ၵူၼ်းၼုမ်ႇမူႇၸေႊ ၵေႃႉၼိုင်ႈ ၺႃးသိုၵ်းပျီႇတူႉၸိတ်ႉ ဢဝ်ၵွင်ႈငႃၸမ်ႈသႂ်ႇသေ လွၵ်ႈငိုၵ်ႈၽိတ်းမေႃးၵၼ် ႁဵတ်းႁႂ်ႈ မၼ်းၸၢႆးမႆႈၸႂ် လွင်ႈႁူမ်ႇလူမ်ႈ သၢႆၸႂ်/ႁိူၼ်းယေး ဝႃႈၼႆ။
ဝၼ်းတီႈ 05/06/2018 ယၢမ်းၵၢင်ၶမ်ႈမွၵ်ႈ 7 မူင်းၼၼ်ႉ ၵူၼ်းၼုမ်ႇမူႇၸေႊၵေႃႉၼိုင်ႈ ၶီႇလူတ်ႉၶိူင်ႈ တင်း သိုၵ်းပျီႇ တူႉၸိတ်ႉ ႁေႃႈၵႃးမႃး ၼႄးမၼ်းၸၢႆး ဢမ်ႇငိူင်ႉဝႄႈတၢင်းၼႆသေ ဢဝ်ၵွင်ႈငႃ၊ ၵူၼ်းၼုမ်ႇၼၼ်ႉသမ်ႉ ၸူၵ်းမိုဝ်းထိုဝ် ထၢႆႇလႄႈ ဢဝ်ၽိတ်းမေႃးၵၼ်။ သိုၵ်းပျီႇတူႉၸိတ်ႉ ၸုမ်းလူင်ထၢင် ၸိုဝ်ႈႁွင်ႉ ၵျႃႇၽူးၼၼ်ႉ ဢဝ်ၵွင်ႈၸမ်ႈ ႁူဝ် ၸၢႆးလႅင်း တီႈၼႃႈႁူင်းႁဵၼ်း ၸၼ်ႉသုင် မၢႆ 2 ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးလႅင်း ၵူၼ်းၼုမ်ႇ ၵေႃႉဢၼ်ၺႃးၵွင်ႈငႃၸမ်ႈသႂ်ႇတီႈၼႃႈၽၢၵ်ႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ဝၼ်း တီႈ 6 ၼၼ်ႉ ၶႃႈႁဵတ်းလိၵ်ႈသေ တၢင်ႇၸူးထိုင် တီႈၽူႈၵွၼ်းၸႄႈဝဵင်းတင်း ၽူႈၵွၼ်းပွၵ်ႉ/ ဢိူင်ႇဝႆႉယဝ်ႉ။ မိူဝ်ႈ ဝၼ်းဢၼ်ပဵၼ်ၼၼ်ႉ ဝၢႆးသေ လႆႈၽိတ်းမေႃးၵၼ်ယဝ်ႉ ၶႃႈႁဝ်းလႆႈၵႂႃႇတၢင်ႇလၢတ်ႈ တီႈၾၢႆႇပလိၵ်ႈမၢၼ်ႈၵမ်းလဵဝ်။ ၵူၺ်းၵႃႈ ယူႇတီႈၾၢႆႇပလိၵ်ႈမၢၼ်ႈၶဝ် လၢတ်ႈဝႃႈ ဢမ်ႇမီးသၢၵ်ႈသေႇလၵ်းထၢၼ်သင် ၶဝ်ၵေႃႈဢမ်ႇဢဝ်လိူင်ႈလၢဝ်ႈ ပၼ် တေႃႈထိုင်ယၢမ်းလဵဝ် ဢမ်ႇတွပ်ႇလၢတ်ႈသင်မႃးၶိုၼ်း” ဝႃႈၼႆ။
ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 5 ယၢမ်းႁူဝ်ၶမ်ႈၼၼ်ႉ ၸၢႆးလႅင်းတင်း ဢူၺ်းၵေႃႉမၼ်းၵေႃႉၼိုင်ႈ ၶီႈလူတ်ႉၶိူင်ႈမႃး ၸွမ်းၵၼ်သေ ၵႃးသိုၵ်းပျီႇတူႉၸိတ်ႉသမ်ႉမႃးၾၢႆႇလင်ၶဝ်ၼၼ်ႉ တဵၵ်းႁွၼ်းသႂ်ႇၶဝ် ၸၢႆးလႅင်းၵေႃႈ ဝၢႆႇတူၺ်း ႁဵတ်းႁႂ်ႈပျီႇတူႉၸိတ်ႉဢမ်ႇႁၢၼ်ႉၸႂ် လူင်းပိတ်ႉၸၢႆးလႅင်းသေ ဢဝ်ၵွင်ႈၸမ်ႈ ဝႃႈၼႆ။
ၼႂ်းၸႄႈတွၼ်ႈမူႇၸေႊမီးၸုမ်းယိပ်းၵွင်ႈၵၢင်ႇလၢႆၸုမ်း၊ ၸုမ်းပျီႇတူႉၸိတ်ႉၵေႃႈမီးလၢႆလၢႆၸုမ်း ၼင်ႇၵဝ်ႇ။ ယွၼ်ႉ ပဵၼ်ဝဵင်းလႅၼ်လိၼ်သုၼ်ၵႃႉၶၢႆလႄႈ ၸုမ်းပျီႇတူႉၸိတ်ႉမီးႁူင်းႁႅမ်း၊ ပၢင်လွင်းၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ