ၸုမ်းၸၢဝ်းၶိူဝ်းတႆး၊ ၶၢင်လႄႈ လွႆ (တဢၢင်း) ဝဵင်းမူႇၸေႊ ႁူမ်ႈၵၼ်ၽုၵ်ႇတူၼ်ႈမႆႉ ႁဵင်တူၼ်ႈပၢႆ ဝႃႈၼႆ။
ဝၼ်းတီႈ 05/06/2018 ယၢမ်းၵၢင်ၼႂ် 9 မူင်း ႁွင်ႈၵၢၼ်လူင်ပွင်ၸိုင်ႈမၢၼ်ႈ ၾၢႆႇပႃႇမႆႉတင်း ၾၢႆႇၽွင်းငမ်းၸႄႈတွၼ်ႈ မူႇၸေႊ ႁူမ်ႈၵၼ်ၸတ်းႁဵတ်းပၢင်ၽုၵ်ႇတူၼ်ႈမႆႉ တီႈပၢင်ႇပေႃႉၵွပ်ႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၼႂ်းၼၼ်ႉ ပႃးၸၢဝ်းတႆး၊ ၶၢင်လႄႈ လွႆ ၶဝ်ႈႁူမ်ႈၽုၵ်ႈသွမ်ႈပႃး ဝႃႈၼႆ။
ၸၢႆးလၢဝ်လႅင်းပၢင်ႇ ၵႅမ်ၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ၼႂ်ႈၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ယွၼ်ႉမၼ်းပဵၼ်တႃႇသိင်ႇဝႅတ်ႉလွမ်ႉလႄႈ ႁဝ်းၶႃႈဢွၼ်ၵၼ်ၶဝ်ႈႁူမ်ႈၽုၵ်ႇသွမ်ႈၸွမ်း ၼင်ႇႁိုဝ် ပႃႇမႆႉ မိူင်းႁဝ်းပေႃး တေၶဵဝ်ၸမ်ႉၼမ်ႉလိူင်ႇ။ ယွၼ်ႉၼၼ် ၵူၼ်းႁဝ်းၵူႈၵေႃႉၼႆႉ မီးပုၼ်ႈၽွၼ်းၽုၵ်ႇတူၼ်ႈမႆႉၶႃႈယဝ်ႉ” ဝႃႈၼႆ။
တူၼ်ႈမႆႉ ဢၼ်ၽုၵ်ႇသွမ်ႈတီႈပၢင်ႇပေႃႉၵွပ်ႉၼႆႉ တင်းမူတ်း မီး 1,006 တူၼ်ႈ ၼႂ်းၼၼ်ႉ ပဵၼ်တူၼ်ႈမႆႉၵႄႇတွၵ်ႈ၊ မႆႉပႅၵ်ႇ၊ မႆႉၶီႈလဵၵ်း(မႆႉၸလီႇ)လႄႈ မႆႉယူမ်းလႅင် ၸိူဝ်းၼႆႉ။
ၼႂ်းပၢင်ၽုၵ်ႇတူၼ်ႈမႆႉၼၼ်ႉ မီးၸၢဝ်းၶိူဝ်းတႆး၊ ၶၢင်လႄႈ လွႆ ၶဝ်ႈႁူမ်ႈ ၼိုင်ႈၸုမ်းလႂ် 16 ၵေႃႉ။ လိူဝ်ၼၼ်ႉ ႁွင်ႈၵၢၼ် ၾၢႆႇလူင်ပွင်ၸိုင်ႈၵေႃႈ ၶဝ်ႈႁူမ်ႈ တင်းမူတ်းၵူၼ်းၶဝ်ႈႁူမ်ႈၽုၵ်ႇသွမ်ႈ 300 ပၢႆ ဝႃႈၼႆ။