ၽူႈၶၢၼ်ပၢၵ်ႇ ႁွင်ႈၵၢၼ်ၾၢႆႇၼွၵ်ႈမိူင်း မိူင်းၶႄႇ မၢဝ်ၼိင် ၸတ်းပၢင်သပ်းၸႅင်ႈၶၢဝ်ႇ မိူဝ်ႈဝၼ်းတီႈ 25/07/2024  ဝႃႈ – ယူႇတီႈ မိူင်းၶႄႇသေ လႆႈပၵ်းတႃပႂ်ႉတူၺ်း ပၢင်တိုၵ်းတီႈၼႂ်းၸိုင်ႈတႆးပွတ်းႁွင်ႇ ဝႆႉယူႇ။

ယႃႇႁႂ်ႈပၢင်တိုၵ်းၼႆႉ လႆႈတုမ်ႉတိူဝ်ႉမႃးၾၢႆႇတၢင်းမိူင်းၶႄႇ၊ ပိူင်လူင် ယႃႇႁႂ်ႈတုမ်ႉတိူဝ်ႉ ၵူၼ်းမိူင်းၶႄႇ ဢၼ်ႁဵတ်းၵၢၼ်ဝႆႉယူႇ ၼႂ်းၸိုင်ႈတႆးပွတ်းႁွင်ႇလႄႈ ၸွမ်းလႅၼ်လိၼ်ၶႄႇ – မၢၼ်ႈ ၊ ယႃႇႁႂ်ႈတုမ်ႉတိူဝ်ႉ ၶူင်းၵၢၼ် လူင်ပွင်ၸိုင်ႈၶႄႇ ဢၼ်မီးၼႂ်းမိူင်းတႆးပွတ်းႁွင်ႇ ၸိူဝ်းၼၼ်ႉလႃးလႃး ဝႃႈၼႆ။

ယူႇတီႈ မိူင်းၶႄႇသေ တေႁွင်ႉဢဝ်မူႇၸုမ်းၵဵဝ်ႇၶွင်ႈ ၸိူဝ်းဢၼ်ၶဝ်ႈပႃးၼႂ်းပၢင်တိုၵ်းၼၼ်ႉသေ ဢုပ်ႇၵုမ်ငူပ်ႉငီႉ တႃႇ ႁႂ်ႈၵိုတ်းလႆႈပၢင်တိုၵ်းဝႆးဝႆးသေ ၼင်ႇႁိုဝ် ပၼ်ႁႃတေဢမ်ႇၽႄႈလၢမ်း၊ ၼင်ႇႁိုဝ် တေၸဵဝ်းလႆႈ ဢုပ်ႇၵၼ်လွင်ႈငမ်းယဵၼ်ၼႆ မၢဝ်ၼိင် လၢတ်ႈၵႂႃႇပႃးၼင်ႇၼႆ။

ပၢင်တိုၵ်း 1027 တွၼ်ႈသွင် ၼႂ်းၸိုင်ႈတႆးပွတ်းႁွင်ႇၼႆႉ မီးသိုၵ်းၵဝ်ႈၵၢင်ႉ MNDAA ၊ သိုၵ်းတဢၢင်း TNLA ၊  သိုၵ်းရၶႅင်ႇ AA လႄႈ ၸုမ်းၵႅတ်ႇၶႄၵူၼ်းမိူင်း PDF ၶဝ်ၸိူဝ်းၼႆႉ ႁူမ်ႈၵၼ်ပိုတ်ႇၼႃႈသိုၵ်းၸူး သိုၵ်းမၢၼ်ႈ ၵူႈတီႈၵူႈၾၢႆႇ မိူဝ်ႈမိူဝ်ႈၽွမ်ႉၽွမ်ႉၵၼ်ဝႆႉ ၼႂ်းၸႄႈဝဵင်းၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ လႃႈသဵဝ်ႈ၊ သႅၼ်ဝီ၊  မိူင်းမိတ်ႈလႄႈ မိူင်းၵုတ်ႈ ၸိူဝ်း ၼႆႉ။

ဝၼ်းတီႈ 25 လိူၼ်ၵျူႊလၢႆႊ ယၢမ်းၵၢင်ၼႂ် သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ ပိုတ်းယိုဝ်းတိုၵ်းလႆႈ တိူင်းသိုၵ်းလႃႈသဵဝ်ႈယဝ်ႉဝႃႈၼႆသေတႃႉ သဵင်ၵွင်ႈတႄႉ ယင်းပႆႇယဵၼ်။