ၽူႈယႂ်ႇၵူၼ်းလူင် ဢိူင်ႇၵွင်းလၢင်း ၼမ်ႉလၼ်ႈ-သီႇပေႃႉ လူင်းပိုၼ်ႉတီႈၵူတ်ႇထတ်း ၼမ်ႉထူမ်ႈ ၼႂ်းဢိူင်ႇၵွင်းလၢင်း ၺႃးၵူၼ်းၵေႃႉၼိုင်ႈ ဢဝ်ၽႃႉၾၼ်းသႂ်ႇ လႆႈမၢတ်ႇၸဵပ်း 2 ၵေႃႉ ဝႃႈၼႆ။
ဝၼ်းတီႈ 06/06/2018 ယၢမ်းဝၢႆးဝၼ်း မွၵ်ႈ 3 မူင်း ၽူႈၵွၼ်းဝဵင်းၼမ်ႉလၼ်ႈ၊ ၽူႈၵွၼ်းဢိူင်ႇၵွင်းလၢင်းလႄႈ ၽူႈယႂ်ႇ ၵူၼ်းလူင်ၵၢင်ႉ/ၵႄႇၼႂ်းမူႇဝၢၼ်ႈၵမ်ႈၽွင်ႈ ႁူမ်ႈၵၼ်လူင်းပိုၼ်ႉတီႈၵူတ်ႇထတ်း လွင်ႈလူႉသုမ်း ယွၼ်ႉၼမ်ႉလုပ်ႇၼွင်း ထူမ်ႈ ၼႂ်းပွၵ်ႉၵွင်းလၢင်း ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၺႃးၵူၼ်းၵေႃႉၼိုင်ႈဢၼ်ၶၢႆႉမႃး ယူႇၼႂ်းပွၵ်ႉၵွင်း လၢင်း ၸိုဝ်ႈႁွင်ႉ ၵူဝ်ႇတႅၵ်ႉၵျီး (ၸၢဝ်းမၢၼ်ႈ) ဢဝ်ၽႃႉလမ်းၾၼ်း ၸုမ်းၽူႈယႂ်ႇၵူၼ်းလူင် မိူဝ်ႈၽွင်း လူင်း ပိုၼ်ႉတီႈၵူတ်ႇထတ်းယူႇၼၼ်ႉ ဝႃႈၼႆ။
ၸၢႆးသႅင် ၵူၼ်းဝၢၼ်ႈဢၼ်ၵႂႃႇလူင်းပိုၼ်ႉတီႈၼၼ်ႉ လၢတ်ႈဝႃႈတီႈၽူႈတွႆႇႁွၵ်ႈဝႃႈ “ ၽူႈၵွၼ်းဝဵင်းၼမ်ႉလၼ်ႈ၊ ၽူႈ ၵွၼ်းဢိူင်ႇၵွင်းလၢင်းလႄႈ ၽူႈမီးပုၼ်ႈၽွၼ်း ၽူႈယႂ်ႇၵူၼ်းလူင် ၼႂ်းပွၵ်ႉၵမ်ႈၽွင်ႈ ႁူမ်ႈၵၼ်သေ လူင်းပိုၼ်ႉတီႈ ၵူတ်ႇထတ်းတူၺ်း ၵူၼ်းဝၢၼ်ႈဢၼ်ၺႃးၽေးၼမ်ႉထူမ်ႈ။ မိူဝ်ႈၽွင်းၼၼ်ႉ မီးၵူၼ်းၵေႃႉၼိုင်ႈ ၸိုဝ်ႈႁွင်ႉ ၵူဝ်ႇတႅၵ်ႉၵျီး ဢွၵ်ႇႁိူၼ်းမႃးသေ ႁွင်ႉလၢတ်ႈသဵင်ယႂ်ႇ/ သဵင်လူင်ဝႃႈ ဢမ်ႇလူဝ်ႇမႃးထၢႆႇ VDO/ ၶႅပ်းႁၢင်ႈၼႆသေ လၢၵ်ႈၽႃႉလမ်း ၾၼ်းၸုမ်းႁဝ်းၶႃႈ။ ၸုမ်းႁဝ်းၶႃႈလႆႈဢွၼ်ၵၼ်လႅၼ်ႈပၢႆႈ ၵူၺ်းၵႃႈ ၼႂ်းၸုမ်းႁဝ်းၶႃႈ ထႅင်ႈ 2 ၵေႃႉသမ်ႉ ဢမ်ႇတၼ်း ပူၼ်ႉလွတ်ႈသေ ၺႃးၽႃႉၾၼ်း လႆႈမၢတ်ႇၸဵပ်းသွင်ၵေႃႉ” ဝႃႈၼႆ။
ၵူၼ်း 2 ၵေႃႉ ဢၼ်ၺႃးၾၼ်းသႂ်ႇၼၼ်ႉ ၵေႃႉၼိုင်ႈ ၸိုဝ်ႈႁွင်ႉ ၸၢႆးပူင် ဢႃယု 45 ပီ ပဵၼ်ၽူႈၵွၼ်းယွမ်ႇ(နယ်မြေမှူး) လႆႈတိူဝ်ႉၺႃးတီႈမိုဝ်းၾၢႆႇၶႂႃ။ ထႅင်ႈၵေႃႉၼိုင်ႈသမ်ႉ ၸိုဝ်ႈႁွင်ႉၸၢႆးမွင်ႇ ဢႃယု 50 ပီ (ၽူႈၸွႆႈၵၢၼ်) တိူဝ်ႉၺႃးတီႈဝႂ်ႁူ ၶဝ် 2 ၵေႃႉ လႆႈယူတ်းယႃဝႆႉ တီႈႁူင်းယႃလူင်ၼမ်ႉလၼ်ႈ ဝႃႈၼႆ။
ၵူၼ်းပိုၼ်ႉတီႈ ဢၼ်ၵႂႃႇၸွမ်း ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ၶိင်းဢၼ်ဢဝ်ၽႃႉလမ်းၾၼ်းၼၼ်ႉ ၸိုဝ်ႈႁွင်ႉ ၵူဝ်ႇတႅၵ်ႉၵျီး မၼ်းၵႆႉၵႆႉမီးပၼ်ႁႃၸွမ်းၵူၼ်းတႃႇသေႇ။ လိူဝ်ၼၼ်ႉ ၵူၼ်းတၢင်ႇပွၵ်ႉ တၢင်ႇတီႈ ၵေႃႈပိူၼ်ႈဢမ်ႇမႅၼ်ႈ မၼ်း။ မၼ်းၼႆႉ ပဵၼ်ၵူၼ်းမိူင်းမၢၼ်ႈ ၶၢႆႉမႃးယူႇမိူင်းတႆး မႃး ယူႇတီႈတၢင်းဝၢၼ်ႈၼွင်ၵေႃႇလူင်သေ ၶၢႆႉမႃးယူႇတီႈၼႂ်း ပွၵ်ႉၵွင်းလၢင်း။ ယွၼ်ႉမၼ်းၵႆႉမီးပၼ်ႁႃၸွမ်းၵူၼ်းဝၢၼ်ႈ တၢင်းဝၢၼ်ႈၼွင်ၵေႃႇလူင်လႄႈ ၸင်ႇၶၢႆႉ မႃးယူႇၼႂ်း ပွၵ်ႉၵွင်းလၢင်းၼႆႉ” ဝႃႈၼႆ။
တႄႇဢဝ်ႁူဝ်လိူၼ်ၵျုၼ်ႊၼႆႉမႃး ယွၼ်ႉၾူၼ်တူၵ်းႁၢဝ်ႈႁႅင်းထပ်းၵၼ်လၢႆဝၼ်းသေ ၼမ်ႉလုပ်ႇၼွင်းထူမ်ႈ ၼႂ်းဝဵင်း ၼမ်ႉလၼ်ႈႁၢဝ်ႈႁႅင်း၊ ၵမ်းၼႆႉၼမ်ႉထူမ်ႈပဵၼ်ၵမ်း 4 ယဝ်ႉ ဝႃႈၼႆ။
ၼႂ်းဝဵင်းၼမ်ႉလၼ်ႈၼႆႉ တင်းမူတ်း မီး 11 ပွၵ်ႉ လႄႈ 5 ဝၢၼ်ႈ ဝႃႈၼႆ။
