈ ၸွႆႈၵၼ်ဢိတ်းဢွတ်းၵူၺ်း။ ၵမ်ႈၼမ် ဢၼ်ၽုၵ်ႇၶဝ်ႈဝႆႉ ၸိူဝ်းၼၼ်ႉၵေႃႈ ဢမ်ႇလႆႈသင်ၶိုၼ်းယဝ်ႉလႄႈ လိူဝ်သေပဵၼ်ၸႂ်ဢမ်ႇလီ ႁွင်ႉႁႆႈၸွမ်းၵေႃႈ ဢမ်ႇၸၢင်ႈႁဵတ်းႁိုဝ်ယဝ်ႉၶႃႈ။ ပၢႆႈၽေးသိုၵ်းယဝ်ႉ သမ်ႉလႆႈမႃးပၢႆႈ ၽေးၼမ်ႉထႅင်ႈလႄႈ ဢမ်ႇၸၢင်ႈႁဵတ်းႁိုဝ်ထႅင်ႈယဝ်ႉ တိူၵ်ႈၸႂ်ယဝ်ႉ။ ယၢမ်းလဵဝ်တႄႉ ႁိုဝ်တေၸၢင်ႈႁဵတ်းၵၢၼ်သင် မီးသင်ဝႆႉၵေႃႈ မႅင်ႇယိုၼ်ႈပၼ်ၵၼ်ၵိၼ်သေ လတ်းၽၢၼ်ႇၵူႈဝၼ်းဝၼ်း ႁဵတ်းၼၼ်ၵူၺ်းဢေႃႈ။ ပေႃးၼမ်ႉထူမ်ႈႁိုင်သေၼႆႉတႄႉ လူဝ်ႇဢိုပ်းၵူၺ်းယဝ်ႉ”- ဝႃႈၼႆ။

“ၼမ်ႉၵိုင်ႉၵၢင်ႉ ထူမ်ႈၶိုၼ်ႈမႃးလႄႈ ၼႅတ်ႈဢဝ်တူဝ်လွတ်ႈ ၶူဝ်းၶွင်ၶူဝ်းၸႂ်ႉသွႆ ပေႃးဢမ်ႇတၼ်းဢဝ် ယၢမ်း လဵဝ်ယၢပ်ႇၽိုတ်ႇတႃႇယူႇတႃႇၵိၼ်” – ၵေႃႇမတီႇ ၸွႆႈၵူၼ်းထူပ်းၽေး မိူင်းပၢႆးတႄႉ လၢတ်ႈတီႈသိုဝ်ႇၶၢဝ်ႇ ၽူႈတွႆႇႁွၵ်ႈဝႆႉၼင်ႇ ၼႆ။

ၽႅၼ်ယၼ်ႇသိုၵ်း ပၢင်တိုၵ်း 1111 မိူင်းယၢင်းလႅင်ၼႆႉ သိုၵ်းယၢင်းလႅင်တင်း ၸုမ်းၵႅတ်ႇၶႄၵူၼ်းမိူင်း PDF ၵုမ်းလႆႈမိူင်းပၢႆးဝႆႉယူႇသေတႃႉ ပႆႇယိုတ်းလႆႈ တပ်ႉသိုၵ်းမၢၼ်ႈ ၶမယ 422 ဢၼ်ပၵ်းဝႆႉတီႈၾၢႆမိူင်းပၢႆးၼၼ်ႉ ဝႃႈၼႆ။