ၵူၼ်းႁဵတ်းသူၼ် 2 ၵေႃႉ ၺႃးၽေးၾႃႉၽႃႇသႂ်ႇ လႆႈလူႉတၢႆထင်တီႈ ၼႂ်းၸႄႈဝဵင်းၼမ်ႉၸၢင် ၸိုင်ႈတႆး ပွတ်းၸၢၼ်း ဝႃႈၼႆ။
ဝၼ်းတီႈ 23/05/2018 ယၢမ်းၵၢင်ဝၼ်း 12 မူင်းပၢႆ ၸၢႆးၵမ်ႇ ဢႃယု 25 ပီ ၵႂႃႇႁဵတ်းသူၼ်ၶဝ်ႈၵၢပ်ႇ တီႈဝၢၼ်ႈမၢႆ 9 ၼႂ်းၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ၺႃးၾႃႉၽႃႇသႂ်ႇ မၼ်းၸၢႆး တီႈၼႂ်းသူၼ်သေ လႆႈလူႉတၢႆထင်တီႈ ၵမ်းလဵဝ် ဝႃႈၼႆ။
ၸၢႆးၵျေႃႇမိၼ်ႉ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မၼ်း ၸၢႆးယူႇပွၵ်ႉ 2 ၵႂႃႇႁဵတ်းၵၢၼ်သူၼ်ၶဝ်ႈၵၢပ်ႇတီႈဝၢၼ်ႈမၢႆ 9 ။ လႅပ်ႈမၼ်းၸၢႆးၼင်ႈလဵၼ်ႈၾူၼ်းတီႈတႂ်ႈ တူၼ်ႈ မႆႉသေ ၾႃႉၸင်ႇၽႃႇသႂ်ႇမၼ်းၸၢႆး။ တူဝ်မၼ်းၸၢႆးတႄႉ လႆႈတၢႆတီႈၼၼ်ႈၵမ်းလဵဝ်။ ၾူၼ်းမၼ်းၸၢႆးၵေႃႈ လႆႈ လူႉလႅဝ်တႅၵ်ႇၵွႆမူတ်း” ဝႃႈၼႆ။
သိုပ်ႇလၢတ်ႈဝႃႈ ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ တီႈဝၢၼ်ႈလွႆသၢႆး ၵူၼ်းၼုမ်ႇ ဢႃယု 20 ပီပႆၢ ၸိုဝ်ႈႁွင်ႉ ၸၢႆးၸိင်ႇ မိူဝ်ႈၽွင်းမၼ်းၸၢႆး တိုၵ်ႉထႆသူၼ်ၶဝ်ႈၵၢပ်ႇယူႇၼၼ်ႉ ၺႃးၾႃႉၽႃႇ မၼ်းၸၢႆးသေ လႆႈလူႉတၢႆထင်တီႈ ထႅင်ႈ ၵေႃႉၼိုင်ႈ။ ၼႂ်းဝၼ်းလဵဝ်ၵၼ်ၵူၺ်း ၵူၼ်းမိူင်းႁဝ်း လႆႈၺႃးၽေးၾႃႉၽႃႇ လူႉတၢႆ 2 ၵေႃႉ” ဝႃႈၼႆ။
ၸၢႆးဝုၼ်ႇၼ ၵူၼ်းပိုၼ်ႉတီႈၼမ်ႉၸၢင် ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝၼ်း သွင်ဝၼ်းၼႆႉ ၾူၼ်ယႂ်ႇ၊ လူမ်းလူင် ၽတ်ႉပဝ်ႇႁၢဝ်ႈႁႅင်း ၼႂ်းၸႄႈဝဵင်းၼမ်ႉၸၢင်။ ထႅင်ႈၾၢႆႇၼိုင်ႈၵေႃႈ တီႈၵူၼ်းဝၢၼ်ႈ ၺႃးၾႃႉၽႃႇသႂ်ႇၼၼ်ႉ ပဵၼ်တၢင်းပွတ်းတွၼ်ႈထုင်ႉလိၼ်ပဵင်းဝႆႉ။ ပေႃးလူမ်းမႃး ၾူၼ်မႃးၸိုင် ၽတ်ႉပဝ်ႇၵႂႃႇ ပဵၼ်တူၼ်းပဵၼ်ႁၢဝ်းယဝ်ႉ” ဝႃႈၼႆ။
ၵဵဝ်ႇၵပ်းလွင်ႈၵူၼ်းမိူင်းလူႉတၢႆ 2 ၵေႃႉၼႆႉသေ ယူႇတီႈၸုမ်းၸွႆႈထႅမ်ၽေးၵိုင်ႉၵၢင်ႉ ၼႂ်းၸႄႈဝဵင်းၼမ်ႉၸၢင် လႆႈၵႂႃႇ ဢဝ်တူဝ်တၢႆၶဝ် မႃးဝႆႉတီႈႁူင်းယႃ ၸႄႈဝဵင်းၼမ်ႉၸၢင် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ