တႃႇသၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ်တင်းသွင် ၸိုင်ႈမိူင်းၼႆသေ တီႈလၢၼ်ႇလၵ်းတႅင်ႇ လႅၼ်လိၼ်တႆး – ထႆး ပိုတ်ႇပၼ်ၵူၼ်းပိုၼ်ႉတီႈ တင်းသွင်ၾင်ႇၶဝ်ႈဢွၵ်ႇၵႂႃႇမႃးသူႇၸႂ်းၵၼ်။

ဝၼ်းတီႈ 25/05/2024 ယၢမ်းၵၢင်ၼႂ် 8 မူင်းထိုင် 4 မူင်းၶိုင်ႈ ဝၢႆဝၼ်း ၸဝ်ႈၼႃႈတီႈထႆး – မၢၼ်ႈ တူၵ်းလူင်းလႆႈၸႂ်ၵၼ်သေ ပိုတ်ႇလၢၼ်ႇလၵ်းတႅင် လႅၼ်လိၼ်တႆး – ထႆး တီႈဝၢၼ်ႈလၵ်းတႅင်ႇ ဢိူင်ႇပဵင်းလူင် ဝဵင်းႁႅင် ၸႄႈတွၼ်ႈၵဵင်းမႂ်ႇ ၸိုင်ႈထႆး တွၼ်ႈတႃႇ ၵူၼ်းပိုၼ်ႉတီႈ တင်းသွင်ၾင်ႇ ပေႃးတေမိုတ်ႈၵိုဝ်းၸမ်ၸႂ်ၵၼ် လႄႈ သိုဝ်ႉၶၢႆတေႃႇၵၼ် ဝႃႈၼႆ။

ၵူၼ်းပိုၼ်ႉတီႈ လၵ်းတႅင်ႇ လၢတ်ႈတီႈၽူႈတွႆႇႁွၵ်ႈဝႃႈ – “တွၼ်ႈတႃႇ တေၸမ်ၸႂ်ၵၼ်ၼႆသေ သိုၵ်းမၢၼ်ႈတင်း သိုၵ်းထႆး ၶေႉၶဵင်ႇလဵၼ်ႈမၢၵ်ႇၼင်လႄႈ Volleyball ၵၼ်။ ယဝ်ႉၵေႃႈ မီးၵူၼ်းမိူင်းႁဝ်းၶႃႈတင်း မိူင်းတေႃႉ – မိူင်းထႃး မႃး ၶၢႆၽၵ်းၶဵဝ် ဢၼ်ဢွၵ်ႇၼႂ်းပိုၼ်ႉတီႈ ၸိူဝ်းၼႆႉ”- ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈ ၸဝ်ႈၼႃႈတီႈ ၽူႈယႂ်ႇၵူၼ်းလူင် တၢင်းၾင်ႇထႆးလႄႈ တူဝ်တႅၼ်း သိုၵ်းမၢၼ်ႈ ၸိူဝ်းၼႆႉ ၶဝ်ႈႁူမ်ႈ ပိုတ်ႇပၢင်ပွႆး ဝႃႈၼႆ။

“ပီၼႆႉတႄႉ ဢမ်ႇပေႃးၵိုၼ်းတၢၼ်ႇၵူႈပီၶႃႈ ယွၼ်ႉဝႃႈၵူၼ်းပိုၼ်ႉတီႈ လၢႆလၢႆဝၢၼ်ႈ ဢမ်ႇလႆႈႁၼ်လိၵ်ႈ ပိုၼ်ၽၢဝ်ႇ ဢမ်ႇလႆႈႁူႉၵၼ် ၸိူဝ်းၼႆႉၶႃႈဢေႃႈ။ ၵူႈပီတႄႉ ၵိုၼ်းလိူဝ်ၼႆႉဢေႃႈ ယွၼ်ႉၵူၼ်းဝၢၼ်ႈႁူႉဝႆႉ လူင်ႈၼႃႈ။ ပၢင်ဢၼ်ၶဝ် ၶေႉၶဵင်ႇမၢၵ်ႇၼင်ၼၼ်ႉ ၸတ်းႁဵတ်းတီႈၼႂ်းဝၢင်းႁူင်းႁဵၼ်းလၵ်းတႅင်ႇၶႃႈ”- ဝႃႈၼႆ။

ၵမ်ႈၼမ် ၵူၼ်းမိူင်းတႆး ဢၼ်ၵႂႃႇၶၢႆၽၵ်းၶဵဝ် တီႈလၢၼ်ႇလၵ်းတႅင်ႇၼၼ်ႉသမ်ႉ ပဵၼ်ၵူၼ်းမိူင်းတေႃႉ၊ မိူင်းထႃး ၸိူဝ်း ၼႆႉ။ ၵမ်ႈၼမ် ဢဝ်ၶူဝ်းသူၼ် မိူၼ်ၼင်ႇ ၽၵ်းမၼ်း၊ ႁဵပ်းတွပ်း၊ တႅင်ႁႆႈ ၸိူဝ်းၼႆႉမႃးၶၢႆ ။ တၢင်းၾင်ႇထႆးသမ်ႉ တေမႃးၶၢႆ မိူၼ်ၼင်ႇ သိူဝ်းၶူဝ်း၊ ၶွင်ၵိၼ်ယႅမ်ႉ ၸိူဝ်းၼႆႉ။

လၢၼ်ႇလၵ်းတႅင်ႇၼႆႉ ပဵၼ်လၢၼ်ႇလႅၼ်လိၼ်တႆး – ထႆး ပေႃးလုၵ်ႈဢဝ်တီႈလၢၼ်ႇလၵ်းတႅင်ႇၼၼ်ႉမႃးၸိုင် တေမီး မူႇဝၢၼ်ႈ မိူၼ်ၼင်ႇ ဝၢၼ်ႈပၢင်ၵမ်ႉၵေႃႇ၊ ဝၢၼ်ႈမႂ်ႇသုင်၊ ဝၢၼ်ႈပၢင်ႁွၵ်ႈလႄႈ ဝၢၼ်ႈႁူၺ်ႈယၢဝ်း 4 မူႇဝၢၼ်ႈၼႆႉတႄႉ ႁၢမ်းယဝ်ႉ။ လိူဝ်ၼၼ်ႉ ၵိုတ်းဝႆႉမိူင်းထႃးလႄႈ မိူင်းတေႃႉ ၸိူဝ်းၼႆႉ။

လၢၼ်ႇလၵ်းတႅင်ႇ လႅၼ်လိၼ်တႆး – ထႆးၼႆႉ လႆႈထုၵ်ႇပိၵ်ႉဢိုတ်းမႃး မိူဝ်ႈပီ 2002 ၼၼ်ႉသေ ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်း 22 ပီယဝ်ႉ ယင်းပႆႇပိုတ်ႇ။