တႆးႁွတ်ႈၵဵင်းမႆႇ (ႁႅင်းၵၢၼ်ယၢၼ်မိူင်း) 16 ၸုမ်း ၶႅင်ႇပိတ်ႉမၢၵ်ႇၼင်မၢႆတွင်း ဝၼ်းၽူႈၼမ်းတႆးတႄႇၵၢၼ်လုၵ်ႉ ၽိုၼ်ႉ ၶွပ်ႈတဵမ် 60 ပီ။
ဝၼ်းတီႈ 03/06/2018 ယၢမ်းၵၢင်ဝၼ်း 12 မူင်း ထိုင် 6 မူင်းႁူဝ်ၶမ်ႈ ၵူၼ်းၼုမ်ႇတႆး(ႁႅင်းၵၢၼ်ယၢၼ်မိူင်း) လၢႆမူႇ လၢႆၸုမ်း ႁူမ်ႈၵၼ်သေ ၸတ်းႁဵတ်းပၢင်လဵၼ်ႈမၢၵ်ႇၼင် ႁႂ်ႈပဵၼ်တီႈမၢႆတွင်းဝၼ်းလုၵ်ႉၽိုၼ်ႉၸိုင်ႈတႆး ၶွပ်ႈတဵမ် 60 ပီလႄႈ ႁႂ်ႈၵူၼ်းၼုမ်ႇတႆး ၸိူဝ်းယူႇသဝ်းၼႂ်းၵဵင်းမႆႇ မိုတ်ႈၵိုဝ်းၸမ်ၸႂ်၊ ႁႂ်ႈယၢၼ်ၵႆၽေးယႃႈမဝ်းၵမ်၊ ႁႂ်ႈမေႃၽွမ်ႉႁူမ်ႈ ၵၼ်လႄႈ ႁႂ်ႈမေႃၸွႆႈထႅမ်တိုတ်ႉတၢႆးၵၼ်။ ပၢင်လဵၼ်ႈမၢၵ်ႇၼင် ၸတ်းႁဵတ်းတီႈ ပၢင်သၼၢမ်ယႃႈထဵမ်း ၵဵင်းမႆႇယူႊ ၼၢႆႊတဵတ်ႊ ၸႄႈဝဵင်းၵဵင်းမႆႇ ၸိုင်ႈထႆး။
ၸၢႆးၶိူဝ်းလႅင်း ၽူႈတူင်ႉၼိုင် လၢတ်ႈတီႈၽူႈတွႆႇႁွၵ်ႈဝႃႈ “ ၸုမ်းၵူၼ်းၼုမ်ႇႁဝ်း ဢၼ်မႃးၶဝ်ႈ ၶႅင်ႇၵၼ် တင်းမူတ်း မီး 16 ၸုမ်း။ ဢၼ်လႆႈၸတ်းႁဵတ်းပၢင်လဵၼ်ႈမၢၵ်ႇၼင်ၼႆႉ ႁႂ်ႈၵူၼ်းၼုမ်ႇႁဝ်း ၸိူဝ်းၽၢတ်ႇ ယၢၼ်ႁိူၼ်းယေးမႃးႁဵတ်း ၵၢၼ်မိူင်းပိူၼ်ႈၼႆႉ ၼင်ႇႁိုဝ် ႁဝ်းတေမီးလွင်ႈမိုတ်ႈၵိုဝ်းၸမ်ၸႂ်ၵၼ်၊ ၶဝ်ႈဢွၵ်ႇၵၼ်။ ထႅင်ႈလွင်ႈၼိုင်ႈၵေႃႈ ႁႂ်ႈယၢၼ် ၵႆၽေးယႃႈမဝ်းၵမ်။ ၼွၵ်ႈလိူဝ်ၼၼ်ႉ ႁႂ်ႈမေႃႁၵ်ႉၵၼ်။ ယဝ်ႉၵေႃႈ ႁႂ်ႈၵၢၼ်ၽိတ်းမေႃး ၵၼ်ၼၼ်ႉ လူတ်းယွမ်းလူင်း။ ယိူင်းဢၢၼ်းထႅင်ႈလွင်ႈၼိုင်ႈတႄႉ ငိုၼ်းဢၼ်ႁဝ်းၶႃႈ ၵဵပ်းၵၼ်မႃးၼၼ်ႉ သင်ဝႃႈ မၼ်းလိူဝ်ၼႆ ႁဝ်းၶႃႈ တေသိုဝ်ႉ ၶိူင်ႈၸႂ်ႉတိုဝ်း ပၼ်လုၵ်ႈဢွၼ်ႇတႆး တီႈႁူင်းႁဵၼ်းၸိူဝ်ႉၸၢတ်ႈ လွႆတႆးလႅင်း” ဝႃႈၼႆ။
ပၢင်ၶႅင်ႇလဵၼ်ႈမၢၵ်ႇၼင်ၼႆႉ တင်းမူတ်း ၵူၼ်းၼုမ်ႇၶဝ်ႈႁူမ်ႈၶႅင်ႇၵၼ် 16 ၸုမ်း။ ၼႂ်း 16 ၸုမ်းၼၼ်ႉ ဢၼ် လႆႈႁပ်ႉသူးရၢင်းဝလ်းတီႈၼိုင်ႈ ပဵၼ်ၸုမ်းၶုၼ်ႁၢၼ် ၵဵင်းမႆႇ၊ သူးရၢင်းဝလ်းတီႈသွင် ၸုမ်းပႃသူးၽၼ်း ၵဵင်းမႆႇလႄႈ သူးရၢင်းဝလ်းတီႈသၢမ် ၸုမ်းၵၢတ်ႇမိူင်းမႂ်ႇ ၸိူဝ်းၼႆႉ ဝႃႈၼႆ။
ၸၢႆးၶိူဝ်းလႅင်းလၢတ်ႈဝႃႈ “ ၸုမ်းဢၼ်လႆႈသူးရၢင်းဝလ်းတီႈၼိုင်ႈသမ်ႉ ႁဝ်းၶႃႈ တွၼ်ႈပၼ်ငိုၼ်း 5,000 ဝၢတ်ႇတင်း ထူၺ်ႈရၢင်းဝလ်း 1 ဢၼ်၊ သူးတီႈသွင်သမ်ႉ တွၼ်ႈပၼ်ငိုၼ်း 2,000 ဝၢတ်ႇ တင်းထူၺ်ႈရၢင်းဝလ်း 1 ဢၼ်၊ သူးတီႈ သၢမ်သမ်ႉ တွၼ်ႈငိုၼ်း 700 ဝၢတ်ႇလႄႈ တင်းထူၺ်ႈ 1 ဢၼ်။ ၼွၵ်ႈလိူဝ်ၼၼ်ႉ တွၼ်ႈပႃးထႅင်ႈ သူးၼမ်ႉၸႂ် ထႅင်ႈ လၢႆလၢႆဢၼ်” ဝႃႈၼႆ။
ၸုမ်းတႆးဢၼ်ၶဝ်ႈၶႅင်ႇၵၼ် ၼႂ်း 16 ၸုမ်း။ ၸုမ်းလၢႆႊတူဝ်တူၼ်ႈ၊ ၸုမ်းပဢူဝ်း၊ ၸုမ်းပၢင် လူင်၊ ၸုမ်းၵၼ်သႃးလီး၊ ၸုမ်း UFAWIN ၊ ၸုမ်းၵၢတ်ႇမိူင်းမႂ်ႇ၊ ၸုမ်းပႃသူးၽၼ်း၊ ၸုမ်းၻိူဝ်ႊၵဵၵ်ႊ၊ ၸုမ်းၵူၼ်းၼုမ်ႇ တႆး၊ ၸုမ်းဢေႃႊသတႃႊ၊ ၸုမ်းၶုၼ်ႁၢၼ်(1)၊ ၸုမ်းသိူဝ်ၼုမ်ႇၾႃႉ၊ ၸုမ်းၼုမ်ႇႁႅင်းၵၢၼ်၊ ၸုမ်းၶုၼ်ႁၢၼ်(2)၊ ၸုမ်း သိူဝ်ယၢၼ်မိူင်းလႄႈ ၸုမ်းတၢင်ႉယၢၼ်း ၸိူဝ်းၼႆႉ။
