ႁူင်းႁဵၼ်းၸိူဝ်ႉၸၢတ်ႈ ဝၢၼ်ႈယိူင်း လၢႆးၶႃႈ ၶႂၢၵ်ႈၸၼ်ႉသေ ပိုတ်ႇပၢႆႉမႂ်ႇ

ႁူင်းႁဵၼ်းၸိူဝ်ႉၸၢတ်ႈ ဢိူင်ႇထုင်ႉယိူင်း ၸႄႈဝဵင်းလၢႆးၶႃႈ ပိုတ်ႇပၢႆႉႁူင်းႁဵၼ်းလႄႈ ပိုတ်ႇႁွင်ႈႁဵၼ်းမႂ်ႇထႅင်ႈ မီးၽူႈ ၶဝ်ႈႁူမ်ႈပၼ်ႁႅင်း 100 ပၢႆ။

ဝၼ်းတီႈ 26/05/2018 ယၢမ်းၵၢင်ၼႂ် သင်ၶၸဝ်ႈ၊ ၶွမ်ႊမတီႊႁူင်းႁဵၼ်းၸိူဝ်ႉၸၢတ်ႈ၊ ၽူႈတႅၼ်းသၽႃး၊ ၸုမ်းတူင်ႉ ၼိုင်တူင်ႇဝူင်းၵူၼ်း၊ ၸုမ်းၵူၼ်းၼုမ်ႇလႄႈ ၵူၼ်းမိူင်းၼႂ်းပိုၼ်ႉတီႈ ႁူမ်ႈၵၼ် ပိုတ်ႇပၢႆႉႁူင်းႁဵၼ်းၸိူဝ်ႉၸၢတ်ႈလႄႈ ပိုတ်ႇႁွင်ႈႁဵၼ်းမႂ်ႇထႅင်ႈ တီႈဢိူင်ႇထုင်ႉယိူင်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။

ၸၢႆးၵျေႃႇၸေႇယ ၽူႈတႅၼ်းသၽႃးၸႄႈမိူင်းၶဵတ်ႈလိူၵ်ႈတင်ႈမၢႆ(1) ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ႁူင်း ႁဵၼ်းၸိူဝ်ႉၸၢတ်ႈႁဝ်းတႄႉ တေႇပိုတ်ႇမႃး မိူဝ်ႈပီၵၢႆယဝ်ႉ။ ပွၵ်ႈၼႆႉတႄႉ ပိုတ်ႇပၢႆႉႁူင်းႁဵၼ်းၸိူဝ်ႉၸၢတ်ႈ။ ယဝ်ႉ ၵေႃႈ သမ်ႉသၢင်ႇတေႃႇၸွမ်း ဝၼ်းၵိူတ်ႇၸဝ်ႈတူၼ်ၶူးလူင်ဝိႁၢရ်ၵျွင်းၵၢင်တူင်ႈ ၼႂ်းဢိူင်ႇထုင်ႉယိူင်း ႁဝ်းသေ သင်ၶ ၸဝ်ႈတင်း ၶွမ်ႊမတီႊႁူင်းႁဵၼ်း ႁူမ်ႈၵၼ်သေ ၸင်ႇလႆႈၸတ်းႁဵတ်းမႃး” ဝႃႈၼႆ။

ႁူင်းႁဵၼ်းၸိူဝ်ႉၸၢတ်ႈ တီႈဢိူင်ႇထုင်ႉယိူင်း ၸႄႈဝဵင်းလၢႆးၶႃႈၼႆႉ တေႇပိုတ်ႇသွၼ်မႃးလႆႈ ပီၼိုင်ႈယဝ်ႉ မိူဝ်ႈပီပူၼ်ႉမႃး လုၵ်ႈႁဵၼ်း မီး 30 ပၢႆ။ ပီၼႆႉသမ်ႉ လုၵ်ႈႁဵၼ်းမီး 60 ပၢႆ ။ ယဝ်ႉၵေႃႈ ၸၼ်ႉလိၵ်ႈမႄးၶႂၢၵ်ႈဢွၵ်ႇမႃးထႅင်ႈၸၼ်ႉၼိုင်ႈ မိူဝ်ႈပီၵၢႆ မီးၸၼ်ႉငဝ်ႈ၊ ၸၼ်ႉၼိုင်ႈ ၵူၺ်းပီၼႆႉၶႂၢၵ်ႈထႅင်ႈ ၸၼ်ႉသွင် ဝႃႈၼႆ။

ၸၢႆးၵျေႃႇၸေႇယ လၢတ်ႈဝႃႈ ၼႂ်းႁူင်းႁဵၼ်းၸိူဝ်ႉၸၢတ်ႈႁဝ်းတႄႉ ဢဝ်လိၵ်ႈတႆးပိူင်ယႂ်ႇသေ ပူင်သွၼ်ၵႂႃႇ။ ယဝ်ႉၵေႃႈ တေမီးၽႃသႃဢင်းၵိတ်းထႅင်ႈ။ ပီၼႆႉ သမ်ႉၶႂၢၵ်ႈၶိုၼ်ႈမႃးထႅင်ႈၸၼ်ႉသွင်လႄႈ တေသွၼ်ပႃးထႅင်ႈ ပၢႆးၼပ်ႉ၊ ပၢႆးသၢႆႊ ၸဵမ်ၸိူဝ်းၼႆႉထႅင်ႈလူးၵွၼ်ႇ” ဝႃႈၼႆ။

Photo – Sai Lang Herng