ၸၼ်ႉၸွမ်မႁႃၸုလႃး ႁူမ်ႈမိုဝ်းၵၼ်တင်း ၸုမ်းၸၢတ်ႈၸိုင်ႈလုမ်ႈၾႃႉ UNESCAP ၸတ်းႁဵတ်း ပၢင်ဢုပ်ႇၶႆႈ လွင်ႈဝၼ်းဝိသႃၶၿူးၶျႃး လုမ်ႈၾႃႉ မီးသင်ၶၸဝ်ႈလႄႈ တူဝ်တႅၼ်းၵူၼ်းမိူင်း 84 မိူင်း ၶဝ်ႈႁူမ်ႈၼပ်ႉႁူဝ်ႁဵင်။
ဝၼ်းတီႈ 25 -27/05/2018 ၸၼ်ႉၸွမ်မႁႃၸုလႃးလူင်းၵွၼ်း ႁူမ်ႈမိုဝ်းၵၼ်တင်း ၶွမ်ႊမသျိၼ်ႊ ပၢႆးပိူင်ၵူၼ်းလႄႈ ပၢႆးမၢၵ်ႈမီးဢေႊသျိူဝ်ႊပႄႊသိၾိၵ်ႊ UNESCAP ( United Nations Economic and Social Com mission for Asia and the Pacific ) ၸတ်းႁဵတ်းပၢင်ၵုမ်လူင်ၶွၼ်ႊၾရႅၼ်ႉသ် ႁူမ်ၸူမ်း ဝၼ်းဝိသႃၶၿူးၶျႃး လုမ်ႈၾႃႉ “United Nations Day of Vesak” ၵမ်းထူၼ်ႈ 15 မီးသင်ၶၸဝ်ႈ တူဝ်တႅၼ်းၼွၵ်ႈမိူင်း 84 မိူင်း ၶဝ်ႈႁူမ်ႈ ။
ဝၼ်းတီႈ25 လႄႈ 26 ၸတ်းႁဵတ်းတီႈ ႁွင်ႈႁေႃးၸၼ်ႉၸွမ်မႁႃၸုလႃးလူင်းၵွၼ်း ၸႄႈဝဵင်းဝင်းၼွႆႉ ၸႄႈတွၼ်ႈ ဢယုတ်ႉထယႃး ၸိုင်ႈထႆး ဝၼ်းတီႈ 27 သမ်ႉၸတ်းႁဵတ်းတီႈ ႁွင်ႈပၢင်ၵုမ် ၸၢတ်ႈၸိုင်ႈလုမ်ႈၾႃႉ (United Nations Conference Centre: UNCC) မိူင်းၵွၵ်ႇ ၸိုင်ႈထႆး ။
ယိူင်းဢၢၼ်းဢၼ်ၸတ်းႁဵတ်းၼႆႉ ပိူဝ်ႈယုၵ်ႉမုၼ်းသႃသၼႃပုတ်ႉထၸဝ်ႈ တႃႇပိုၼ်ၽႄႈ ႁႂ်ႈသႃသၼႃႁိူဝ်ႈႁိူင်းပိူင်းသႂ်ၵႂႃႇမိူဝ်းၼႃႈ ၸိူဝ်းၼႆႉ။
ၸဝ်ႈၶူးလူင် Dr.ၶမ်းမၢႆထမ်မသႃမိ လၢတ်ႈတီႈၼႂ်းပၢင်ၵုမ်ၼၼ်ႉဝႃႈ “ မီးတၢင်းၸူမ်းသိူဝ်းဢၼ်လႆႈ ႁၼ်တၵ်ႉၵႃႇသတ်ႉထႃးၸိူဝ်းမႃးၸွႆႈမႃးထႅမ် ။ တႃႇတေပူၵ်းပွင်သႃသၼႃၼႂ်းမိူင်းႁဝ်း ပေႃးတေႁိူဝ်ႈ ႁိူင်းပိူင်းသႂ်ၵႂႃႇၼၼ်ႉ ၵေႃႉလဵဝ်ႁဵတ်းဢမ်ႇလႆႈ ၵူႈၵေႃႉၵူႈၾၢႆႇႁူမ်ႈၵၼ်ၸွႆႈၵၼ်ၸင်ႇပဵၼ်လႆႈ ” ဝႃႈၼႆ။
ၼႂ်းပၢင်ၼႆႉယူႇတီႈၸဝ်ႈတူၼ်ၶူးလူင် Dr.ၶမ်းမၢႆ ထမ်မသႃမိသေ ဢွၼ်ႁူဝ်သင်ၶၸဝ်ႈလႄႈ ပီႈၼွင်ႉတႆးၶဝ်ႈႁူမ်ႈတင်းၼမ်။
ၼၢင်းၶမ်းဢူး ၽူႈၶဝ်ႈႁူမ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်လႆႈၶဝ်ႈႁူမ်ႈၼႆႉ ပဵၼ်ဢၼ်ယိၼ်းၸူမ်းတႄႉၶႃႈဢေႃႈ မိူဝ်းၼႃႈမႃးပေႃးမီးတိုဝ်ႉတၢင်းၼႆ ၶႂ်ႈႁႂ်ႈပီႈၼွင်ႉႁဝ်းၶႃႈ ၶဝ်ႈႁူမ်ႈၼမ်ၼမ်ၶႃႈ။ ယူႇတီႈၸဝ်ႈတူၼ်ၶူးလူင်ႁဝ်းၵေႃႈ ႁၼ်မၼ်းၸဝ်ႈမီးတၢင်းၸူမ်းသိူဝ်းၶႃႈဢေႃႈ ပေႃးမီးပီႈၼွင်ႉတႆး မႃးၶဝ်ႈႁူမ်ႈၼမ်” ဝႃႈၼႆ။
ဝၼ်းဝိသႃၶၿူးၶျႃးၼႆႉ ၸၢတ်ႈၸိုင်ႈလုမ်ႈၾႃႉ ယွမ်းႁပ်ႉသေမၵ်းမၼ်ႈ ပဵၼ်ဝၼ်းလမ်ႇလွင်ႈ ၼႂ်းလုမ်ႈၾႃႉ International Day of Vesak မႃး မိူဝ်ႈဝၼ်းတီႈ 15 ၻီႊသႅမ်ႊၿိူဝ်ႊ 1999 သေ တႄႇၸတ်းပၢင်ႁူပ်ႉထူပ်းဢုပ်ႇ ၵုမ်ၵၼ်တီႈဝဵင်းလူင်ၼိဝ်ႊယွၵ်ႉမိူဝ်ႈဝၼ်းတီႈ 15 မေႊလ် ပီ 2000 ၊ ဢၼ်ၸတ်းႁဵတ်းၸၼ်ႉၵူႈမိူင်းမိူင်း ၼႂ်းမိူင်းထႆးတႄႉ တႄႇၸတ်းႁဵတ်းမႃးမိူဝ်ႈပီ 2004 ။ မိူင်းဢၼ်ႁပ်ႉပဵၼ်ၸဝ်ႈတႃႇၼၸတ်းႁဵတ်းၼႆႉ မိူင်းထႆး12 ပွၵ်ႈမိူင်းဝႅတ်ႉၼၢမ်း 2 ပွၵ်ႈလႄႈ သီရိလင်းၵႃ 1 ပွၵ်ႈၼႆႉယဝ်ႉ။
Photo: FB Nang Kham Oo
