မိူဝ်ႈၼႆႉ ဝၼ်းတီႈ 03/07/2024 ယၢမ်းႁူဝ်ၶမ်ႈမွၵ်ႈ 5 မူင်း မၢၵ်ႇလူင် တူၵ်းသႂ်ႇ တီႈဝတ်ႉပၢင်ဢုတ်ႇ ပွၵ်ႉ 4 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ လုၵ်ႈၼိုင်ႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းပၢႆႈၽေးသိုၵ်း 5 ၵေႃႉ လႆႈမၢတ်ႇၸဵပ်းႁႅင်း ၼႂ်းၼၼ်ႉ ပႃး ၸဝ်ႈသၢင်ႇ တူၼ်ၼိုင်ႈ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ဢမ်ႇႁူႉၶႃႈ။ မႃးတူၵ်းသႂ်ႇ ၼႂ်းဝၢင်းဝတ်ႉပၢင်ဢုတ်ႇၼႆႉ လုၵ်ႈၼိုင်ႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉ တီႈဝတ်ႉၼႆႉ 5 ၵေႃႉ လႆႈတိူဝ်ႉမၢတ်ႇၸဵပ်းဝႆႉၶႃႈဢေႃႈ ဢၼ်ၶႃႈလႆႈႁူႉဝႆႉတႄႉ။ ၵူၼ်းပၢႆႈ ၽေးသိုၵ်းၼၼ်ႉသမ်ႉ ပဵၼ်ၵူၼ်း ႁိမ်းႁွမ်းဝတ်ႉၼၼ်ႉသေ ပၢႆႈၵႂႃႇသွၼ်ႈဝႆႉၸိူင်ႉၼၼ်ၶႃႈဢေႃႈ။ ယဝ်ႉၵေႃႈ မၢၵ်ႇလူင် တူၵ်းၸွမ်းႁိမ်းဝတ်ႉပၢင်ဢုတ်ႇထႅင်ႈ လၢႆလုၵ်ႈ။ လိူဝ်ၼၼ်ႉ တီႈပွၵ်ႉ 10 ၵေႃႈ မၢၵ်ႇလူင်တူၵ်းထႅင်ႈဢေႃႈ”- ဝႃႈၼႆ။

တႄႇဢဝ် မိူဝ်ႈဝႃး ဝၼ်းတီႈ 2 ယၢမ်းၵၢင်ၶိုၼ်းလိုၵ်း 11 မူင်းၼၼ်ႉမႃး တေႃႇထိုင်ယၢမ်းလဵဝ်ၼႆႉ သဵင်ၵွင်ႈ ပႆႇယဵၼ် မၢၵ်ႇလူင်၊ မၢၵ်ႇၶိူင်ႈမိၼ်တရူၼ်း တူၵ်းသႂ်ႇၼႂ်းဝဵင်း ၸိူဝ်းၼႆႉၵေႃႈ တင်းၼမ် – ၵူၼ်းပိုၼ်ႉတီႈလၢတ်ႈ။

မိူဝ်ႈၼႆႉ ယၢမ်းၵၢင်ၼႂ် မၢၵ်ႇလူင် တူၵ်းသႂ်ႇ ၵူၼ်းႁိူၼ်းလဵဝ်ၵၼ် တီႈပွၵ်ႉ 1 ဝဵင်းလႃႈသဵဝ်ႈ လူႉတၢႆထင်တီႈ 6 ၵေႃႉ။ ယဝ်ႉၵေႃႈ တီႈဢိူင်ႇၼမ်ႉပွင်ႈ လူႉတၢႆထင်တီႈ ၵေႃႉၼိုင်ႈလႄႈ မၢတ်ႇၸဵပ်း ၵေႃႉၼိုင်ႈ ၼႆယဝ်ႉ။