သိုၵ်းၵဝ်ႈၵၢင်ႉ MNDAA ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ ဢၼ်ပၵ်းဝႆႉတီႈဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ ၼၼ်ႉ ယိုတ်းၵုမ်းလႆႈယဝ်ႉ ဝႃႈၼႆ။

ဝၼ်းတီႈ 15/7/2024 ယၢမ်းဝၢႆးဝၼ်း 4 မူင်းပၢႆ တပ်ႉသိုၵ်းၵဝ်ႈၵၢင်ႉ လေႃႇတိုၵ်း တပ်ႉသိုၵ်းမၢၼ်ႈ ၶလယ 23 ဢဵၼ်ႁႅင်း 20 ပၢႆ ဢၼ်ပၵ်းဝႆႉတီႈ ၼႂ်းဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ သွင်ၾၢႆႇပိုတ်းယိုတ်းၵၼ်ႁိုင် မွၵ်ႈ 30 မိၼိတ်ႉသေ ၾၢႆႇသိုၵ်းၵဝ်ႈၵၢင်ႉ ယိုတ်းၵုမ်းလႆႈၵႂႃႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းၵဝ်ႈၵၢင်ႉ သိမ်းလႆႈတပ်ႉသိုၵ်းမၢၼ်ႈ တီႈ ၼႂ်းဢိူင်ႇသႅင်ၵႅဝ်ႉၼၼ်ႉယဝ်ႉၶႃႈ။ ၶဝ်ၸႂ်ႉၶၢဝ်းယၢမ်းၶိုင်ႈၸူဝ်ႈမူင်းသေ သိမ်းလႆႈဢေႃႈ။ လႆႈငိၼ်းဝႃႈ သိုၵ်းမၢၼ်ႈ ဝၢင်းၶိူင်ႈပၼ်ၼႆၶႃႈဢေႃႈ”- ဝႃႈၼႆ။

ၼႂ်းဢိူင်ႇသႅင်ၵႅဝ်ႉၼႆႉ လိူဝ်သေ တပ်ႉသိုၵ်းမၢၼ်ႈယဝ်ႉ မိူၼ်ၼင်ႇ ၸုမ်းပျီႇတူႉၸိတ်ႉသႅင်ၵႅဝ်ႉလႄႈ တပ်ႉသိုၵ်းတႆး SSPP ၵေႃႈ တူင်ႉၼိုင်ယူႇဝႆႉ မိူၼ်ၵၼ် ဝႃႈၼႆ။

“ဢၼ်ၶဝ် သိမ်းလႆႈတႄႉ ပဵၼ်တပ်ႉသိုၵ်းမၢၼ်ႈ ၵူၺ်းၶႃႈ ဢမ်ႇပႃး တပ်ႉပျီႇတူႉၸိတ်ႉသႅင်ၵႅဝ်ႉ။ လႆႈငိၼ်းဝႆႉတႄႉ သိုၵ်းၵဝ်ႈၵၢင်ႉၼႆႉ တေဢၢၼ်းၶိုၼ်ႈၵႂႃႇတၢင်းမိူင်းၶိူဝ်းႁိုဝ် ဢမ်ႇႁူႉ။ ၵူၼ်းမိူင်းတႄႉ ဢွၼ်ၵၼ်မႆႈ ၸႂ်ဝႆႉယူႇၶႃႈ”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။

ဢိူင်ႇသႅင်ၵႅဝ်ႉၼႆႉ မီးၾၢႆႇၸၢၼ်းဝၼ်းဢွၵ်ႇ ဝဵင်းသီႇပေႃႉ မီးၼႂ်းၵႄႈသီႇပေႃႉ – မိူင်းယႆ။ တီႈဢိူင်ႇသႅင်ၵႅဝ်ႉၼႆႉသမ်ႉ မီးဝႆႉ ငဝ်ႈငုၼ်း ၸုမ်းပျီႇတူႉၸိတ်ႉသႅင်ၵႅဝ်ႉ ဢၼ်ၸွမ်ႁၢၼ် လွႆမၢဝ်း ဢွၼ်ႁူဝ်ဝႆႉ ဝႃႈၼႆ။