ဝၼ်းတီႈ 2 ၵျူႊလၢႆႊၼႆႉ ၸၢဝ်းၵြႃးဢိၼ်ႊတီႊယႃႊ ၸတ်းပွႆးသႃႇသၼႃႇ ႁိၼ်ႊတူႊတီႈၸႄႈမိူင်းဢုတ်ႉတရႃႊ ပရႃႊတဵတ်ႉသျ် ၵူၼ်းၼမ်ၼႃႇဢႃးလႃးလႄႈ ထိုင်တီႈ ယဵပ်ႇၵၼ်တၢႆ။
တီႈပၢင်ပွႆးၼၼ်ႉ ၽူႈၸတ်းပၢင်ၶဝ်ပၼ်ၶႂၢင်ႉၵူၼ်းမႃးၶဝ်ႈႁူမ်ႈၼမ်သုတ်း 8 မိုၼ်ႇၵူၺ်းဝႃႈၼႆသေတႃႉ ၵူၼ်းမႃးၶဝ်ႈႁူမ်ႈ ၵိုၼ်းၶွၼ်ႈၼမ် ထိုင် 2 သႅၼ်ပၢႆ။ ဝၢႆးလင်တႄႇပၢင်ပွႆး မွၵ်ႈၶိုင်ႈၸူဝ်ႈမူင်းၵေႃႈ ၵူၼ်းယဵပ်ႇၵၼ်တၢႆ။ သုၼ်ၸတ်းပွင် ၵၢၼ်ၾၢႆႇၸွႆႈထႅမ်ၵူၼ်းထူပ်းၽေး သၽႃႇဝပိုၼ်ၽၢဝ်ႇဝႃႈ မီးၵူၼ်းတၢႆထိုင် 121 ၵေႃႉ ဝႃႈၼႆ။
ပလိၵ်ႈၵုမ်းပၢင်ပွႆး သျီႇလႃႇမေႃႇရႃႇ လၢတ်ႈတီႈသိုဝ်ႇၶၢဝ်ႇၸိုင်ႈမိူင်းဝႃႈ – ပဵၼ်ယွၼ်ႉၵူၼ်းၵိုၼ်းၼႃႇလႄႈ တီႈယူႇမၼ်း ၵႅပ်ႈပႅတ်ႈသေ ထိုင်တီႈယဵပ်ႇၵၼ်တၢႆ – ဝႃႈၼႆ။
ၸွမ်ၽွင်းလူင်မိူင်းၵြႃးဢိၼ်ႊတီးယႃႊ ၼႃႇရိၼ်ႇၻရႃႇမူဝ်ႇတီႇ တႄႉပိုၼ်ၽၢဝ်ႇဝႃႈ – တေၸွႆႈထႅမ်ပၼ် ၶိုၼ်းတွၼ်ႈတႃႇၵူၼ်းတၢႆၼၼ်ႉ ၼိုင်ႈၵေႃႉ 2400 တေႃႇလႃႇလႄႈ တွၼ်ႈတႃႇၵူၼ်းမၢတ်ႇၸဵပ်းတႄႉ တေ ပၼ်ၼိုင်ႈၵေႃႉ 600 တေႃႇလႃႇ – သိုဝ်ႇၶၢဝ်ႇ Eleven ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ