ဢွင်ႈတီႈၽူႈတႅၼ်းသၽႃး ဢၼ်လုတ်ႈႁၢမ်းပဝ်ႇဝႆႉ 13 တီႈၼင်ႈၼၼ်ႉ တေၸတ်းႁဵတ်းပၢင်လိူၵ်ႈတင်ႈသွမ်ႈ တႃႇလိူၵ်ႈၽူႈတႅၼ်းၵႂႃႇလႄႈ ၶွမ်ႊမသျိၼ်ႊပၢင်လိူၵ်ႈတင်ႈတေတႄႇပိုၼ်ၽၢဝ်ႇသၢႆမၢႆၵႂႃႇ 2 ၵမ်း ဝႃႈၼႆ။

ဢၼ်တေပိုၼ်ၽၢဝ်ႇသဵၼ်ႈၸိုဝ်ႈ ၽူႈမီးသုၼ်ႇတွတ်ႈၶႅပ်းၵၢင်ၸႂ်သမ်ႉ တေပဵၼ်လိူၼ်ၵျုၼ်ႊသဵင်ႈ ဢမ်ႇၼၼ်ႉ ၵၢင်လိူၼ်ၵျူႊလၢႆႊ ၵမ်းၼိုင်ႈ။ ယဝ်ႉၵေႃႈ မွၵ်ႈလိူၼ်ဢေႃႊၵတ်ႊသ် ထႅင်ႈၵမ်းၼိုင်ႈ ဝႃႈၼႆ။

ဢူးမိၼ်ႉၼၢႆႇ ၽူႈၶၢၼ်ပၢၵ်ႇ ၶွမ်ႊမသျိၼ်ႊ ပၢင်လိူၵ်ႈတင်ႈမိူင်းႁူမ်ႈတုမ် လၢတ်ႈဝႃႈ “ ႁဝ်းၶႃႈ တေပိုၼ်ၽၢဝ်ႇ ပၼ်ၵူၼ်းမိူင်း မႃး တူၺ်းၸိုဝ်ႈတႃႇ 2 ပွၵ်ႈ။ တေပဵၼ်ၼႂ်းလိူၼ်ၵျုၼ်ႊသဵင်ႈ ဢမ်ႇၼၼ် ၵၢင်လိူၼ်ၵျူႊလၢႆႊ ၵမ်းၼိုင်ႈ။ ယဝ်ႉၵေႃႈ မွၵ်ႈလိူၼ်ဢေႃႊၵတ်ႊသ်ၵမ်းၼိုင်ႈ။ ပေႃးပိုၼ်ၽၢဝ်ႇ 2 ပွၵ်ႈယဝ်ႉ။ ႁဝ်းၶႃႈ တေတိတ်းၸိုဝ်ႈ ပဵၼ်တၢင်းၵၢၼ်ယဝ်ႉ။ ၵူၺ်းၵႃႈ ဝၼ်းဢၼ်တေပိုၼ်ၽၢဝ်ႇတႄႉ တေပဵၼ်ဝၼ်းလႂ်ဢၼ်ဝႃႈၼၼ်ႉ ပႆႇမၵ်းမၼ်ႈ” ဝႃႈၼႆ။

သိုပ်ႇလၢတ်ႈဝႃႈ “ တေႃႈလဵဝ် ဢွင်ႈတီႈသၽႃး ဢၼ်လုတ်ႈႁၢမ်းပဝ်ႇဝႆႉ 13 တီႈၼင်ႈၼၼ်ႉ ၽူးတေတွတ်ႈၶႅပ်းၵၢင်ၸႂ် မီး 8 သႅၼ်ပၢႆ ယၢမ်းလဵဝ် တိုၵ်ႉၵူတ်ႇထတ်းသဵၼ်ႈသၢႆမၢႆၸိုဝ်ႈၶဝ်ယူႇ” ဝႃႈၼႆ။

ဢွင်ႈတီႈသၽႃး 13 တီႈၼင်ႈ ဢၼ်လုတ်ႈႁၢမ်းပဝ်ႇဝႆႉၼၼ်ႉ ပဵၼ် ဢွင်ႈတီႈၽူႈတႅၼ်းသၽႃးၵူၼ်းမိူင်း 4 တီႈၼင်ႈ၊ သၽႃးၸိူဝ်ႉၸၢတ်ႈ 1 တီႈၼင်ႈလႄႈ သၽႃးၸႄႈမိူင်းတင်း တိူင်းသမ်ႉ 8 တီႈၼင်ႈ ၸိူဝ်းၼႆႉ။ ၼႂ်း 13 တီႈၼင်ႈ ၼၼ်ႉၼႂ်းမိူင်းတႆး ပႃးၼိုင်ႈတီႈၼင်ႈ ပဵၼ်တီႈသၽႃးၵူၼ်းမိူင်း ၸႄႈဝဵင်းလၢႆးၶႃႈ ၼိုင်ႈတီႈၼင်ႈ ဝႃႈၼႆ။

ၽူႈတႅၼ်းသၽႃး ဢၼ်လႆႈလုတ်ႈႁၢမ်းပဝ်ႈၵႂႃႇ 13 တီႈၼင်ႇၼၼ်ႉသမ်ႉ ၽူႈတႅၼ်းမၢင်ၵေႃႉလူႉသဵင်ႈၵႂႃႇ၊ မၢင်ၵေႃႉ ၶၢႆႉတီႈယူႇတၼ်းႁဵင်း(ပုၼ်ႈၽွၼ်း)၊ မၢင်ၵေႃႉထွၼ်တူဝ်ဢွၵ်ႇ ၸဵမ်ၸိူဝ်းၼႆႉ ဝႃႈၼႆ။

ပၢၼ်လူင်ပွင်ၸိုင်ႈၼူၵ်ႉယုင်းၶိုၼ်ႈမႃးၼႆႉ မိူဝ်ႈဝၼ်းတီႈ 1 လိူၼ်ဢေႊပရိူဝ်ႊၼၼ်ႉၵေႃႈ ၸတ်းႁဵတ်းမႃး ပၢင်လိူၵ်ႈ တင်ႈသွမ်ႈၵမ်းၼိုင်ႈယဝ်ႉ ဝႃႈၼႆ။

ၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် ပိုၼ်ၽၢဝ်ႇပဵၼ်တၢင်းၵၢၼ် မိူဝ်ႈဝၼ်းတီႈ 08/05/2018 ဝႃႈ ဢွင်ႈတီႈ ၽူႈတႅၼ်းသၽႃး ဢၼ်လုတ်ႈႁၢမ်းပဝ်ႇဝႆႉၸိူဝ်းၼၼ်ႉ ပေႃးထိုင်မႃး ဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊၸိုင် တေ ၸတ်းႁဵတ်း ပၢင်လိူၵ်ႈတင်ႈသွမ်ႈၵႂႃႇ ဝႃႈၼႆ။