ပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇလႄႈပၢင်ပၼ်ပိုၼ်ႉႁူႉသုၼ်ႇလႆႈၵူၼ်း ၸတ်းႁဵတ်းတီႈတၢင်ႉယၢၼ်း ပွၵ်ႈၵမ်းႁႅၵ်ႈ မီးၵူၼ်းၼုမ်ႇၶဝ်ႈႁူမ်ႈ 100 ပၢႆ။
ဝၼ်းတီႈ 01-03/06/2018 ၶၢဝ်းတၢင်း 3 ဝၼ်း ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း၊ ၵေႃပူၵ်းပွင် ၵူၼ်းၼုမ်ႇၸိုင်ႈတႆး SSYCBC လႄႈ ဢိၵ်ႇလူၺ်ႈၵူၼ်းၼုမ်ႇ ထုင်ႉၼွင်ၽႃ ႁူမ်ႈၵၼ်ၸတ်းႁဵတ်း ပၢင်သွၼ်ယုၵ်ႉ မုၼ်းၼမ်ႉၵတ်ႉၵူၼ်းၼုမ်ႇလႄႈ ပၢင်ပၼ်ပိုၼ်ႉႁူႉသုၼ်ႇလႆႈၵူၼ်း တီႈဝတ်ႉဝိႁၢရ်ၼွင်ၽႃ ဢိူင်ႇၼွင်ၽႃ ၸႄႈဝဵင်း တၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။
ၸၢႆးပႃႉ ၽူႈဢွၼ်ႁူဝ်တူင်ႉၼိုင်ၸုမ်းၵူၼ်းၼုမ်ႇတႆး ၸႄႈဝဵင်းတၢင်ႉယၢၼ်းလၢတ်ႈတီႈၽူႈတွႆႇႁွၵ်ႈဝႃႈ “ တီႈထုင်ႉၼႆႉ တေမီးၵၢၼ်ၵေႃႇသၢင်ႈၾၢႆၼမ်ႉၶူင်း။ ပေႃးၶူင်းၵၢၼ်လူင်ၶဝ်ႈမႃးၼႆ လွင်ႈၵိုတ်းတီႈလိၼ် သူၼ်ႁႆႈၼႃး၊ လွင်ႈပူၼ်ႉ ပႅၼ်သုၼ်ႇလႆႈသုၼ်ႇပဵၼ်ၵူၼ်းၸိူဝ်းၼႆႉ ၵေႃႈတေမီးမႃး။ ၵဵဝ်ႇၵပ်းလွင်ႈၸိူင်ႉၼႆ ၶႂ်ႈႁႂ်ႈၵူၼ်းၼုမ်ႇၶဝ် မေႃၵွင်ႉ သၢၼ်ၵၼ်သေပိုၼ်ၽႄႈၶၢဝ်ႇငၢဝ်း” ဝႃႈၼႆ။
ၼၢင်းၶမ်းၼု ၽူႈၶဝ်ႈႁူမ်ႈပၢင်သွၼ် လၢတ်ႈဝႃႈ “ ၼင်ႇႁိုဝ် ၼေႃႇတႅၼ်းၶိူဝ်းႁဝ်းမိူဝ်းၼႃႈ ႁႂ်ႈမေႃပူၵ်းပွင်ၵႂႃႇတႃႇတူင်ႇ ဝူင်းၵူၼ်းလႄႈႁႂ်ႈမေႃၸွႆႈထႅမ်ၵၼ်။ ပၢင်သွၼ်ၼႆႉ ၸတ်းႁဵတ်းပဵၼ်ပွၵ်ႈၵမ်းႁႅၵ်ႈလႄႈ ၵူၼ်းၼုမ်ႇႁဝ်းၶဝ်လၢႆတီႈ လၢႆတၢင်း မႃးႁူပ်ႉထူပ်းၵၼ်ၼႆၵေႃႈ ပဵၼ်ဢၼ်ယိၼ်းၸူမ်း။ ၼင်ႇႁိုဝ် တေပဵၼ်မႃးပၢင်သွၼ်ၸိူင်ႉၼႆ ထႅင်ႈၼႆႉ ႁဝ်းၶႃႈ ၵူၼ်းၼုမ်ႇ မုင်ႈမွင်းဝႆႉယူႇ” ဝႃႈၼႆ။
ၼႂ်းပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇလႄႈ ပၢင်ပၼ်ပိုၼ်ႉႁူႉသုၼ်ႇလႆႈၵူၼ်းၼႆႉ မီးၽူႈလူင်ႉလႅၼ်ႇ ပူင် သွၼ်ပၼ် မိူၼ်ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း ပူင်သွၼ်ပၼ်ၵဵဝ်ႇၵပ်းသိုဝ်ႇၶၢဝ်ႇ။ ၵေႃပူၵ်းပွင် ၵူၼ်းၼုမ်ႇၸိုင်ႈတႆး SSYCBC သမ်ႉ ပူင်သွၼ်ပၼ် ၵဵဝ်ႇၵပ်းၵၢၼ်သုၼ်ႇလႆႈၵူၼ်း ၸိူဝ်းၼႆႉ ဝႃႈၼႆ။
ပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇလႄႈ ပၢင်ပၼ်ပိုၼ်ႉႁူႉသုၼ်ႇလႆႈၵူၼ်းၼႆႉ မီးၵူၼ်းၼုမ်ႇ ၼႂ်းဢိူင်ႇၼမ်ႉၶႃး၊ ဢိူင်ႇၼွင်ၽႃ၊ ဢိူင်ႇႁူၺ်ႈၵဵင်၊ ဢိူင်ႇလူင်မူင်ႈလႄႈ ဢိူင်ႇမိူင်းၵႅင် မႃးၶဝ်ႈႁူမ်ႈႁဵၼ်း ၸၢႆး 71 ၵေႃႉ၊ ယိင်း 31 ၵေႃႉ ႁူမ်ႈၵၼ် တင်းမူတ်း 102 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ