ပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ပွၵ်ႈၵမ်း 3 (ပၢင်ၵုမ်လွင်ႈငမ်းယဵၼ်မိူင်းႁူမ်ႈတုမ်) တေၸတ်းႁဵတ်း ၼႂ်းႁၢင် လိူၼ်ၵျုၼ်ႊ ဢမ်ႇၼၼ် ႁူဝ်လိူၼ်ၵျူႊလၢႆႊၼၼ်ႉ သွင်ၾၢႆႇလႆႈၸႂ်ဝႃႈတေဢမ်ႇဢုပ်ႇပႃးလွင်ႈ “ ၽၢတ်ႇဢွၵ်ႇ” ဝႃႈၼႆ။

ပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ဢၼ်တေၸတ်းႁဵတ်း ပွၵ်ႈၵမ်း 3 ၼႆႉ လႅပ်ႈတေပဵၼ်ၼႂ်းဝၼ်းတီႈ 30/06/2018 ဢၼ်တေထိုင်မႃးၼႆႉ။ ႁူဝ်ၶေႃႈဢၼ်တေၼမ်းဢုပ်ႇဢူဝ်းၵၼ် ၼႂ်းပၢင်ၵုမ်လူင်တႄႉ တေပဵၼ် လွင်ႈတူင်ႇဝူင်းၵူၼ်း၊ လွင်ႈပၢႆးမၢၵ်ႈမီးလႄႈ တီႈလိၼ်/ၶူဝ်းၶွင်သၽႃဝ ၸိူဝ်းၼႆႉ၊ လွင်ႈၾၢႆႇၵၢၼ်မိူင်း ၵဵဝ်ႇၵပ်း လွင်ႈၽၢတ်ႇဢွၵ်ႇ၊ လွင်ႈႁူမ်ႇလူမ်ႈ ၵဵဝ်ႇၵပ်းၵၢၼ်ဝၢင်းၶိူင်ႈၼႆႉတႄႉ လႆႈၸႂ်ဝႃႈ တေဢမ်ႇဢုပ်ႇ ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းလုမ်း PI ႁဵတ်းၵၢၼ်ၵမ်ႉထႅမ်လွင်ႈငမ်းယဵၼ်မိူင်းမၢၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင် ၵုမ်လူင် ပၢင်လူင် ႁူဝ်ပၢၵ်ႇပီ 21 ပွၵ်ႈၵမ်း 3 ဢၼ်တေမႃးၼႆႉ လွင်ႈဢၼ်တေဢုပ်ႇၵၼ်လႆႈတႄႉတႄႉၼႆႉ မၼ်း ၵေႃႈပဵၼ် 3 ႁူဝ်ၶေႃႈၵူၺ်း။ တႃႇ 2 ႁူဝ်ၶေႃႈၼႆႉ မၼ်းတေဢုပ်ႇယၢပ်ႇဢိတ်းၼိုင်ႈ။ ၵၢၼ်မိူင်း တင်း လွင်ႈႁူမ်ႇ လူမ်ႈၼႆႉ ၺႃးပၼ်ႁႃယူႇ။ ယွၼ်ႉပိူဝ်ႈၼၼ်လႄႈ ႁဝ်းထၢင်ႇတႄႉ တေဢုပ်ႇဢူဝ်း 3 ႁူဝ်ၶေႃႈၼမ် မိူၼ် ၼင်ႇ လွင်ႈတူင်ႇဝူင်းၵူၼ်း၊ လွင်ႈပၢႆးမၢၵ်ႈမီးလႄႈ တီႈလိၼ်/ ၶူဝ်းတိုၼ်းသၽႃႇဝ ၸိူဝ်းၼႆႉ။ ပေႃးၸိူဝ်းၼႆႉယဝ်ႉ ၸင်ႇတေဢုပ်ႇၵၢၼ်မိူင်း။ ပေႃးဢုပ်ႇၵၢၼ်မိူင်းယဝ်ႉတူဝ်ႈလီငၢမ်း လွင်ႈႁူမ်ႇလူမ်ႈၵေႃႈ မၼ်းတေၸၢင်ႈဢုပ်ႇလႆႈ” ဝႃႈၼႆ။

ၵဵဝ်ႇၵပ်းလူၺ်ႈပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ပွၵ်ႈၵမ်း 3 ဢၼ်လႆႈၼၢၼ်းၸတ်းႁဵတ်းၼႆႉ ယွၼ်ႉ ၶွင်ႉၶမ်ၵၼ် တီႈႁူဝ်ၶေႃႈ ၵၢၼ်မိူင်းလႄႈ ၵၢၼ်ႁူမ်ႇလူမ်ႈ။ ၼႂ်းၵၢၼ်မိူင်းၼၼ်ႉ ၶွင်ႈၶမ်ၵၼ်ၵဵဝ်ႇ လူၺ်ႈလွင်ႈ ဢၼ်ဝႃႈႁၢမ်ႈၽၢတ်ႇ ဢွၵ်ႈမိူင်းႁူမ်ႈတုမ်။ ၵၢၼ်ႁူမ်ႇလူမ်ႈသမ်ႉ ၶွင်ႈၶမ်ၵၼ်တီႈဢၼ်ဝႃႈ ၼိုင်ႈမိူင်းၼႆႉ လူဝ်ႇလႆႈမီးတပ်ႉသိုၵ်းဢၼ်လဵဝ် ၵူၺ်း ၸဵမ်ၸိူဝ်းၼႆႉ။

ၸဝ်ႈၶိုၼ်းသႂ် ၸႂ်ယဵၼ် လၢတ်ႈဝႃႈ “ တင်းၾၢႆႇတပ်ႉသိုၵ်းမၢၼ်ႈတႄႉ တုၵ်းယွၼ်း ၵဵဝ်ႇၵပ်းလွင်ႈ ၼိုင်ႈမိူင်းလူဝ်ႇလႆႈ မီးတပ်ႉသိုၵ်းလဵဝ်ဢၼ်ဝႃႈၼႆႉ ၽႂ်ၵေႃႈ ဢမ်ႇထဵင် မၼ်းၵေႃႈ ပဵၼ်ပိူင်မၼ်းယူႇယဝ်ႉ။ ၵူၺ်းၵႃႈ တပ်ႉသိုၵ်းၸိုင်ႈ မိူင်းႁူမ်ႈတုမ်ၼႆႉ ထုၵ်ႇလီလႆႈပဵၼ် ၾၢင်ႁၢင်ႈ ၸိူင်ႉႁိုဝ်။ တေလႆႈၸႂ်ႉတိုဝ်းလွၵ်းပိူင်ၸိူင်ႉႁိုဝ်ဢၼ်ဝႃႈၼႆႉ မၼ်းယင်း မီးလွင်ႈၶွင်ႉၶမ်ၵၼ်ယူႇ။ လွင်ႈၶွင်ႉၶမ်ၼႆႉ ၶဝ်တေၶၢမ်ႈပူၼ်ႉၸိူင်ႉႁိုဝ်ဢၼ်ဝႃႈၼႆႉ ဢုပ်ႇၵၼ်မႃးလၢႆ ပွၵ်ႈၵေႃႈ မၼ်းၵေႃႈယင်းပႆႇၶၢမ်ႈပူၼ်ႉလႆႈ” ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 30-31/05/2018 ၸုမ်းယိပ်းၵွင်ႈၵၢင်ႇၸၢဝ်းၶိူဝ်း EAOs တင်း လူင်ပွင်ၸိုင်ႈလႄႈ တပ်ႉသိုၵ်း မၢၼ်ႈ ႁူပ်ႉဢုပ်ႇၵၼ် တီႈဝဵင်းတႃႈၵုင်ႈ တင်းသွင်ၾၢႆႇလႆႈဢုပ်ႇဢူဝ်းၵၼ် လွင်ႈဢၼ်လႆႈၶွင်ႉၶမ်ၵၼ်မႃး ၶၢဝ်း တၢင်း ပီပၢႆၼၼ်ႉ တေႁဵတ်းၸိူင်ႉႁိုဝ်ၵႂႃႇ ၸဵမ်ၸိူဝ်းၼႆႉ ဝႃႈၼႆ။