ၾႆးမႆႈ ႁၢၼ်ႉၼမ်ႉၼဵင်ႈ တီႈဝဵင်းတူၼ်ႈတီႈ လူႉသုမ်းဢမ်ႇယွမ်း 150 သႅၼ်ပျႃး ယွၼ်ႉၾႆးၾႃႉသျွတ်ႉ ဝႃႈၼႆ။

ဝၼ်းတီႈ 14/05/2024 ယၢမ်းၵၢင်ၶမ်ႈမွၵ်ႈ 7 မူင်း ၾႆးမႆႈႁၢၼ်ႉၼမ်ႉၼဵင်ႈ သူၺ်ႇယီႇၼူႉ (ရွှေရည်နု) တီႈပွၵ်ႉႁေႃၵုင်း ဝဵင်းတူၼ်ႈတီး ၸိုင်ႈတႆးပွတ်းၸၢၼ်း လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီးယွၼ်ႉၾႆးမႆႈၵႂႃႇတင်းလင်လႄႈ ၶူဝ်း ၶွင်ၼႂ်းႁၢၼ်ႉ ၸိူဝ်းၼႆႉတႄႉ ဢမ်ႇတၼ်းလႆႈသင် ၺႃးၾႆးမႆႈပႅတ်ႈမူတ်း ဝႃႈၼႆ။

ၸုမ်းၶႂၢႆႇၶႃပႄလႅင် ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၾႆးမႆႈႁိူၼ်းၼႆႉ ပေႃးပဵၼ်လွင်ႈလူႉ သုမ်းၼႆ လၢမ်းၶၢတ်ႈဝႆႉ ၵႃႈၶၼ်ငိုၼ်းၼႆႉ ဢမ်ႇယွမ်း 150 သႅၼ်ၶႃႈ။ ဢၼ်ၾႆးမႆႈၼႆႉၵေႃႈ လႆႈႁူႉဝႃႈ တႄႇ မႆႈၸၼ်ႉၼိူဝ်လူင်းမႃး ၵမ်ႈၼမ်တႄႉဝႃႈ ပဵၼ်ယွၼ်ႉၾႆးၾႃႉသျွတ်ႉၼႆၶႃႈဢေႃႈ။ မိူဝ်ႈၽွင်းၾႆးမႆႈၼၼ်ႉ ၸၼ်ႉၼိူဝ်ၼႆႉ ဢမ်ႇမီးၽႂ်ယူႇဝႆႉလႄႈ ဢမ်ႇလႆႈႁူႉဝႃႈ မႆႈယွၼ်ႉသင်”- ဝႃႈၼႆ။

ႁၢၼ်ႉၼမ်ႉၼဵင်ႈ သူၺ်ႇယီႇၼူႉၼႆႉ မီးဝႆႉတီႈ သဵၼ်ႈတၢင်းမျၢတ်ႉလေး ဝဵင်းတူၼ်ႈတီး တိတ်းၸပ်းႁူင်းၸၢၵ်ႈႁဵတ်း ၼမ်ႉသႂ် (သူဝ်ႇလႃႇ)၊ ယူႇတီႈ ႁွင်ႈၵၢၼ်ၾၢႆႇၶႄၾႆးတင်း ၵူၼ်းၼႂ်းပွၵ်ႉ ႁူမ်ႈၵၼ် ၸွႆႈၶႄၾႆး လႆႈၸႂ်ႉၶၢဝ်းယၢမ်းႁိုင်မွၵ်ႈၼိုင်ႈၸူဝ်ႈမူင်းသေ ၾႆးၸင်ႇတေမွၵ်ႇၵႂႃႇ ဝႃႈၼႆ။

“ႁိူၼ်းၼႆႉ ပဵၼ်ႁိူၼ်းသၢမ်ၸၼ်ႉ ဢၼ်မႆႈၵႂႃႇသမ်ႉ မႆႈၵႂႃႇတႃႇသွင်ၸၼ်ႉ။ ၶႃႈတႄႉ ပႂ်ႉၸွႆႈၶႄၾႆး တေႃႇပေႃးယဝ်ႉ ၶႃႈ ဢေႃႈ။ ၽွင်းၼၼ်ႉ ၸဝ်ႈၼႃႈတီႈ ၽူႈမီးပုၼ်ႈၽွၼ်းလႄႈ ပလိၵ်ႈၶဝ် တိုၵ်ႉဢွၼ်ၵၼ်ၵူတ်ႇ ထတ်းတူၺ်းယူႇ ၵူၺ်း ၵႃႈ ဢမ်ႇမၵ်းမၼ်ႈလႆႈဝႃႈ ဢၼ်ၾႆးမႆႈၼႆႉ ပဵၼ်ယွၼ်ႉသင်တႄႉတႄႉ”- ၸုမ်းၶႂၢႆႇၶႃပႄလႅင် ဝဵင်းတူၼ်ႈတီး သိုပ်ႇလၢတ်ႈၼႄၼင်ႇၼႆ။

ပူၼ်ႉမႃးမိူဝ်ႈဝၼ်းတီႈ 13 ယၢမ်းၵၢင်ၶမ်ႈ ၽွင်းတမ်ယၢမ်းတႃႇႁဵတ်းႁူင်းၾႆးမိၼ်ၼၼ်ႉ ဢဝ်တႅၵ်ႇၽူင်ႉ လၢမ်းမႆႈႁိူၼ်း ၼႂ်းပွၵ်ႉမင်ႇၵလႃႇ ဝဵင်းဢွင်ႇပၢၼ်း ၸိုင်ႈတႆးပွတ်းၸၢၼ်း၊ ႁိူၼ်းတင်းလင် ၾႆးမႆႈလူႉၵွႆမူတ်း ၵူၼ်းၸၢႆး 3 ၵေႃႉ ၺႃး ၾႆးႁုပ်ႇမႆႈ မၢတ်ႇၸဵပ်းႁႅင်း။ 

ၵူၼ်းၸၢႆး 3 ၵေႃႉၼၼ်ႉ ပဵၼ်ဢူးဢွင်ႇမျိၼ်ႉ ဢႃယု 56 ပီ ၊ ဢူးဝိၼ်းဢူး ဢႃယု 61 ပီ လႄႈ ၵူဝ်ႇလုၼ်ႇဢူး ဢႃယု 24 ပီ ယွၼ်ႉၾႆးႁုပ်ႇမႆႈမၢတ်ႇၸဵပ်းႁၢဝ်ႈႁႅင်းလႄႈ ယူႇတီႈ ႁူင်းယႃဢွင်ႇပၢၼ်း လႆႈသိုပ်ႇသူင်ႇထိုင် ႁူင်းယႃတူၼ်ႈတီးဝႆႉ ဝႃႈ ၼႆ။

ၼႂ်းၸိုင်ႈတႆးပွတ်းၸၢၼ်း မိူၼ်ၼင်ႇ ဝဵင်းတူၼ်ႈတီး၊ ဢွင်ႇပၢၼ်း၊ ၵၢတ်ႇလေႃႉ၊ ႁူဝ်ပူင်း ၸိူဝ်းၼႆႉ ၽွင်းတမ်ယၢမ်းတႃႇႁဵတ်းႁူင်းၾႆးမိၼ်သေ ၵႆႉပဵၼ်လွင်ႈတႅၵ်ႇၽူင်ႉ ၾႆးႁုပ်ႇလၢမ်းမႆႈ ႁိူၼ်းယေးလူႉၵွႆၼမ်၊ မၢင်ပီ ထိုင်တီႈၵူၼ်းလူႉတၢႆၸွမ်းၵေႃႈမီး ဝႃႈၼႆ။