ၼႂ်းၸိုင်ႈတႆးပွတ်းႁွင်ႇ ၸႄႈတွၼ်ႈၵျွၵ်ႉမႄး၊ ၸႄႈတွၼ်ႈလႃႈသဵဝ်ႈ ၾူၼ်တူၵ်းႁႅင်း ၼမ်ႉလုပ်ႇၼွင်းထူမ်ႈ ၼႂ်းပိုၼ်ႉတီႈလၢႆလၢႆတီႈ ဝႃႈၼႆ။

ဝၼ်းတီႈ 06/06/2018 ယၢမ်းၵၢင်ၼႂ်ၸဝ်ႉ 4 မူင်းပၢႆ ၼမ်ႉလုပ်ႇၼွင်းထူမ်ႈ တၢင်းပွတ်းဝၢၼ်ႈၼွင်ပိင် ဢိူင်ႇၸွႆးၵုင်း ၸႄႈဝဵင်းၵျွၵ်ႉမႄး၊ ထုင်ႉၼမ်ႉလၼ်ႈ ၼႂ်းၸႄႈဝဵင်းသီႇပေႃႉ၊ လႃႈသဵဝ်ႈ၊ သႅၼ်ဝီၸိူဝ်းၼႆႉ ၾူၼ်တူၵ်းထပ်းၵၼ်လၢႆ ဝၼ်းႁၢဝ်ႈႁႅင်းသေ ၼမ်ႉႁူၺ်ႈၼမ်ႉပႃႇလႆၼွင်းလုပ်ႇထူမ်ႈ ဝႃႈၼႆ။

ၸဝ်ႈဢွၼ်ႇ (ၸဝ်ႈသြႃႇၼွင်ပိင်ဢွၼ်ႇ) ၽူႈၵွၼ်းဝတ်ႉဝၢၼ်ႈၼွင်ပိင် လၢတ်ႈဝႃႈ “ ၼႂ်းၶၢဝ်းတၢင်း 2-3 ဝၼ်းၼႆႉ ၾူၼ်တူၵ်းထပ်းၵၢၼ်ႁၢဝ်ႈႁႅင်း။ မိူဝ်ႈၼႆႉ ယၢမ်းၵၢင်ၼႂ် 4 မူင်းပၢႆ ၼမ်ႉလႆၼွင်းထူမ်ႈၼႂ်းဝၢၼ်ႈ။ ၼမ်ႉဢၼ် လႆၼွင်းထူမ်ႈၼႆႉ ပဵၼ်ၼမ်ႉႁူၺ်ႈၼမ်ႉပႃႇ လႆၼွင်းမႃး။ တေႃႈလဵဝ်ၵေႃႈၾူၼ်တိုၵ်ႉတူၵ်းယူႇ။ ၵူၺ်းၵႃႈ ႁဝ်းၶႃႈၵူဝ် တႅၼ်ႈၼမ်ႉၼွင်ပိင် ဢၼ်မီးတီႈႁူဝ်ဝၢၼ်ႈႁဝ်းၼၼ်ႉတႅၵ်ႇၵူၺ်းယဝ်ႉ ပေႃးတႅၼ်ႈၼွင်ၼၼ်ႉတႅၵ်ႇၸိုင် ၸွမ်းသဵၼ်ႈ တၢင်း၊ မူႇဝၢၼ်ႈတေၺႃးၼမ်ႉလုပ်ႇထႅင်ႈ သဵၼ်ႈတၢင်းၵေႃႈ တေလူႉလႅဝ်တင်းၼမ်။ ၼွၵ်ႈလိူဝ်ၼႆႉဢမ်ႇၸႂ်ႈဝႃႈ ၼမ်ႉထူမ်ႈတၢင်းပွတ်းဢိူင်ႇၸွႆးၵုင်း ဝၢၼ်ႈၼွင်ပိင်ႁဝ်းၵူၺ်း တၢင်းၼႂ်းဝဵင်းၵေႃႈ ၼမ်ႉထူမ်ႈလၢႆတီႈ မိူၼ်ၵၼ်” ဝႃႈၼႆ။

ၼႂ်းၸႄႈဝဵင်းၵျွၵ်ႉမႄးၼႆႉ ၺႃးၼမ်ႉလုပ်ႇထူမ်ႈႁၢဝ်ႈႁႅင်း ၸွမ်းၼႂ်းဝဵင်း၊ ၼႂ်းၵၢတ်ႇ လႄႈ သဵၼ်ႈတၢင်းလူင် ၵမ်ႈ ၽွင်ႈ။ ထႅင်ႈၾၢႆႇၼိုင်ႈၵေႃႈ ယွၼ်ႉမႄႈၼမ်ႉဢၼ်မီးၼႂ်းၸႄႈဝဵင်းၵျွၵ်ႉမႄး 4 မႄႈၼမ်ႉၼၼ်ႉၵေႃႈ ယိုင်ႈၶိုၼ်ႈလႆၶဝ်ႈ ၼႂ်းဝဵင်း၊ ၸွမ်းမူႇဝၢၼ်ႈတင်းၼမ် မႄႈၼမ်ႉၼၼ်ႉ ပဵၼ် မႄႈၼမ်ႉၸၢဝ်းငၢဝ်း၊ မႄႈၼမ်ႉတၢင်ႈ၊ မႄႈၼမ်ႉၼွင်ပိင်လႄႈ မႄႈၼမ်ႉၶူဝ်မုင်း ၸိူဝ်းၼႆႉ ဝႃႈၼႆ။

ၸဝ်ႈဢွၼ်ႇ လၢတ်ႈဝႃႈ ၼမ်ႉၼႆႉ ဢမ်ႇတွၼ်ႉထူမ်ႈတီႈဝၢၼ်ႈႁဝ်းၸဝ်ႈ သေပွၵ်ႈ။ ပွၵ်ႈၼႆႉ တေလႆႈဝႃႈ ပဵၼ်ပွၵ်ႈ ၵမ်းႁႅၵ်ႈ။ ဢၼ်ၵူၼ်းမိူင်းလူႉသုမ်းၼမ်တႄႉ ပဵၼ်ၶဝ်ႈၵၢပ်ႇ ဝႃႈၼႆ။

ၵဵဝ်ႇၵပ်းလွင်ႈၼႆႉ ၼႂ်းၸႄႈဝဵင်းသီႇပေႃႉ ထုင်ႉၼမ်ႉလၼ်ႈၵေႃႈ ၼမ်ႉထူမ်ႈလၢႆတီႈ။ မိူဝ်ႈပူၼ်ႉမႃး ဝၼ်းတီႈ 1 ယၢမ်းဝၢႆးဝၼ်း ၼၼ်ႉၵေႃႈ ၼမ်ႉလုပ်ႇၼွင်းထူမ်ႈႁၢဝ်ႈႁႅင်းၵမ်းၼိုင်ႈ။ ထိုင်မႃး မိူဝ်ႈၼႆႉၵေႃႈ လုပ်ႇၼွင်းထူမ်ႈထႅင်ႈ။ လိူဝ်ၼၼ်ႉ ၼႂ်း ၸႄႈ ဝဵင်းသႅၼ်ဝီၵေႃႈၼမ်ႉလုပ်ႇထူမ်ႈ မၢင်တီႈ ၼင်ႇၵဝ်ႇ ဝႃႈၼႆ။

ၶႅပ်းႁၢင်ႈ – ၸဝ်ႈဢွၼ်ႇ ထုင်ႉမွၵ်ႇၵွၼ်