ၸုမ်းပွင်ၵၢၼ်ပႃႇတီႇႁူဝ်သိူဝ် SNLD ၸႄႈဝဵင်းၼမ်ႉၶမ်း ၸတ်းႁဵတ်းပၢင်ပွႆးၶွပ်ႈၶူပ်ႇ ၶွတ်ႇၽွတ်ႈၸုမ်းပွင်ၵၢၼ် ပႃႇတီႇႁူဝ်သိူဝ် SNLD ၸႄႈဝဵင်းၼမ်ႉၶမ်းတဵမ် 2 ပီ ဢုပ်ႇဢူဝ်းတမ်းဝၢင်းၽႅၼ်ၵၢၼ်မိူဝ်းၼႃႈ။
ဝၼ်းတီႈ 29/05/2018 ၸုမ်းပွင်ၵၢၼ်ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး (ႁိုဝ်) ပႃႇတီႇ ႁူဝ်သိူဝ် SNLD ၸတ်းႁဵတ်းပၢင်ႁူပ်ႉထူပ်း ၼႂ်းတိုဝ်ႉတၢင်းၶွတ်ႇၽွတ်ႈၸုမ်းပွင်ၵၢၼ် (EC) ၶွပ်ႈတဵမ် 2 ပီ တီႈႁူင်းတူမ်ႈႁုင် တႅၼ်ႇမၢဝ်းၶမ်း ၼႂ်းပွၵ်ႉတႅၼ်ႇမႃႉ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။
ၸၢႆးၼွင်ႉ ၵႅမ်ၽူႈၼမ်းၼႂ်း (1) ၸုမ်းပႃႇတီႇႁူဝ်သိူဝ် လၢတ်ႈဝႃႈ – “ ယိူင်းဢၢၼ်းဢၼ်ႁဝ်းၶႃႈၸတ်းႁဵတ်းၼႆႉ ယွၼ်ႉပေႃႈမႄႈပီႈၼွင်ႉၵူၼ်းမိူင်းႁဝ်းပႆႇလႆႈႁူပ်ႉၽူႈတႅၼ်းလႄႈ ႁႂ်ႈပေႃးလႆႈႁူပ်ႉထူပ်းၵၼ် ။ ၸူဝ်ႇပႆႇမီး ၽူႈတႅၼ်းၼႂ်းၸႄႈဝဵင်းၼမ်ႉၶမ်းၼႆႉၵေႃႈ ႁႂ်ႈပေႃႈမႄႈပီႈၼွင်ႉၵူၼ်းမိူင်းမေႃသၢၼ်မိုဝ်းၵၼ်တင်း ၸုမ်းပွင်ၵၢၼ်ပႃႇတီႇႁူဝ်သိူဝ်ၵႂႃႇ ႁႂ်ႈပဵၼ်ၶေႃႈလဵဝ်သဵင်လဵဝ်ၵၼ် တႃႇၸွႆႈထႅမ်ၵႄႈလိတ်ႈလႆႈလွင်ႈပၼ်ႁႃ ဢၼ်တေၸၢင်ႈမေႃၵိူတ်ႇ ဢွၵ်ႇပဵၼ်မႃးၼၼ်ႉ ” ဝႃႈၼႆ။
ၼႂ်းပၢင်ၼႆႉ ဢွၼ်ၵၼ်တၵ်ႉယမ်တုင်းၸိူဝ်ႉၸၢတ်ႈ၊ တၵ်ႉယမ်ၽူႈႁတ်းႁၢၼ် ဢၼ်လူႉႁၢႆတၢႆ ၵႂႃႇတွၼ်ႈတႃႇ ၸိူဝ်ႉ ၸၢတ်ႈဝၢၼ်ႈမိူင်းတင်းသဵင်ႈ၊ ႁူမ်ႈၵၼ်ႁွင်ႉၽဵင်းၵႂၢမ်း ၶိူဝ်းတႆးၶိူဝ်းရႃႇၸႃႇ၊ တၵ်ႉယမ်တုင်းပႃႇတီႇႁူဝ်သိူဝ်၊ ႁူမ်ႈႁွင်ႉ ၽဵင်းၵႂၢမ်းယႃႇႁႂ်ႈဢဵၼ်ႁႅင်းႁၢႆ။ မီးၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း၊ ၼၢင်းၶမ်းဢေး ၽူႈတႅၼ်းသၽႃးၵူၼ်းမိူင်းၼမ်ႉတူႈ ၊ ၽူႈယႂ်ႇၵူၼ်းလူင်ၼႂ်းပႃႇတီႇလႄႈ လုၵ်ႈၸုမ်းဢိၵ်ႇ တပ်ႉသိုၵ်းၵူၼ်းမိူင်းသႅင်ၵႅဝ်ႉၸိူဝ်း ၼႆႉ ၶဝ်ႈႁူမ်ႈ1,000 ပၢႆ။
လုင်းသြႃႇမၢဝ်းၶမ်း ၽူႈၼမ်းၼႂ်းလူင် ၸုမ်းပွင်ၵၢၼ်ပႃႇတီႇႁူဝ်သိူဝ်ၼမ်ႉၶမ်း လၢတ်ႈဝႃႈ – “ ပၢင်ပွႆးၶွပ်ႈၶူပ်ႇႁဝ်း ယဝ်ႉတူဝ်ႈၵႂႃႇလီငၢမ်း ယိၼ်းၸူမ်းယႂ်ႇၼမ်ထိုင်ၽူႈတႅၼ်း၊ ၸုမ်းပွင်ၵၢၼ်ၵူႈၵေႃႉ၊ ၵူၼ်းဝၢၼ်ႈၵူၼ်းမိူင်း လႄႈ ၸုမ်းသိုၵ်းၵူၼ်းမိူင်း ဢၼ်မႃးၸွႆႈထႅမ် ၵူႈလွင်ႈလွင်ႈၼႂ်းပွၵ်ႈၵမ်းၼႆႉ” ဝႃႈၼႆ။
တီႈပၢင်ၼၼ်ႉ မီးပႃးပၢင်မွပ်ႈယိုၼ်ႈသူးမေႃသွၼ်လိၵ်ႈတႆး 5 ၵေႃႉ ဢၼ်လႆႈႁပ်ႉသူးၽူႈၵတ်ႉၶႅၼ်ႇ မႃးတီႈပၢင်သွၼ်မူႇၸေႊ ဢၼ်ၸတ်းမိူဝ်ႈဝၼ်းတီႈ 11-25 ပူၼ်ႉမႃး။ လိူဝ်ၼၼ်ႉၸုမ်းၵူၼ်းၼုမ်ႇလႄႈ ၸုမ်းမႄႈႁိူၼ်းၼုမ်ႇမူႇၸေႊ၊ ၸေႊလၢၼ်ႉ ၶဝ်ဢွၼ်ၵၼ်မႃးၼႄတၢင်းၵႃႈ လဝ်ႇမူၼ်ႈတူၼ်ႈၸႂ်ပၼ်ၼႆယဝ်ႉ။
ပႃႇတီႇႁူဝ်သိူဝ် SNLD ၼႆႉ ဢွင်ႇပေႉပၢင်လိူၵ်ႈတင်ႈ မိူဝ်ႈဝၼ်းတီႈ 8/11/2015 ၼၼ်ႉလႆႈတီႈၼင်ႈ 40 တီႈ ၽူႈတႅၼ်းသၽႃးၸိူဝ်ႉၸၢတ်ႈ 3 ၵေႃႉ၊ ၽူႈတႅၼ်းသၽႃးၵူၼ်းမိူင်း 12 ၵေႃႉ။ ၽူႈတႅၼ်းသၽႃး ၸႄႈမိူင်း 25 ၵေႃႉ၊ မိူဝ်ႈပၢင်လိူၵ်ႈတင်ႈသွမ်ႈ 1/4/2017 ၼၼ်ႉၵေႃႈ ပႃႇတီႇႁူဝ်သိူဝ်ပေႉပၢင်လိူၵ်ႈတင်ႈ ၼႂ်းသၽႃးၵူၼ်းမိူင်း 2 ၵေႃႉ ၸႄႈမိူင်း 4 ၵေႃႉဝႃႈၼႆ။ တီႈၼႂ်းဝဵင်းၼမ်ႉၶမ်းတႄႉ ပႃႇတီႇတဢၢင်းပေႉၵႂႃႇၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ