သင်ၶၸဝ်ႈလႄႈ ၵူၼ်းဝၢၼ်ႈၵူၼ်းမိူင်းႁူမ်ႈၵၼ် ၸတ်းႁဵတ်းပၢင်ပွႆးလူင်းပၢင်သွၼ် ၾိင်ႈငႄႈ ပုတ်ႉထလႄႈ လိၵ်ႈလၢႆးတႆး တီႈလၢင်းၶိူဝ်း ပိူဝ်ႈယုၵ်ႉမုၼ်းလိၵ်ႈၾိင်ႈႁိတ်ႈႁွႆးႁႂ်ႈၶိုၼ်ႈယႂ်ႇ။
ဝၼ်းတီႈ 29/05/2018 ၸဝ်ႈသြႃႇၸႃႇရိၼ်ႇတ ဝတ်ႉၵွင်းမူး၊ ၸဝ်ႈသြႃႇၵုင်ႇမႃႇၸႃႇရ ဝတ်ႉပရႁိတ မႆႉၵႅင်းမူၼ်း လႆႈဢွၼ်ႁူဝ်သင်ၶၸဝ်ႈ ၊ ၶူးသွၼ်၊ လုၵ်ႈႁဵၼ်းဢိၵ်ႇပေႃႈမႄႈ ၵူၼ်းဝၢၼ်ႈ ၵူၼ်းမိူင်း ထုင်ႉဝၢၼ်ႈႁၢတ်ႇ ပွတ်း ၾၢႆႇၸၢၼ်းဝဵင်းလၢင်းၶိူဝ်း 5 ဢိူင်ႇႁူမ်ႈၵၼ်ၸတ်းႁဵတ်း ပွႆးလူင်းပၢင် သွၼ်ၾိင်ႈငႄႈပုတ်ႉထလႄႈ လိၵ်ႈလၢႆးတႆး တီႈဝတ်ႉၵွင်းမူး ဝၢၼ်ႈၼႃးၵူင်း ထုင်ႉဝၢၼ်ႈႁၢတ်ႇ ၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း။
ၸဝ်ႈၶူးဢိၼ်ႇတဝုၼ်ႇသ ၽူႈၶဝ်ႈပႃးတႃႇပွင်ပဵၼ်ပၢင်သွၼ်လၢတ်ႈဝႃႈ “ ယိူင်းဢၢၼ်းၶႂ်ႈႁႂ်ႈမီး လွင်ႈၽွမ်ႉၽဵင်ႇၵၼ်လႄႈ ၼင်ႇႁိုဝ်လုၵ်ႈဢွၼ်ႇၶဝ် တေမေႃလိၵ်ႈတႆး လွင်ႈၸိူဝ်ႉၶိူဝ်း ၸဝ်ႈၵဝ်ႇ သေဢမ်ႇၵႃး ၶၢဝ်းယၢမ်းလိုဝ်ႈႁဵၼ်း လူင်ပွင်ၸိုင်ႈမၢၼ်ႈၼႆႉ ၼင်ႇႁိုဝ်လုၵ်ႈဢွၼ်ႇၶဝ်ပေႃးတေ ဢမ်ႇလႆႈၸႂ်ႉၶၢဝ်းယၢမ်းပႅတ်ႈလၢႆလၢႆလႄႈ ၸင်ႇလႆႈ ၸတ်းႁဵတ်း” ဝႃႈၼႆ။
ပၢင်သွၼ်ႇၼႆႉတႄႇပူင်သွၼ်ပၼ်ဝၼ်းတီႈ 17/03/2018 တေႃႇထိုင် ဝၼ်းတီႈ 29/05/2018 မီးလုၵ်ႈႁဵၼ်း မႃးၶိုၼ်ႈႁဵၼ်းဢဝ်1557ၵေႃႉ ၊ ၶူးသွၼ်ဢၼ်ပဵၼ်သင်ၶၸဝ်ႈမီး19 ၸဝ်ႈ ၊ မေႃသွၼ်ၸၢႆး 17ၵေႃႉ၊ မေႃသွၼ်ယိင်း 80 ၵေႃႉ ႁူမ်ႈတင်းသဵင်ႈ 116 ၵေႃႉ ပူင်သွၼ်ပၼ်လိၵ်ႈတႆး၊ ၾိင်ႈႁိတ်ႈႁွႆးတႆးပႃးၸဵမ်တၢင်းႁူႉလွင်ႈၶွမ်ႊၽိဝ်ႊ တိူဝ်ႊတွၼ်ႈတႃႇၶူးသွၼ်ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ