ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ဢုပ်ႇဢူဝ်းႁၢင်ႈႁႅၼ်း တေၵူတ်ႇထတ်း ႁႅင်းၵၢၼ်ႁၢဝ်ႈႁႅင်း ၼႂ်းႁူဝ်လိူၼ်ၼႃႈၼႆႉ။

ဝၼ်းတီႈ 08/06/2018 သိုဝ်ႇၶၢဝ်ႇထႆး ၶျွင်ႊ 7 ပိုၼ်ၽၢဝ်ႇဝႃႈ တီႈပၢင်ၵုမ်လူင် ၽူႈပွင်ၵၢၼ် ၾၢႆႇႁႅင်းၵၢၼ်ၼၼ်ႉ ဢုပ်ႇဢူဝ်းၵၼ် လွင်ႈတေၵူတ်ႇထတ်း တီႉၺွပ်းႁႅင်းၵၢၼ်ၶၢမ်ႈမိူင်း ၸိူဝ်းဢမ်ႇၶဝ်ႈၶွပ်ႇပိူင် ၽိတ်းမၢႆမီႈ။

ၸွမ်သိုၵ်းလူင်ပလိၵ်ႈ ဢၻုၼ်ႊ သႅင်သိင်ၵႅဝ်ႊ ၽွင်းလူင်ၾၢႆႇႁႅင်းၵၢၼ် လၢတ်ႈဝႃႈ – “ ၼင်ႇႁိုဝ်တေၵႄႈလိတ်ႈ ပၼ်ႁႃႁႅင်းၵၢၼ်လႄႈ ႁႂ်ႈႁႅင်းၵၢၼ်ၵူႈၵေႃႉ ၸွမ်းပၵ်းပိူင် ၊ ႁႂ်ႈလႆႈႁပ်ႉသုၼ်ႇလႆႈသုၼ်ႇပဵၼ်ၽဵင်ႇပဵင်းၼၼ်ႉ ႁဝ်းၶႃႈလႆႈၵပ်းသၢၼ်တင်းၸိုင်ႈမိူင်း တူၼ်ႈတေႃၶွင်ႁႅင်းၵၢၼ်တင်းသၢမ်မိူင်း တင်ႈသုၼ်ႁဵတ်းဝတ်းဝႂ် OSS ႁႂ်ႈႁႅင်းၵၢၼ်  ၶပ်းၶိုင်ႁႂ်ႈယဝ်ႉၵွၼ်ႇဝၼ်းတီႈ 30/06/2018 ၼႆႉ။ ဝၢႆးသေၼႆႉ တႄႇဢဝ်ဝၼ်းတီႈ 1/07/2018 ၼႆႉၵႂႃႇႁွင်ႈ ၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး တေႁူမ်ႈၵၼ်တင်း ၾၢႆႇၵဵဝ်ႇၶွင်ႈလၢႆၾၢႆႇသေ တေၵူတ်ႇထတ်းႁၢဝ်ႈႁႅင်း ၵႂႃႇ” ဝႃႈၼႆ။

ၼၢင်းမူၺ် ၵူၼ်းႁဵတ်းၵၢၼ်ၼႂ်းၵဵင်းမႆႇ လၢတ်ႈဝႃႈ “ ၶၢဝ်ႇတႄႉဝႃႈ တေတႄႇၵူတ်ႇထတ်းႁူဝ်လိူၼ်ၼႃႈၼႆႉၵႂႃႇၼႆ သေတႃႉ မိူဝ်ႈလဵဝ်ၸွမ်းၼႂ်းဝဵင်း ၸွမ်းၵၢတ်ႇလူင်ၸိူဝ်းၼႆႉ ၶဝ်ပေႃးတႄႇၵူတ်ႇထတ်း တႄႇတီႉၵႂႃႇတိၵ်းတိၵ်းယဝ်ႉ  မိူဝ်ႈလဵဝ်ၼႆႉ ၵူၼ်းဢမ်ႇမီးဝတ်းဝႂ်တဵမ်ထူၼ်ႈၼၼ်ႉ ဢွၼ်ၵၼ်ဢွၵ်ႇမိူဝ်းၵမ်ႈၽွင်ႈယဝ်ႉ ” ဝႃႈၼႆ။

ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈဝႃႈ – “ ဢၼ်ၸဝ်ႈၼႃႈတီႈၶဝ်ႈ   ၵူတ်ႇထတ်းၼႆႉၵေႃႈ ပဵၼ်ၼႃႈတီႈပုၼ်ႈၽွၼ်းပိူၼ်ႈယူႇယဝ်ႉ ႁဝ်းပဵၼ်ႁႅင်းၵၢၼ်ၵေႃႈ လူဝ်ႇဢွၼ်ၵၼ် ၸွမ်းမၢႆမီႈ ဢဝ်ဝႂ်ႁေႃႈလူတ်ႉၵႃး ၊ ဝႂ်ႁဵတ်းၵၢၼ် Passport ၸပ်းတူဝ်ႁဝ်းယူႇတႃႇသေႇ သေၵမ်း” ဝႃႈၼႆ။

သင်ဝႃႈႁႅင်းၵၢၼ်ၵေႃႉလႂ်ၽိတ်းမၢႆမီႈ ဢမ်ႇမီးဝႂ်ႁဵတ်းၵၢၼ်ၼႆ မီးတူတ်ႈတၢမ်ႇမႂ်ငိုၼ်း 5,000 – 50,000 ၿၢတ်ႇလႄႈ ႁႄႉႁၢမ်ႈဢမ်ႇႁႂ်ႈယွၼ်းဝႂ်ႁဵတ်းၵၢၼ် 2 ပီ။ တွၼ်ႈတႃႇၼၢႆးၸၢင်ႈ သင်ၸၢင်ႈၵူၼ်းႁဵတ်းၵၢၼ် ၽိတ်းမၢႆမီႈၼႆတေၺႃးမႂ်းငိုၼ်း 10,000 – 100,000 ၿၢတ်ႇ တေႃႇၵူၼ်းႁဵတ်းၵၢၼ်ၼိုင်ႈၵေႃႉ သင်ႁဵတ်းၽိတ်းယဝ်ႉႁဵတ်းၽိတ်းထႅင်ႈၼႆၸိုင် တေၺႃးႁႄႉႁၢမ်ႈ ဢမ်ႇႁႂ်ႈၸၢင်ႈ ၵူၼ်းႁဵတ်းၵၢၼ် 3 ပီ ။ သင်ႁႅင်းၵၢၼ်ၵေႃႉလႂ် ၶႂ်ႈၶဝ်ႈမႃးႁဵတ်းၵၢၼ်တီႈၼႂ်းမိူင်းထႆးၼႆၸိုင် တေလႆႈၶဝ်ႈၸွမ်းပိူင် MOU ၵူၺ်းၼႆယဝ်ႉ။