ၵႃးလမ်းၼိုင်ႈ လုၵ်ႉတၢင်းဝၢၼ်ႈမၢၵ်ႇယၢင်းသေ လူင်းမႃးတင်း တႃႈၶီႈလဵၵ်းၼၼ်ႉ ယွၼ်ႉႁေႃႈမႃးဝႆးသေ တူၵ်းတၢင်း ၵႂႃႇ ထုၵ်ႇၾႆးႁုပ်ႇမႆႈႁၢဝ်ႈႁႅင်း ၵူၼ်းႁေႃႈၵႃးလႅၼ်ႈပၢႆႈဝႆႉ ဝႃႈၼႆ။
ဝၼ်းတီႈ 23/05/2018 ယၢမ်းၵၢင်ၼႂ်ၸဝ်ႉ မွၵ်ႈ 4 မူင်းၼၼ်ႉ ၵႃးသႅၼ်းမၢၵ်ႊတူႊ သီၶၢဝ်လမ်းၼိုင်ႈ၊ ဢမ်ႇသႂ်ႇ ပၢႆႉလူတ်ႉဝႆႉ လုၵ်ႉတၢင်းဝၢၼ်ႈမၢၵ်ႇယၢင်းသေ ၶဝ်ႈမႃးတၢင်းတႃႈၶီႈလဵၵ်းၼၼ်ႉ ယွၼ်ႉႁေႃႈဝႆးသေ ဢမ်ႇၵုမ်းလႆႈ ႁႅင်း လူတ်ႉ လႆႈတူၵ်းတၢင်းၵႂႃႇ ထုၵ်ႇၾႆးမႆႈၵႃးတင်းလမ်း ဝႃႈၼႆ။
ၵူၼ်းပိုၼ်ႈတီႈတႃႈၶီႈလဵၵ်း လၢတ်ႈဝႃႈ “ မၼ်းတေႁေႃႈဝႆးႁိုဝ် ဢမ်ႇႁူႉၵႃးၼႆႉ ပေႃးသဵၼ်တူၵ်းတၢင်းၵႂႃႇ တၢင်းၾၢႆႇၶႂႃ။ တီႈဢၼ်ၵႃးသဵၼ်တူၵ်းလူင်းၵႂႃႇၼၼ်ႉ တေႁၢင်ႇၵႆ သဵၼ်ႈတၢင်းလူင် မွၵ်ႈ 10 ဝႃး။ ၵူၺ်းၵႃႈ ၵႃးတႄႉ ပဵၼ်ၾႆးမႆႈ တင်းလမ်းယဝ်ႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၾၢႆႇၶႄၾႆး တင်း ၸုမ်းၸွႆႈထႅမ်ၽေးၵိုင်ႉၵၢင်ႉ ၼႂ်းၸႄႈဝဵင်းတႃႈၶီႈလဵၵ်း လႆႈၵႂႃႇ ၸွႆႈၶႄႁူတ်းၾႆး ဝႃႈၼႆ။
တေႃႈလဵဝ် ပလိၵ်ႈမၢၼ်ႈ ဝဵင်းတႃႈၶီႈလဵၵ်း တိုၵ်ႉသိုပ်ႇၶူၼ်ႉသွၵ်ႈ လမ်းႁႃတူဝ်ၵူၼ်းႁေႃႈၵႃးဝႆႉယူႇ ဝႃႈၼႆ။
ဓါတ်ပုံ – တာချီလိတ်နာရေးကူညီမှူအသင်း
