လုၵ်ႈႁဵၼ်းဢၼ်ၶဝ်ႈတွပ်ႇလိၵ်ႈၸၼ်ႉသိပ်း ၼႂ်းပီ 2017-2018 တင်းမူတ်း မီး 52,219 ၵေႃႉ ဢွင်ႇပူၼ်ႉၸၼ်ႉသမ်ႉ 15,452 ၵေႃႉ ဝႃႈၼႆ။

ဝၼ်းတီႈ 02/06/2018 ႁွင်ႈၵၢၼ်ပၢႆးပၺ်ၺႃလူင်ပွင်ၸိုင်ႈ ပိုၼ်ၽၢဝ်ႇသဵၼ်ႈၸိုဝ်ႈလုၵ်ႈႁဵၼ်းၸိူဝ်း ဢၼ်တွပ်ႇလိၵ်ႈ ၸၼ်ႉသိပ်း ၼႂ်းပီ 2017-2018 ၼႂ်းမိူင်းႁူမ်ႈတုမ်ပတ်းပိုၼ်ႉ။ ၼႂ်းၼၼ်ႉ မိူင်းတႆးပတ်းပိုၼ်ႉ ဢၼ်ဢွင်ႇပူၼ်ႉ ၸၼ်ႉ မီး 15,452 ၵေႃႉ ပေႃးဢဝ်ပိူဝ်ႊသႅၼ်ႊ ဝႃႈၸိုင် 65.68 ပိူဝ်ႊသႅၼ်ႊ (%) ဝႃႈၼႆ။

ၼႂ်းၸိုင်ႈတႆးပွတ်းၸၢၼ်း လုၵ်ႈႁဵၼ်းၶဝ်ႈတွပ်ႇၸၼ်ႉသိပ်း ၼႂ်းပီ 2017-2018 တင်းမူတ်း 30,880 ၵေႃႉ၊ ဢွင်ႇပူၼ်ႉ ၸၼ်ႉ 9,174 ၵေႃႉ၊ ပိူဝ်ႊသႅၼ်ႊ 29.71 ပိူဝ်ႊသႅၼ်ႊ။ ၸိုင်ႈတႆး ပွတ်းႁွင်ႇသမ်ႉ လုၵ်ႈႁဵၼ်းၶဝ်ႈတွပ်ႇ တင်းမူတ်း 16,498 ၵေႃႉ၊ ဢွင်ႇပူၼ်ႉၸၼ်ႉ 5,342 ၵေႃႉ၊ ပိူဝ်ႊသႅၼ်ႊ 32.38 ပိူဝ်ႊသႅၼ်ႊ။ ၸိုင်ႈတႆးပွတ်းဢွၵ်ႇသမ်ႉ လုၵ်ႈႁဵၼ်း ၶဝ်ႈတွပ်ႇ တင်းမူတ်း 4,841 ၵေႃႉ၊ ဢွင်ႇပူၼ်ႉၸၼ်ႉ 936 ၵေႃႉ၊ ပိူဝ်ႊသႅၼ်ႊ 19.33 ပိူဝ်ႊသႅၼ်ႊ။ ၼႂ်းၸိုင်ႈတႆးပတ်း ပိုၼ်ႉ ဢၼ်ဢွင်ႇပူၼ်ႉၸၼ်ႉဢေႇတီႈသုတ်း ပဵၼ်ၼႂ်းၸိုင်ႈတႆးပွတ်းဢွၵ်ႇ ဝႃႈၼႆ။

ၼႂ်းမိူင်းႁူမ်ႈတုမ်ပတ်းပိုၼ်ႉၼႆႉ လုၵ်ႈႁဵၼ်းၶဝ်ႈတွပ်ႇၸၼ်ႉသိပ်း 2017-2018 မိူဝ်ႈၼႂ်းလိူၼ်မၢတ်ႊၶျ် 2018 တင်း မူတ်းမီး 7 သႅၼ် 8 မိုၼ်ႇၵေႃႉပၢႆ။ ဢၼ်ဢွင်ႇပူၼ်ႉတင်းမူတ်း မီး 2 သႅၼ် 5 မိုၼ်ႇၵေႃႉပၢႆ ပေႃးဢဝ်ပိူဝ်ႊသႅၼ်ႊ ဝႃႈၸိုင် 32.82 ပိူဝ်ႊသႅၼ်ႊ ဝႃႈၼႆ။

လုၵ်ႈႁဵၼ်းဢၼ်ဢွင်ႇပူၼ်ႉၸၼ်ႉသိပ်း ဢေႇလိူဝ်ပိူၼ်ႈတီႈသုတ်း ၼႂ်းမိူင်းႁူမ်ႈတုမ်ပတ်းပိုၼ်ႉ ပဵၼ်ၸႄႈမိူင်းၶျၢင်း။ ဢၼ်ဢေႇလိူဝ်ပိူၼ်ႈတီႈသွင်မိူင်းႁူမ်ႈတုမ်ပတ်းပိုၼ်ႉသမ်ႉ ပဵၼ်ၼႂ်းၸိုင်ႈတႆးပွတ်းဢွၵ်ႇၶူင်း ဝႃႈၼႆ။