ၸိုင်ႈတႆးပွတ်းႁွင်ႇ ၼႂ်းၸႄႈဝဵင်းလၢဝ်ႇၵၢႆး မီးၽူႈၸၢႆးၵေႃႉၼိုင်ႈ ၵိၼ်ယႃႈမႃႉၼမ်သေ ပႃးလႅဝ်းလမ်းၾၼ်းၵူၼ်း ဝၢၼ်ႈႁဵတ်းႁႂ်ႈ ၵူၼ်းလူႉတၢႆ 7 ၵေႃႉ မၢတ်ႇၸဵပ်း 14 ၵေႃႉ ဝႃႈၼႆ။

ဝၼ်းတီႈ 24/05/2018 ယၢမ်းၵၢင်ၼႂ်ၸဝ်ႉ မီးၵူၼ်းၵေႃႉၼိုင်ႈ ၸိုဝ်ႈႁွင်ႉ ၵျိၼ်ႊလၢဝ်ႊဢၢႆႊ ၵိၼ်ယႃႈမႃႉၼမ်သေ လမ်းၾၼ်း ၵူၼ်းၼႂ်းဝၢၼ်ႈ ဝၢၼ်ႈႁူဝ်ႇသျိၼ်ႇၵျူင်း ၸႄႈဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ။ ၵူၼ်းမိူင်းလူႉတၢႆယွၼ်ႉ 7 ၵေႃႉ မၢတ်ႇၸဵပ်း 14 ၵေႃႉ ဝႃႈၼႆ။

ၽူႈမီးပုၼ်ႈၽွၼ်း ပလိၵ်ႈၸႄႈဝဵင်းလၢဝ်ႇၵၢႆး လၢတ်ႈဝႃႈ “ မၼ်းၸၢႆးၼႆႉ ယွင်ႇယႃႈသေ ဢဝ်ၽႃႉၾၼ်းသႂ်ႇမေး မၼ်းၸၢႆးတင်း လုၵ်ႈယိင်းမၼ်းဢွၼ်တၢင်း။ ယဝ်ႉၵေႃႈ ၵႂႃႇတွႆႇၽၵ်းတူႁိူၼ်းပိူၼ်ႈသေ ၶိုၼ်ႈႁိူၼ်းလူင်းႁိူၼ်း ဢဝ်ၽႃႉၾၼ်းသႂ်ႇပိူၼ်ႈ၊ သင်ဝႃႈ ႁိူၼ်းလႂ် ပိုတ်ႇၽၵ်းတူပၼ်ၵေႃႈ ဢဝ်ၽႃႉၾၼ်းသႂ်ႇၵမ်းလဵဝ်ႁဵတ်းၼၼ်။ ဢၼ် မၼ်းဢဝ်ၽႃႉၾၼ်းသႂ်ႇသေ ၵူၼ်းလႆႈလူႉတၢႆ ပႃးမေးမၼ်းၸၢႆးလႄႈ လုၵ်ႈယိင်း မၼ်းၸၢႆး တင်းမူတ်း 7 ၵေႃႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈလႆႈႁူမ်ႈၵၼ်သေ ၶႄမၼ်းၸၢႆး၊ ၶႄဢမ်ႇလႆႈထိုင်တီႈမီးလွင်ႈၾၼ်းၵၼ်ၶိုၼ်းလႄႈ မၼ်းၸၢႆးၵေႃႈ လႆႈလူႉတၢႆၵႂႃႇၼႂ်းဝၼ်းၼၼ်ႉ မိူၼ်ၵၼ် ဝႃႈၼႆ။

ၵူၼ်းမၢတ်ႇၸဵပ်း 14 ၵေႃႉ ၸိူဝ်းၼၼ်ႉ လႆႈသူင်ႇယူတ်းယႃတူဝ်ဝႆႉ တီႈႁူင်းယႃၸႄႈဝဵင်းလၢဝ်ႇၵၢႆး ဝႆႉယူႇ ဝႃႈၼႆ။

ၼႂ်းမိူင်းတႆးပွတ်းႁွင်ႇၼႆႉ ဢိင်ၼိူဝ်ပၼ်ႁႃယႃႈမဝ်းၵမ်သေ ၵႆႉပဵၼ်ပၼ်ႁႃၵၢၼ်ၾၼ်းတႅင်းၵၼ် ႁိမ်ၶူဝ်းၶွင်ၵၼ်။ မိူၼ် ၼင်ႇ ၼႂ်းဝဵင်းလႃႈသဵဝ်ႈ ၼၼ်ႉၵေႃႈ မီးၵူၼ်းၼုမ်ႇမၢင်ၸိူဝ်း ၽွတ်ႈႁဵတ်းၸုမ်းသေ လႄႇႁႃဢဝ်ၽႃႉၾၼ်းပိူၼ်ႈ လူၺ်ႈဢမ်ႇ မီးလွင်ႈ တၢင်းသင်။ ၼႂ်းမိူင်းတႆးပတ်ႉပိုၼ်ႉ ယႃႈမဝ်းၵမ်လိူင်ႇၼမ် သိုဝ်ႉငၢႆႈ၊ ငိုၼ်းမၢၼ်ႈၼိုင်ႈႁဵင် သိုဝ်ႉ လႆႈ 4-5 မဵတ်ႉ(ယႃႈမႃႉ) ၵေႃႈမီး ဝႃႈၼႆ။